Tincüllanmanmi Tayta Dios cäraycun
David isquirbishan taquicta “chuli wañushanpia” tünuwan taquinapä; taquïcunäpa puydïninpämi.
9
Tayta Diosllay,
llapan śhunꞌüwanmá alawaycuśhayqui;
sumä lulaycuśhayquicunactamá willaycuśhä.
2 Sumä munayniyu Tayta Diosllay,
ampïtamá sumä cushicú.
Janay pachäćhu Taytallay,
śhutiquitamá
taquicunawan alawaycuśhayqui.
3 Ćhïnicünïcunamá ampïta ayipäcun.
Saytacälälilmá ñawpäniquićhu wañüpäcun.
4 Am tincüninman caraycücämi
dispächuyquićhu taycucuycul
allin tincünïmannu licaycamanqui.
5 Nasyuncunätamá anyapälanqui.
Mana allin lulayniyücunätamá camacaycülanqui.
Śhutincunactapis pasaypipämá chincächinqui.
6 Ćhïnicünïcuna wañülälinmi.
Wiñaypä pulumäśham quïdälälin.
Malcancunactapis pampamanmi muyüchinqui.
Yalpalcunallapäpis manañamá camalaycunñachu.
7 Tayta Diosñatacmi ichá wiña-wiñaypä mandacun;
cäraycunanpämi dispächunta tacyaycachin.
8 Jinantin pachätamá tincüninman licaycunꞌa.
Lluy malcacunätamá cäninman-cama cäraycunꞌa.
9 Tayta Diosmi ñacäcunäpä pacaycünin;
llaquicuyćhu cäcunäta ñawillanćhu caycachin.b
10 Śhuquita lisïcunaca anmanmi chalapaculcan.
Ashishüniquicunacta manamá imaypis unꞌaycunquichu.
11 Sionćhu cä Tayta Diosta taquicunawan alawapäcuy;
lluy lulaycuśhancunacta lluy malcacunaman willaycapäcuy.
12 Nuna wañuchicücunäta tincüninmanmá cutiycachin,
ñacäcunäpa ñacaynincunacta licaycunmá,
llaquicuynincunactapis manamá unꞌaycunchu.
13 Tayta Diosllay,
llaquipaycallämayꞌari;
ćhïnimänïcuna maynu-maynu
llaquicta pasachipämäśhanta licaycuyꞌari.
Wañuycäpa patanpïmá am julaycallämanqui.
14 Chayćha Sionpac puncunćhu maynu
sumä caśhayquita willaycuśhä.
Salbaycamäśhayquipïta cushicuśhämá.
15 Trampacunacta ćhulapäcuśhanwanmá
quiquincuna chalachicälälin.
Malcacunaca ućhcupäcuśhanmanmá quiquincuna palpülälin.
16 Tayta Dios lisichicun tincüninman-cama
lluyta cäraycuśhanwanmi.
Mana allin nunacunaca trampa
ćhulapäcuśhanwanmá quiquincuna ćhänachicälälin.
Selah
17 Juchasapacunaca,
Tayta Diosta
unꞌäcunaca wañücuna caśhanmanmá ćhulaycuśha capäcunꞌa.
18 Mana cäniyücunätañatacmi ichá
pasaypipächu nï unꞌaśha capäcunꞌa.
Alcapäcuśhanman chalapacuyninpis manamá
pasaypipächu chincächisha caycunꞌa.
19 Tayta Diosllay,
śhalcuyꞌari;
nunacunaca nunatuculcänanta amari cunsintiychu.
Lluy malcacunaca ñawpäniquićhu cäraycuśhari capäcuchun.
20 Tayta Diosllay,
paycunactari
sumä-sumäta manchaycachiy.
Wañucülla capäcuśhantari tantiaycachiy.
Selah