2 “¿Imaycamañatan chaynüpa limayanqui?

Juyu waywa pücäcänümá shimiquipi limayniqui yalayämun.

3 ¿¡Tayta Dios allincäta iwiyanchun imatá!?

Sumä munayniyüca,

¿¡tincüninman cäraycunancäta muyuyächinchun imamá!?

4 Chuliquicuna Tayta Diospa cuntran mana allinta

luläläliptinćhari juchanman tincüta mućhüchin.

5 Ñatac Tayta Diosta ashiycuptiqui,

sumä munayniyücäta mañacuptiqui,

6 jinaman munaśhanmannu allin chuya

cawsaycuptiquiꞌa,

yanapaycuśhunquim;

chaynütac ima cäniquicunactapis caśhanmi cutiycachishunqui.

7 Punta cäniquicuna manamá imapischu canꞌa,

śhamücäćhu cäniquicunawan tincuycachishá.

8 “Má,

punta awquillunchiccunactari tapuycuy;

punta nunacunäpïtari yaćhaycuy.

9 Yaꞌanchicꞌa anyan śhalunlla licalimü calmi imactapis mana yaćhanchicchu.

Cawsayninchic cay allpäćhu llantuycänüllamá cayan.^a

10 ¿Manachun punta nunacunaca limapaycul,

śhunꞌunćhu lluy caśhanta yaćhaycachishunquiman imamá?

11 “Má,

¿śhuꞌuśhca mana yacu caśhan,

chaqui-chaquićhüchun wiñan imatá?

¿Juncu jaćhäpis yacu mana caśhanćhu wiñanmanchun imamá?

12 Masqui tuqui birdilayalpis manalä pipis lutuptinmari

juc ulacunäpïpis mas puntactalä chaquïlun.

13 Awquillunchiccuna tuquictam yaćhan,

Tayta Diosta unꞌaycul chaynu cawsä nunacunäta pasananta.

Chaynümá mana allin nunacunäpa chalapacuynin camacapäcun.

14 Chalapacuyninmari ñañu puchcänülla cayan.

Śhaycapacuycuyninmi añärup llicannülla ñañu cayan.

15 Chay puchca-niläcällaman chalapacul manamá awantanꞌachu.

Chay llicaniläcällaman chalapaculpis manamá tacyaycunꞌachu.

16 Tayta Diosta chay unꞌäcunaca inti laꞌananćhu cä birdi jaćhänümi cacuyalcan.

Pallaynincunapis jinantin wirtacunämanmá maśhtacacucuyan.

17 Sapincunapis wancacunämanmá alwicacacuyan,

lumicunämanmá yaycucuyan.

18 Ñatac chay caśhanpi chutäluptinꞌa chay wiñaśhan sityuca:

‘Manam lisicchu’ ninꞌam.

19 Chaynüpamari cushicuynin camacan.

Juc jaćhacunañamá pudirnin wiñamunꞌa.

20 “Allincämannu cawsäcunätam ichá Tayta Dios mana unꞌaycunchu.

Mana allin luläcunätá manamari yanapanꞌachu.

21 Tayta Diosmi cushicuywan juntaycachishunqui;

cushicuypïmari shimiquipis apalinꞌa.

22 Ćhïnicüniquicunañatacmi ichá pinꞌaywan ñitïsha capäcunꞌa;

mana allin nunacunäpa wasinpis pampamanmari muyunꞌa” nil.