Llallishanpïmi sulpäta ucun
Saulpa maquinpïtawan lluy ćhïnicünincunapïta libraycuśhanpïmi sirbïnin David Tayta Diosta alawaycun. Taquïcunäpa puydïninpämi. Caynümi nin:
18
Tayta Diosllay,
anmi callpá canqui;
yaꞌa cuyacucmi.
2 Tayta Diosnïmi tacyaycachimäní,
pacaycamäní,
libraycamäní,
callpacta uycamäní.
Tayta Diosllämi wancanu pacaycamäní,
chalicunu atajaycamäní,
munaywan
salbaycamäní,
altunninćhu pacaycamäní.
3 Sumä altuman juluycuśha cä Tayta Diosnïmi
mañacuptí ćhïnicünïcunapi salbaycamäní.
4 Wañuycämi ulꞌunpalcul-ulꞌunpalcul
yacu śhalcücänu ñiticalpaman,
sumä-sumä llüllanümi mana allincunaca manchächiman.
5 Sipultüramá watuncunawan ćhänämäla.
Wañuycämá trampancunacta maśhtämäla.
6 Llaquicuynïćhümi Tayta Diosta ayaculá;
yanapaycamänanpämi mañaculá.
Paymá chuya wasinpïta uyaliycamäla;
ayacuyllämi linlincama ćhaycula.a
7 Jinaptinmi cay allpaca sumä śhaśhälun chucchülun.
Ulꞌucunäpa simintuncunamá cuyülun.
Tayta Dios piñacüluptinmari lluy-lluy śhaśhälun.b
8 Sinꞌanpa untayllamá yalamula,
shiminpapis camacaycü ninamá yalamula,
walayä śhanśhactamá ätumula.
9 Sïlüta wactishyalcachilmi jiꞌalpaycamun.
Lacta-lacta pucutaypa jananpam śhaycamun.
10 Querubin anjilman sillacuśham pälimula.
Waywäpa laplanćhu pälishtinmi śhaycamula.c
11 Pacacunanpämi tutawyaycäta ćhulaycula;
muyülïninpi atajaycunanpämi yana-yana
yanalpamü pucutayta ćhulaycula.
12 Sumä chipyayä cayninpïtamá pucutaycuna yalaycamula.
Luntucunawan walayä śhanśhacunamá yalaycamula.
13 Janay pachäćhu cä Tayta Dios apalimuptinmi räyuctanülä uyalilanchic.
Luntuwan,
walayä śhanśhanülämi yalamulapis.
14 Flïchanta ćhïnicünïcunaman ćhächimuptinmi
wicman-cayman chiꞌichila.
Räyuncunacta ćhächimuptinmi camacaycüla.
15 Tayta Diosllay,
sumä anyapäcuyniquiwanmi
lamarcunäpa lulïninpis camalacülun.
Piñacuyninćhu jamayninwanmi
cay pachäpa simintunpis camalacülun.d
16 Tayta Diosnïmi altupïta maquinta chacchaycalläman.
Nisyu-nisyu yacup ćhawpinpïmi julaycalläman.
17 Sumä munayniyu ćhïnicünïcuna captinpis,
yaꞌapïta mas munayniyu cayaptinpis
Tayta Diosmá libraycalläman.
18 Mana allinta pasayaptïmi paycuna intulpäläliman.
Tayta Diosllamari yanapaycamäní caycula.
19 Ñacaypïtam julaycallamäla.
Śhunꞌunpänu captïmi libraycallamäla.
20 Allincämannu cawsaycuśhäpïtam
Tayta Dios uycalläman.
Maquí mana allincunawan mana anlatacüśha
caśhanmannümi uycalläman.
21 Tayta Diospa yaćhachicuyninmanümi cawsayculá.
Tayta Diosta mana caćhaycullalmi allincällacta lulayculá.
22 Lluy camachicuynincunacta śhunꞌüćhümi uywaycú.
Yaćhachicuynincunacta manam imaypis unꞌayculächu.
23 Puntanćhu śhunꞌunpänümi sumäpa cayculá.
Mana allincäta licayllapis manam licalculächu.
24 Chaymi tincünïmannu Tayta Dios uycalläman.
Ñawquinćhu allin lulaycuśhäman tincütamá ćhasquiycullá.
