2
Ñatac Tayta Diospa ñawpäninman aśhuycälinan muyuncäćhu anjilcunaca caśhan lipäcuptinmi Satanaśhpis paycunawan lila.
2 Chayćhümi Satanaśhcäta Tayta Dios nin:
“¿Maypïmi śhayämunqui?”
nil.
Niptinmi:
“Jinantin allpäta muyumuśhäpïtamari śhayämú” nin.
3 Niptinmi Tayta Dios:
“Chayurá,
¿manachun sirbimäní Jobta licaycamulanqui?
Paynuꞌa jinantin pachäćhu manam pipis canchu:
mana juchayu,
allincällacta lulä,
mana allincäpi japächacul Tayta Diosta manchacuywan cawsä.
Masqui mana cäman yanꞌalpi muyuchinäpä jicutapayämaptiquipis,
payꞌa allincäćhümari jinalla tacyaycun” nin.
4 Niptinmi Satanaśhca:
“Awari,
uyayllapamá chaynu cayan.
Cawsayninta salbacuyninwanmi ichá nunaca imactapis lulälunman.
5 Chayurá ¿quiquinpa aychanman maquiquita ćhulaycuptiqui manachun cärayquićhu jalutacüśhunquiman imatá?”
nin.
6 Niptinmi Tayta Dios:
“Má,
munaśhayquita Jobwan lulayꞌari.
Cawsaynintañatacmi ichá ama yataycunquipischu” nin.
7 Niptinmi Satanaśhca Tayta Diospa puntanpïta yalulcul Jobpa aychanman nana-nanay llillïtay ishyayta,
uma puntanpi ćhaquincama licalïchin.
8 Chaymi Job ućhpap ćhawpinman taycucuycul cutuśhwan jićhcacuy-jićhcacuy cayäla.
9 Chayćhümi walmin nin:
“¿Tayta Diosniquiman jinallalächun chalapacuyanquimanpis?
Tayta Diosniquita jalutaculcul wañuyꞌari” nil.
10 Niptinmi Job:
“Walmi,
upa luclap limaynintanümi limayanqui.
Tayta Diosninchicpïta allincäta ćhasquiycuyalꞌa ¿¡manachun mana allincätapis ćhasquiycuchwan imatá!?”
nin.
Lluy chaycunaćhu limayllanwanpis Job manamari juchaculachu.
Apanaculcäśhancunam watucü Jobman lipäcun
11 Chaynu Job pasaśhanta quimsan apanaculcäśhancuna yaćhälälilmi chay llaquicuyninćhu yanapaycälinanpä,
cunsuylaycälinanpä watucü cusca lipäcula.
Paycunam cala:
Teman lädupïta Elifaz,
Suja lädupïta Bildad,
Naamat lädupïta Zofarpis.
12 Ñaꞌa jiꞌaycuyalcalñam Job mana lisipaśhña caśhanta licälälin.
Chaymi llaquicuypi apalcaćhaypa waꞌapäcula,
müdanancunactapis laćhyaculcäla,
umanmanpis allpacunacta mächiculcäla.
13 Chayćhümi anćhish muyun,
anćhish tuta pampäćhu Jobta täcawshipäcula.
Nanaynin ancha-anchap captinñatacmari mayanninpis mana imallactapis nipäculachu.