Ćhïnicünincunacta cäraycunanpämi Tayta Diosta mañacun
10
¿Imapïmá Tayta Diosllay,
calu-calullaćhu caycunqui?
¿Imapïmá llaquicuynïcunaćhu pacacuycunqui?
2 Mana allin nunaca nunatucüśhalämi
waccha nunäta aticaćhanpis.
Ñatac trampa ćhulaśhancunämanmá
quiquincuna palpupäcunꞌa.
3 Śhunꞌun munaśhancunapïmá alawacun;
läga-masinta allinpä licalmi
Tayta Diostañatac mana cäpä lican.
4 Juchayüca wäputaculculmi Tayta Diostapis licayta nï munanchu.
Tayta Diosmanꞌa manamá uchuyllapis pinsalcunchu.a
5 Lluy lulaśhancunapis allinmi imaypis yaluycun.
Paypïtá mućhuchicuyniquipis calućhümá cayan.
Lluy ćhïniśhancunätamari jalutacun.
6 Śhunꞌunćhümi nicun:
“Manamá mayanpis palpuchimanꞌachu.
Manamá imaypis mana allinca ćhämanꞌachu” nil.
7 Shiminpïpis mana allincunallam,
articunallam,
ingañacuycunallam timpuyämun.b
allunćhüpis ćhïnicuycunällawan mana allincunallam pacalayan.
8 Malcacunap yaycunancunaćhüpis
mayantañapis licapayanmá.
Pacacuśhanpïmi mana juchayücunäta unꞌaypi wañüchin.
Mana mayanllapis yanapänin cäcunätamá licapayan.
9 Maćhayninpi liyunnümá paycunacta licapayämun,
juclla chalänanpämá alcayan,
janäninćhu
licalilculmá trampanman alaśhćhan.
10 Uyshucuycul cululacuyculmá mayanllanpis
mana yanapäniyüca maquinman palpupäcun.
11 Chay juyucunaca śhunꞌunćhümi nicun:
“Paycunacta Tayta Diospis unꞌälunñamá.
Imaypis manaña licalcamunanpämá
cärantapis pacacuycunña” nil.
12 Tayta Diosllay,
śhalcuyñari.
Maquiquita chacchalcuy.
Wacchacunäta amari unꞌaycuychu.
13 Tayta Diosllay,
¿imapïmá juyu nunaca
mana cäpä licaśhunqui?
Paymi nicun:
“Manamá imaypis cäraycamäśhunchu” nil.
14 Ñatac ñacaycätawan nanaycäta amllamá licaycunqui.
Licayalꞌa tincüninmanꞌari uycüluy.
Mana mayanllapis yanapänin cäcunaca
amllamanmá aśhuycälimun.
Mana taytayu-mamayücunätapis amllamá yanapaycunqui.
15 Mana allin nunäpa liclanta paquïluy.
Lluy-lluy mana allin lulaśhancunapïta
tincüninman camacaycüluy.
16 Tayta Diosmá wiña-wiñaypä mandacüca;
malcanpïta mana allin nunacunaca chincächiśhamá capäcunꞌa.
17 Tayta Diosllay,
mana nunatacücunäpa
munaśhanta anmá uyaliycunqui,
anmá callpanchaycunqui,
llaquicuynintapis uyaliycunquimá.
18 Mana taytayu-mamayücunätawan
ñacachishacunäta anmá yanapaycunqui.
Chayćha allpallapi camäśha nunaca
sumä-sumä manchachicuyta manaña lulayanꞌañachu.