Ñacayninpïtam Job liman
3 “Ash,
imapälä chay muyun mamäpa patanćhu licalilá.
‘Walaśhmi näsïmun’ nishan muyuncäpis ¡isisí,
imapälä cala!
4 Chay muyunca camacälunman cala.
Chay muyuncäta janay pachäćhu
cä Tayta Diospis mana cäpäña licanman cala.
Chay muyunca amaña acchinmanpischu cala.
5 Chay muyunta wañuypa llantuynin ñitïlunman cala,
ütac yanawyaya sumä pucutaypis pitwïlunman cala,
ütac inti wañüluptin manchächinman cala.
6 Chay tutawyayca tutawyayllaña cacunman cala.
Chayurá watacunäpa muyunninćhu,
quillacunäpa muyunninćhu manañaćhari canmanchu cala.
7 Chay tuta,
patacta mayanpis ama talicunmanchu cala.
Chayurá chay tuta cushicuypi manaćh
mayanpis apalinmanchu cala.
8 Lamarcäćhu sumä manchanaśhb cäcäta,
munayllanćhu cachïca,
chay muyuncäta
mana allin cananpä ninman cala.
9 Chay wäla uyllurcunaca amaña licalimunmanñachu cala,
alcaśhan muyuncäpis amaña canmanchu cala,
ayllimuśhanpa chipipicyayninpis amaña yalamunmanchu cala.
10 Caynu ñacaycunacta manaña licayänäpä
chay tuta mamá amaña waćhacamanmanchu cala.
11 “¿Imapïtá mamäpa patanćhu mana wañülächu?
¿Imapïtá wañüśhaña mana näsilächu?
12 ¿Imapämá millayninmanpis ćhasquiycamäla?
¿Imapämá ñuñumälapis?
13 Wañuculꞌa canan cushisham cayäman cala.
Jawcañam jamacüman cala.
14 Wasi lulachiśhancunapis pulumäśha cä punta mandacücunäwan
puydïcunäwan cusca unayñaćh jamacüman cala.
15 Illaytawan üructa wasincunaman
tawayä punta puydïcunäwan cusca uynayñaćh cayäman cala.
16 ¿Imapïmá śhullüśha iñachactanüpis mana pampälälimälachu?
¿Imapïtá manalä timpunćhu näsïshactanu pampälälimälachu?
17 Chayćhu pasaypi mana allinta luläcunäpis
manañamá ima lulaycunactapis lulapäcunñachu.
Ñacaycunallaćhu cawsä mana callpayücunäpis jamaculcanñamari.
18 Prïsucunäpis chayćhuꞌa jawcayaytañam talipäcun.
Mandäninpa caćhcaynintapis manañamá uyalipäcunñachu.
19 Chayćhuꞌa uchuchäpis jatućhäpis chay cuscañamá cayalcan.
Chayćhuꞌa uyway nunacunapis manañamá mandäninpa maquinćhüñachu.
20 “Ñacäcunäta ¿imapälä Tayta Dios cawsayächinlä?
¿Imapämá pasaypi llaquillaćhu cäcunäta cawsayta uycunlä?
21 ¿Imapïmá wañuyta munäcunaca wañuyta mana talipäcunchu?c
¿Imapïmá ćhaniyu pacactanu ashiyalcalpis wañuyta mana talipäcunchu?
22 Sipultüranman ćhälulmi ichá
sumä-sumäta cushiculcanꞌa.
23 ¿Imapäñamá cawsachin mayman liytapis mana yaćhä nunacta?
¿Imapäñamá cawsachin wićhäśha-yupay cä nunacta?
24 Piswaynïmi micuyní;
llaquicuynïmi upyayní.
25 Sumä manchacuśhäcämari ćhäman;
anchap lisiraśhäcämi alcansäman.
26 Yaꞌapá manam jawcayay nï jamaycuy canñachu;
allin caycunätá llaquicuyllaćhümi cayá” nil.