linlïwan uyalilmi tuquicta tantiaycú.

2 Yaꞌapis amcunanüllá yaćhayniyu caytá cayämá.

¿Amcunapïta minuschun cayá imatá?

3 Aśhwanpa quiquin Sumä Munayniyücäwanmari limayta muná;

Tayta Dioswanmari shimi-pula chalanacüluyta muná.

4 Amcunañatacmi ichá pasaypi articunallawan llusicaćhaycälimanqui.

Lluy amcuna jampicütucü pasaypi mana bälïcunamari capäcunqui.

5 Maynu allinlä canman upällapäcuptiquiꞌa.

Chayurá yaćhayniyu caśhayquita camalachipäcunquimanćha.^a

6 Canan má,

nishäta uyalipämay;

lluy limalicuśhäta sumäta uyaliycäliy.

7 “¿¡Tayta Diosta śhaycaycachilchun articuyalcanqui imamá!?

¿¡Payta śhalcuyniquiwanchun casquicunawan ingañayalcanqui imamá!?

8 ¿¡Paytachun śhalcuyalcanqui imatá!?

¿¡Paypa śhalcüninchun licalilälinqui imamá!?

9 Ñatac ¿allinchun yaluycunꞌa Tayta Dios imanuy capäcuśhayquitapis talipaycuśhuptiquiꞌa?

¿¡Nunacta quirichishayquinüchun paytapis quirichinquiman imamá!?

10 Casquicuyniquiwan nunacunäta śhalcuyaptiquiꞌa

pay sumätamá anyapäśhunqui.

11 ¿¡Manachun sumä cayninta manchacunqui imamá!?

¿¡Manachun sumä munaynin ćhälälishunqui imatá!?

12 Amcunap limapäcuśhayquicunacá pasaypi ućhpanüllamá cayan;

difindiculcäśhayquicunaca mitullapi cä pilanüllamá cayan.

13 “Limaśhäta uyalipäcunayquipä upällari capäcuy,

ima aycapis pasamalꞌa pasacamächunꞌari.

14 ¿Imapïtamá quiquïpa aychäta quilücunawan jäćhicuyäman?

¿Imapïtamá cawsaynïta wañuypa patanman ćhulaycuyäman?

15 Masqui wañuchimänan captinpis paymanmi jinalla chalapacuśhä;

cawsayní imanuy caśhantapis ñawpäninćhümari niycuśhä.

16 Chaynu lulayculćha salbacuśhä;

mana juchayümari cayá.

Juchasapacá pay caśhanman manamá yaycuycunmanchu.

17 “Cay nishäta sumäta uyalipämay;

cay limaśhäta tuquicta tantiapäcuy.

18 Ima ninätapis tuquictañamá tantiapacülú;

tuquictamari yaćhá mana juchayu yalunäta.

19 ¿Mayanllapis juchayu caśhäta niycamanmanchun?

Juchá captinꞌa wañunäcamañam upällaña cacuśhä.

20 “Canan má,

Tayta Diosllay,

cay ishcay mañacuyllätari uycallämay;

chayćha ampïta manaña pacacuśhächu:

21 Yaꞌapïta maquiquita aśhuchiyña;

amaña sumä manchachicuyniquiwan manchachimaychu.

22 Ayachimayñari limalicunäpä;

ütac puntacta yaꞌapis limalicuśhä,

am niycamänayquipä.

23 ¿Imacunamá mana allinnïcuna,

juchäcuna cayan?

Imacta jalutacuśhätapis,

juchacuśhätapis licaycachimayꞌari.

24 ¿Imapïmi yaꞌapïta pacacunqui?^b

¿Imapïmi ćhïnicüniquitanu licamanqui?

25 ¿Waywa apaycaćhaśhan laplanu cäcätachun camacaycülunquiman?

¿Pasaypi chaquïsha päśhactachun aticaćhayanquiman?

26 ¿Imapïmi sumä ćhacćhä ñacaycunacta cuntrá isquirbiycunqui?

¿Imapïmi müsu caynïćhu cä juchäcunactapis julaycamunqui?

27 Ćhaquïcunactapis cadinawanmari watämanqui,

lluy pulïnïpis ñawillayquićhümá cayan,

laśhćhütapis atipayämanquimá.

28 Cay aychá camacayan imapis ismüśhanümi,

puyu micüśha müdana-yupaymari camacayan.