mañacuylläta uyaliycallämay,

ayacuylläta licaycallämay.

Mana casquicul ruygacuylläta ćhasquiycallämay.

2 Am tincüllanman licaycüca cayalꞌa

mana juchayu caśhätari niycallämay.

3 Am tuquictamá śhunꞌüta lisiycamanqui,

tutanpapis licaycamanquimá.

Imanuy caśhäta licaycamäśhayquićhu

manamá ima mana allinllactapis taliycamanquichu.^a

Manatacmá mana allincuna shimïpi yalaycamunchu.

4 Yaćhachicuyniquita cäsuculmi nunacunaca

limapäcuśhannüchu mana limalá.

Juyu nunacunäpa caminuncunapïta aśhuculämi.

5 Caminullayquićhümá masïsu tacyayculá.

Ćhaquí manamá juc läduman lilachu.

6 Tayta Diosllay,

uyaliycamäní

captiquim amllacta ayacamuc.

Aśhutyaycamul mañacuylläta uyaliycallämay.

7 Ćhïnicünincunapi pacacü anman

śhamücunäta salbaycunquimá.

Chaynu cayalꞌa sumä cuyacuyniquitari camalaycachillämay.

8 Ñawi luluyquitanuꞌari licaycallämay.

Laplayquip lulïninmanꞌari pacaycallämay.^b

9 Mana allinta lulamäní juyu nunacunäpïta,

muyülïnïćhu cä ćhïnicünïcunapïtari licaycallämay.

10 Paycunap śhunꞌun pasaypi lumiyäśha imactapis mana sintïmá.

Nunatucülälishamá limapäcunpis.

11 Maypa pulishäcunapis ñawillanćhümá cayan intupämänanpä.

Pampaman muyuchipämänanpämá licapayalcäman.

12 Chapatananpä sumä licapayämü liyunnümá cayalcan.

Pacaläśhanpi awaytayämü malta liyuncunanümá cayalcan.

13 Tayta Diosllay,

śhalcuyñari.

Paycunap cuntran śhalculcul camacaycüluy.

Juchayücunäpa maquinpïtari ispädayquiwan libraycallämay.

14 Tayta Diosllay,

paycunapïtari maquiquiwan salbaycallämay.

Cay allpäćhu cäcunällamá paycunapä cayan.

Chay cänincunallawan patancunapis juntäśha cachun.

Chulincunapis maćhaycälälichun.

Willcancunapäpis puchuycuchunlä canpis.

15 Yaꞌañatacmi ichá chuya caynïwan

am tincüllanman licaycü caśhayquita licaycul sumä cushicuśhä.^c

Licchalcamul ñawpäniquićhu licalïlulmá alli-allicta cushicuśhä.