jinaman imaymana ñacayniyülämi canpis.

2 Waytanüllamá waytalcamul chincacun.

Llantuynüllamá mana tacyal pasacun.^a

3 ¿Chaynu nunallactachun licapäcayämanquimanlä?

¿Chaynu nunallactachun cäraycuymanlä ćhulaycayämanquiman?

4 ¿¡Mayanmá mana allincäta chuyaman muyuycachinman!?

Manamá mayanpis atipanmanchu.

5 Awari,

nunacunacá ayca wata cawsananpäpis camachishañam cayan,

ayca quilla cananpäpis unanchäśhañam cayan,

imaycama cananpäpis niycuśhañam cayan,

chaytá manamá pasanmanchu.

6 Chayurá nunäpïta ñawiquita aśhuchiyñari.

Jawcactaña caćhaycuy,

lulapacünu lulayninta jawca lulalpapäcunanpä.

7 “Aśhta lantäpapis mas allinlämari alcaycuynin cayan.

Juc lantacta cuchüśha chillquimunmanlämi;

pallaynincunapis caycunmanlämi.

8 Masqui sapin pasaypi awquishyäśha cayaptinpis;

cullunpis allpäćhu ismuyaptinpis,

9 yacüpa aśhnayllanta musyälulꞌa muśhüpïmi chillquilimun;

muśhü lantanümi pallaysapa caycun.

10 Nunäñatacmi ichá wañülul pasaypipäña chincacun.

Juc jamalcuyllaćhümari licun;

manañamá mayćhu caśhanpis canñachu.

11 Lamarcäćhu yacucunaca camacäśhannümi,

mayucunäpis chaquishannümi,

12 nunaca wañuculꞌa manaña śhalcamunꞌañachu.

Janay pachaca caśhancamá manamá licaćhacunꞌachu,

nïtac puñuśhanpïpis śhalcunꞌañachu.

13 “Maynu allinlä canman piñacuyniqui pasanancama,

allpäpa śhunꞌunman pacaycämaptiquiꞌa.

Maynu allinlä canman yalpalcamänayqui muyunta unanchaycuptiquiꞌa.

14 Nunaca wañucul ¿¡caśhanchun cawsamunman imamá!?

Cawsaśhäcama muyun-muyunmi alcaycuśhä.

Ñacaynïpi libraycuśha canäcamam alcaycuśhä.

15 Ayamaptiqui yaꞌa uyaliycucmanmi;

amꞌa maquiquiwan lulacuśhayquita wañuy-wañuylämi licaycamanquimanpis.

16 Ñawillayquićhu caycachimänayquipä mayta lishätapis

atiyämalꞌa juchäcunacta manañaćhari ashipayämanquimanchu.

17 Mana allin lulaynïcunactapis luncuman winayculñaćh pampälunquiman;

juchäcunacta paꞌaycamanquimanñaćh.

18 “Chaynu canantá caynümá cayan:

Maynümi sumä wancacunäpis palpapäcun,

aꞌacunäpis caśhancäpïta jućhupäcun,

19 yacucunäpis lumicunäta ashllap-ashllap llampuchin,

ütac tamyapis pulbucunäta juclla apapäcun,

chaynümá nunäpa alcaśhanta mana cäman ampis ćhulaycunqui.

20 Llallïluptiquimá pasaypipäña chincacun,

cäranta shipulcachilꞌa,

sipultürämanñamá wicapaycülunqui.

21 Chulincuna altuman juluycuśha capäcuptinpis pay manañamá yaćhanꞌañachu.

Uyshulächisha capäcuptinpis manañamá tantianꞌañachu.

22 Aśhwanpa quiquinpa nanayllantañamá tantiacuycun;

quiquillanpïtañamá llaquicun” nil.