7
“¿Manachun cay allpäćhu nunacunäpa cawsaynin cachacup cawsayninnülla imamá?
¿Manachun nunacunäpa cawsaynin lulapacücäpa muyunninnülla imatá?
2 Uyway nunaca maynümi tutalpunanpi wañupacun,
ütac lulapacü nunapis lulapacuśhanpi pägunta alcayan,
3 chaynümi yaꞌapis achca quillaña yanꞌal-yanꞌal alcayá.
Tutan-tutan ñacayllacta pasaycuyá.
4 Puñuyta allayculpis:
‘¿Imayürañaćh ayllinꞌa?’
nicú.
Tutaca manaña imaypis pasacäliptinmi puñunäćhu ućhpiyal ayllí.
5 Jinantin aychäćhümi cululla lancäśha,
chaquïsha ilinu cayan;
quićhacacäśha aychäpïmi ishuytayllaña wiꞌiyämun.
6 Awäcäpa lansadïranpïpis mas-mastam cawsayní pasayan.
Alcaśhätapis manaña talilmá camacanꞌa.
7 “Má,
Tayta Diosllay,
yalpalcuyꞌari.
Cawsayní pasacü jämaynïnüllamá.
Cushicuyta manañamá ñawillá licaycunꞌañachu.
8 Canan licamänïcuna manañamari mastá licamanꞌañachu.
Maynüpa licaycaćhamaptiquipis manañamá caśhäñachu.
9 Maynümi pucutayca pallaculcul chincacun;
chaynümá sipultüraman yaycüca,
manaña cutimü chincacun.
10 Wasinmanpis manañamá cutimunñachu.
Chay caśhancäpis manañamá yalpalcunñachu.
11 “Chaymi upälla nï cacümanchu.
Śhunꞌú nanaypa-nanaycuptinmari limá.
Sumä piñacuynïćhümi quijacú.
12 ¿¡Lamarcächun icha lamarcäćhu cä jatućhaćhä manchanaśh
uywachuna cayá caynüpaña täpalayämänayquipä imamá!?
13 Yaꞌami nicú:
‘Puñulćha jawcayayta taliycuśhä.
Puñulćha llaquicuynïpïta jamaycuśhä’ nil.
14 Niptïpis manchanaśhcunäwanmi suyñuynïćhu manchachimanqui;
juyucunactam muspachimanqui.
15 Chaymi anualpächimaptiqui mas allin canman.
Cawsanäpïtá wañuycämi mas allin canman.
16 ¡Cawsayta pishipälüñam!
Manañamari cawsayta munäñachu.
Caćhaycamayña,
cawsayní manañam imapäpis allinñachu.b
17 ¿Imañatá nunaca ancha-anchap ćhaninchaycunayquipä?
¿Imañamá nunaca śhunꞌuyquićhu uywaycunayquipä?c
18 ¿Imapïtam walan-walan watucuycunqui?
¿Imapïtam imaypis imaymanaman ćhulaycunqui yaćhapaycuyniquiwan?d
19 ¿Imayñatá licapayta caćhaycamanqui?
¿Imayñamá tuwayllätapis pasalpachinäpä jawcacta caćhaycamanqui?
20 Nunacunäpa licaycünin Diosnillay,
juchacta lulaśhäwan ¿ima mana allintam amta luläluc?
¿Imapïñamá yaꞌallactaña chalacaycamanqui?
¿Imapïñamá ñawiquipi chincanäta munayämanqui?
21 ¿Imapïmá juchäcunacta manaña pampachaycamanquichu?
¿Imapïmá mana allin lulaynïcunacta unꞌaycunquiñachu?
Manaña unaytamá allpäćhu jamacuśhä;
ashimaptiquipis manañamá caśhäñachu” nil.