Ñawillayquićhuꞌari caycachillämay.

2 Yaꞌami niyculac:

“Anmi sumä allin Tayta Diosllá canqui.

Ampïtá juc allin manamá canchu” nil.

3 Má,

jinantin pachäćhu taytachacunaman chalapacücunäpá

cushicuynin cayan chay sumä taytachanćhüshari.^b

4 Ñatac chay taytachacunacta manchacuywan

sirbiyta ćhapäcunaca sumä-sumä ñacaynincunactam tawacuyalcan.

Chaymi jićhaywan chay yawar uycuśhancunacta yaꞌa mana uycuśhächu.

Śhutintapis limalcuyllapis yaꞌa manamá limalcuśhächu.

5 Am Tayta Diosllämi lluy cänïcuna cayanqui;

amllamá allincunawan juntaycachimanqui.

Cawsayní maquiquićhümá cayan.

6 Sumä tuqui allinnincunaćhümi tücaycachiman.

Uycamäśhan tücäní maynu sumä-sumämá.

7 Limapaycamäní Tayta Diosta alawaycuśhä.

Tutanpapis allincätamá śhunꞌüman ćhulaycamun.

8 Tayta Diosllamanmi imaypis yaꞌa yalpalayá.

Pay allï lädüćhülä cayaptinꞌa manamá

mayanpis palpachimanꞌachu.

9 Chaymi śhunꞌulläpis acchilcun,

almalläpis cushicun,

jinantin aychalläpis jawcalla jamaycun.

10 Cay aychäta allpa śhunꞌunćhüchu manamá caćhaycamanqui.

Nïtac Chuya Aclacuśhayqui nunayquip aychá

ismuycunanta cunsintinquichu.^c

11 Anmi cawsay caminucta lisiycachimanqui.

Amćhuꞌa sumä cushicuyllamá cayan.^d

Läduyquićhuꞌa wiñaypä allin cushicuyllamá.