25 Taytallay,
llaquipayniyücäwanꞌa
llaquipayniyümi caycunqui,
allin cawsaycücäwanꞌa allinmi caycunqui,
26 chuya cäcunäwanꞌa allinpam caycunqui.
Ñatac sumätucücunäwanꞌa sumä-sumätacmá caycunqui.
27 Mana nunatucücunätamá salbaycunqui.
Nunatucücätañatacmi ichá uyshulächinqui.
28 Am Tayta Diosnillämi acchí canqui.
Am Taytallämi tutapaynïćhu acchiycamanqui.
29 Amwanꞌa sumä-sumä pilyäcunactapis camacaycüśhämi.
Am Tayta Diosnïwanmá sumä-sumä pilancunactapis pasäśhä.
30 Tayta Diospa caminaycuyninꞌa sumä allinmi.
Paypa yaćhachicuyninꞌa chalapacunam.
Tayta Diosmi chalapacünincunacta ñawillanćhu uywaycun.e
31 ¿Tayta Diosnuꞌa mayanmá juc canman?
¿Mayantá wancanu pacaycamäninchic juc canman?f
32 Paymá callpacta uycaman.
Paymá allincällap caminaycaman.
33 Paymi ćhaquïtapis luychup ćhaquintanu cürichiman.
Altunnin ulꞌucunäćhüpis masïsuctam pulichiman.
34 Paymi pilyanäpäpis yacuy-yacuyta yaćhaycachiman.
Brunsipi cä flïchacunacta ćhächinäpäpis callpacta uycaman.
35 Anmá atajaycamäní salbaycamäní canqui.
Allï maquiquiwanmá tacyaycachimanqui.
Llaquipayniquimá allinman julaycaman.
36 Caminüta pulipaśhllactamá quićhayculanqui.
Chaymi ćhaquí mana lluchcayculachu.
37 Ćhïnicünïcunacta aticaćhal alcansayculämi.
Lluy camacänäcamamá mana cutimulächu.
38 Pasaypi jaluyta pawäluptïmi manaña śhalcupäculachu.
Maquïmanmi lluy palpälälimun.
39 Anmi,
pilyanäpä callpacta uycamälanqui.
Anmá ćhïnicünïcunacta ćhaquïman uyshuycachimulanqui.
40 Ñawpänïpïtamá ćhïnicünïcunacta ayichilanqui.
Chaynüpamá ćhïnicamänïcunacta camacayculá.
41 Ayaycaćhaptinpis manamá mayan salbaycüninpis calachu.
Tayta Diosta maynu-maynu ayaculcaptinpis
manamá uyaliyculachu.
42 Waywaca ñutu-ñutu pulbucta apaśhantanümá lulaycülú.
Caminućhu ñiꞌitanümá jaluypa pawälú.
43 Cuntrá śhalcücunäpïmi libraycamanqui.
Nasyuncunap puydïninpalämi ćhulaycamanqui.
Mana lisisha malcacunälämi sirbiycäliman.
44 Juc caśhtacunämá maquïćhu caycälin.
Juc shimillaćhümi uyaliycälimanpis.
45 Juc caśhtacunaca ćhinaśhyälälinmi.
Pacacuśhancunapïmi chucchuśhtin yalapäcamun.
46 ¡Tayta Dios cawsachun!
¡Aꞌanug pacaycamäní allinpä licaycuśha cachun!
¡Salbaycamäní Tayta Dios altuman juluycuśha cachun!
47 Paymá ćhïnicünïcunacta pudirní cutichicülun.
Lluy malcacunätamá maquïman ćhulaycämun.
48 Paymi ćhïnimänïcunapi libraycaman;
cuntrá śhalcücunäpä altunninmanlämi ćhulaycaman.
Pasaypi juyucunap maquinpïtamá am libraycamanqui.
49 Chaymi lluy nasyuncunap puntanćhu
Tayta Diosllay,
altuman juluycuśhayqui.
Śhutiquitamá taquicunawan alawaycuśhayqui.h
50 Yaꞌa japächaycuśhayqui mandacücäta
imaypis llalliycachimanquimá.
Yaꞌa Davidtawan milaynincunacta imaypis cuyaywanmá licaycunqui.