Tayta Dios ñawillanćhu caycachinanpämi mañacun
David isquirbishan taquim pücay tucanacunawana taquinapä; taquïcunäpa puydïninpämi.
5
Tayta Diosnillay,
mañacuylläta uyaliycallämay.
Icchulcul-icchulcul ayacuylläta licaycallämay.
2 Mandacüní,
Tayta Diosllay ruygacuylläta uyaliycallämay.
Amllactamá mañacamullac.
3 Tayta Diosllay,
wäla-wälapïmi
ayacuylläta uyaliycallämanqui.
Aspi-aspiylla mañacuylläta ćhaycachimulmi
niycamänayquita alcaycüllá.
4 Mana allincunäta am Tayta Diosllá
manamá awniyanquichu.
Jucha luläcunaca amwan cusca manamá caycunmanchu.
5 Nunatucüśhacunaca ñawiquićhu manamá caycunmanchu.
Mana allin luläcunäta ćhïnicunquimá.
6 Artishcunäta camacaycülunquimá.
Ipanchäcunätawan wañuchicücunäta millachicunquimá.
7 Yaꞌañatacmi jatun llaquipayniquipä
wasiquiman yaycaycamullá.
Chuya alawana wasiquiman licaśhtinmari
manchacuywan alawaycullac.
8 Tayta Diosllay,
ćhïnimänïcuna-laycuꞌari puśhaycallämay,
tincüllayquiman puśhaycallämay.
Allin caminuyquip caminaycallämay.
9 Paycunap shiminćhu rasunca manamá canchu.
Śhunꞌunćhu mana allincällamá cayan.
Tuncurincunapis sipultüra quićhalayäcänümá cayan.
Alluncunapïpis articunallamá yalayämun.b
10 Tayta Diosllay,
¡cäraycuy!
¡Mana allin lulayta munaśhanmanꞌari quiquinta palpachiy!
Cuntrayqui śhalcapäcul alli-allicta
juchaculcäśhanpïtari alapacüluy.
11 Anman chalapacücunäñatac ichá sumä cushiculcächun.
Ñawillayquićhu uywaycuśhayquicunaca
cushicuypi taquipäcuchun.
Śhutiquita ama-pacha nïcunaca sumä cushiculcächun.
12 Allincällacta lulaycücunäta am
Tayta Diosllämi allinpä licaycunqui.
Atajachicuwannümi lluy muyülïnïpi llaquipaycamanqui.