Chalapacuyninwanmi Tayta Diosta mañacun
David isquirbishan taquim cuirdayu tucacuwana taquinapä; taquïcunäpa puydïninpämi.
4
Tincünïman licaycamäní Tayta Diosllay,
ayacuptí uyaliycallämay,
ñacayćhu cayaptí yanapaycallämay.
Llaquipaycamalꞌari mañacuynïta uyaliycallämay.
2 Am puydïtucücunaca ¿imaycamañamá
allin caynïta pinꞌayman ćhulayalcämanqui?
¿Imaycamañatá yanꞌalcunallaman wañupacuyalcanqui?
¿Imaycamañamá mana allincällacta sumä-sumä ashiyalcanqui?
Selah
3 Tayta Diosꞌa chalapacü nunacunällacta
aclaycuśhantari yaćhapäcuy.
Ayacuptí Tayta Dios uyaliycamanmari.
4 Piñacälälilꞌa mana allincäman ama aysachicuyalcaychu.b
Puñunayquićhu śhunꞌullayquićhu
ima caśhantapis upälla tantiacaycäliy.
Selah
5 Tayta Diosman uycunacta
tincüninman uycälil payllaman chalapaculcay.
6 Achca-achcamá niyalcan:
“¿Mayantá allincäta
licaycachimachwan?”
nil.
Tayta Diosllay,
yaꞌacunaćhu sumä cayniquita camalaycachiy.
7 Achca trïguyu,
bïnuyu cäniyücunäpïtapis
mas cushicuytamá śhunꞌüman ćhulaycamanqui.
8 Am Tayta Dioslläman
chalapacütam cawsaycachimanqui.
Chaymi jawcalla ćhaćhaycüpis,
jawcalla puñuycüpis.c