2 “Amcunam ichá yaćhaysapa-cama ishpisha-ishpisha,

caculcälläñanqui ¿aw?

Wañuculcaptiquiꞌa amcunawan cuscaćhá yaćhaypis chincacunꞌa.

3 Ñatac yaꞌapis amcunanüllá yaćhayniyu caytá cayämá.

¿Amcunapïta minuschun cayá imatá?

Chay nishayquicunallactá mayanllapis yaćhayanmá.

4 Cananꞌa Tayta Diosta mañacul pay niycamänanta alcaycuśhäpïmi,

am apanacüśhäcunap asipäculcänanman licalïlú.

Yaꞌa mana juchayu allin cawsaycücämi,

cananꞌa amcunap jamuyäculcänanman licalïlüpis.

5 Awari,

jawca cawsaycücämi ñacayta pasäcäta asipäculcanlä canpis.

Allin cäcämari jućhcalpuyäcäta tanꞌalpälälinlä canpis.

6 Awari,

suwacunäpis jawcalämi wasinćhu cawsapäcun.

Tayta Diosta piñachïcunäpis allinlämi cawsapäcun:

‘Maquilläćhümi lluy-lluy imapis cayan’ nil.

7 “Má,

yaćhätucuśhayquipiꞌa uywacunätari tapuycäliy,

paycunamá yaćhaycälichishunqui.

Pälïcunäta tapuycäliy,

paycunamá willaycälishunqui.

8 Cay pachätari tapuycäliy,

paycunamá tantiaycälichishunqui.

Lamarcäćhu imaymana challwacunätari tapuycäliy,

paycunamá lisiycälichishunqui.

9 Tayta Diospa lulaśhancuna caśhanta,

¿mayanllá manamá tantiapäcunmanchu?

10 Lluy cawsäcunaca paypa maquillanćhümari cayan.

Lluy nunacunäpa cawsayninpis paypa munayllanćhümari cayan.

11 “Má,

¿manachun linlica ima limay caśhantapis tantian imamá?

¿Manachun allunchicpis ima micuy caśhantapis tantian imatá?^a

12 ¿Manachun yaśhacunäćhu yaćhayca cayan imamá?

¿Manachun yaꞌapis achca watayu cayal tantiayá imamá?

13 Tayta Diospi yaćhaycäwan munayca śhamuśhantamá yaćhayá.

Payćhümá limapaycuycäpis,

tantiaycäpis cayan.

14 Pay camacaycüluptinꞌa manamá mayanpis śhalcachinmanchu.

Prïsucta wićhächiptinpis manamá mayanpis juluyta atipanmanchu.

15 Tamyacta pay manalcächiptinꞌa lluymá chaquïlun.

Caćhaycüluptinꞌa jinantin pachämanmá punlülun.

16 Paypamá munayca,

yaćhayca.

Paypa maquillanćhümá ingañacücunäpis,

ingañäśha cäcunäpis cayalcan.

17 Paymá yaćhayniyücunäta pasaypiman muyüchin.

Paymá cäraycücunätapis lucluyächin.

18 Mandacücunaca cadinaśhancunactapis jululculmi,

quiquin mandacücunäta mana imayu calanllacta cadinawan prïsu puśhachin.

19 Sasirdüticunätapis lulayninpïtamá wicapan.

Sumä puydïcunätapis mana caśhanmanmá muyuchin.

20 Sumä caminaycücunäpa shimintamá wićhälun.

Yaśhacunäpa tantiaynincunactapis chincächinmá.

21 Allinpä licaśhacunätamá pasaypi mana allinpä licaśhaman muyuchin.

Sumä callpayücunätañatacmi mana callpayüman licalïchin.

22 “Sumä itiwyaya luliman pacäśha cäcätapis paymi julaycamun.

Sumänin tutawyaycäpïpis paymi acchiman julaycamun.^b

23 Paymi lluy nasyuncunäta milaycachinpis ütac mana cämanpis muyuchin;

altumanpis juluycun ütac mana caśhanmanpis chiꞌichin.

24 Malcacunäpa mandänincunap yaćhaynintapis,

mana caśhanman muyulcachilmi caminu,

mana cä chunyäninpa taplaycaćhachinpis.^c

25 Tutawyäćhu-yupaymi taplaypa pulipäcun;

shinca-yupaymi tanli-tanli lipäcun.