Lluy imactapis camä Tayta Diostam alawaycun
David isquirbishan taqui Gitita nishanwan taquinapä; taquïcunäpa puydïninpämi.
8
¡Sumä Tayta Diosllay,
śhutiqui jinantin pachäćhu maynu-maynu licaycuśhamá caycun!
¡Sumä-sumä cayniqui janay pachätapis llalliycunlämá!b
2 Ćhïnicüniqui-laycumari uchuchäcunäpis
ñuñücunäpis amta alawapäcuśhunqui.c
Chaynüpamá cuntracüniquicunacta,
cutichicuyta munäcunäta upällächinqui.
3 Janay pachäćhu am maquiquiwan lulaśhayqui quilläta,
uyllurcunäta canancällaćhu caśhanta licapayculmi,
4 tapucú:
“¿Imañamá nunaca capäcullá
caynüpaña yalpalayänayquipä?
¿Imañatá capäcullá caynüpaña licaycuyänayquipä?”
nil.d
5 Anjilcunäpïpis mas mïnus lulaśha cayalcalpis,
sumä-sumä allinninwan
altuman juluycuywanlämi waytaycälichinquipis.
6 Maquiquiwan lluy lulaśhayquicunätalämá
maquinman ćhulaycunqui.
Lluy-lluytalämá munayninman ćhulaycunquipis:
7 Uwishcunäta,
wäcacunäta,
lluy munti uywacunäta,
8 lluy pälïcunäta,
lamarcunaćhu imaymana challwacunäta,
yacucunäćhu imaymana lichcä cawsäcunätapis.
9 ¡Sumä Tayta Diosllay,
śhutiqui jinantin pachäćhu maynu-maynu licaycuśhamá caycun!