Mana allin nunacunäpi yanapänanpämi Tayta Diosta mañacun
David isquirbishan taquim pusä cuirdayüwan taquinapä; taquïcunäpa puydïninpämi.
12
Tayta Diosllay salbaycälillämayꞌari,
masïsu chalapacücuna manañamá canñachu.a
Rasuncällacta limacü nunacuna
cay pachäpi chincaculcanñamá.
2 Quiquin-pula artipänacuyllaćhüñamá cayalcan.
Uchuc shimillanwan limalpis
mana allincällamanñamá iwiyalcan.
3 Ay,
mana allinllacta limäcunäta,
artillanwan nunatucücunäta Tayta Dios camacaycüchun.
4 Chaynütac:
“Shimillanchicpämá cayan.
Limayninchicwanmi llalliycuśhun.
¿Mayantá yaꞌanchictalä maquinćhu
uywayämachwan?”
nïcunätapis camacaycüchun.
5 Tayta Diosñatacmi nin:
“Wacchacunaca
usuchisha,
ñacachishamá capäcun.
Chaymi canan śhalculcul wañuy-wañuy
alcapäcuśhanmannu salbaycuśhä” nil.
6 Tayta Diospa limaynincuna sumä chuyam;
urnucta anćhish cuti caldalcachil illay
fundïshanu chuya-chuyamá cayan.
7 Am Tayta Diosllämi ñawillayquićhu licaycälimanqui;
juyu nunacunäpïta anmá ama-pacha niycälimanqui.
8 Mana allin nunacunaca mayćhüñapis muyuyalcanmá.
Jinantin allpäćhümá mana allincällacta alawayalcan.