Ñacayćhu llaquipaycunanpämi mañacun
David isquirbishan taquim pusäa cuirdayu tucacuwanb taquinapä; taquïcunäpa puydïninpämi.
6
Tayta Diosllay,
piñacuyniquićhu ama asutillämaychu;
rabyacuyniquićhu ama lawćhaycallämaychu.c
2 Tayta Diosllay,
llaquipaycallämayꞌari;
manañamá callpá canñachu.
Tayta Diosllay,
allinyaycachillämayꞌari.
Jinantin tullücunañamá chucchuyan.
3 Imanaytapis mana atipalmi yanꞌal-yanꞌal muspaycaćhayällá.
Tayta Diosllay,
¿imaycamañamá caynu cayälläśhä?
4 Tayta Diosllay,
cutiycamulꞌari salbaycallämay;
llaquipayniquiwanꞌari libraycallämay.
5 Wañüśhacá manañamá yalpalcuśhunquiñachu.
Pampäśha caśhancäćhuꞌa ¿mayanñamá alawaycuśhunquiman?d
6 Icchulcul-icchulcul waꞌaypïta pishipälüñamá.
Tutan-tutan wiꞌinïwan maśhtacütapis
puśhtay-puśhtaytañamá lulälú.
7 Ñacaynïcunawanñamá ñawïpis aspälunña.
Ćhïnicunïcuna-laycumá ñawïpis manaña ćhächinñachu.
8 Tayta Diosllämá waꞌacuynïta uyaliycaman;
mana allin luläcuna,
lädüpïta chincaculcayñari.e
9 Tayta Diosmá mañacuynïta uyaliycaman;
Tayta Diosmá ayacuylläta ćhasquiycaman.
10 Lluy ćhïnicünïcunamá pantäśha
sumä pinꞌacüśhä capäcunꞌa.
Ñawi-imchiyllaćhümá pinꞌacüśhä ayiculcanꞌa.