Job
Jobpi Isquirbishan
Jobmi ñacaycunacta pasan
1
Má,
Uz lädućhümi Job śhutiyu wayapa yaćhala.
Paymi mana juchayu,
allincällacta lulä,
mana allincäpi japächacul Tayta Diosta manchacuywan cawsala.a
2 Chulinpis anćhish walaśh,
quimsa wamlam cala.
3 Uywancunañatacmi cala:
anćhish walanga (7,000) uwish,
quimsa walanga (3,000) camïllu,
picha paćhac (500) yunda,
picha paćhac (500) ćhina aśhnu;
jinaman uywaynincunapis achca-achcam cacula.
Jobmari chay inti yalamunan lädućhu lluypïpis mas cäniyu cacula.
4 Jobpa chulincunañatacmi tücachinacuypa jatun fistacunacta wasincunaćhu lulapäcü cala.
Chaymanmi quimsan panincunacta ayachipäcula micapäcunanpä,
upyapäcunanpä.
5 Chay fista lulaśhancunaca pasäluptinñatacmi chulincunacta pampachaycachinanpä Job ayachimü-ayachimü cala.
Chaymi wäla-wälalla śhalcuculcul lluy chulincunapä Tayta Diosman uywacunacta cañaywan uycula:
“Ichapis chulïcuna śhunꞌunćhu Tayta Diosta jalutacälälil mana allinta lulälälillan” nil.
Chaynüpam chulincunapä imaypis Job mañacü cala.
6 Ñatac anjilcunacab Tayta Diospa ñawpäninman aśhuycälinan cä jucnin muyunćhümi tumpacü Satanaśhpis lila.c
7 Chayćhümi Satanaśhcäta Tayta Dios:
“¿Maypïmi śhayämunqui?”
nin.
Niptinmi:
“Jinantin allpäta muyumuśhäpïtamá śhayämú” nin.
8 Niptinmi Tayta Dios:
“¿Manachun sirbimäní Jobta licalanqui?
Paynuꞌa jinantin pachäćhu manam pipis canchu:
mana juchayu,
allincällacta lulä,
mana allincäpi japächacul Tayta Diosta manchacuywan cawsä” nin.
9 Niptinmi Satanaśhca:
“¿¡Job manchacuywan cäsucuśhunqui dinbaldillachun imatá!?
10 ¿¡Manachun paytapis,
lluy aylluncunactapis,
ima cänincunactapis ñawillayquićhu caycachinqui imamá!?
Lluy lulaynincunaćhu allinpä licaycuptiquimari ima cänincunapis jinantin malcaćhu alli-alliman milälun.
11 Ñatac maquiquita ćhulaycul lluy cänincunactapis waycäluptiquiꞌa cärayquićhümá jalutacüśhunqui” nin.d
12 Niptinmi Tayta Dios:
“Chayurá má,
lluy cänincunawan munaśhayquitari lulamuy.
Quiquintañatacmi ichá uchuyllactapis ama yataycunquichu” nin.
Niptinmi Tayta Diospa puntanpi Satanaśhca licula.
13 Canan má,
juc muyunćhu Jobpa walaśh wamla chulincuna mayurninpa wasinćhümi micuyćhu,
upyayćhu cayalcäña.
14 Jinayalcaptinmi juc willacü Jobman ćhaycul nicuyan:
“Yundayquicuna ärayalcaptin,
ćhina aśhnucunäpis chaycunallaćhu micuyalcaptinmi,
15 Sabae lädu juyu nunacunaca unꞌaypi licalilcamul lluy aticulcan.
Sirbïniquicunactapis ispädawanmi camacaycülun.
Caycunacta willaycunacpä yaꞌallañamá lluptïmú” nil.
16 Chaynu limayällaptinlämi jucpis licalilcamul:
“Altu sïlüpïmi juc räyu licalilcamul uwishniquicunactawan michïniquicunacta lupälun.
Caycunacta willaycunacpä yaꞌallañamá ayïmú” nicuyan.
17 Chaynu niyällaptinlämi jucpis licalilcamul nicuyan:
“Caldeo läducuna quimsa parti śhalcamulmi camïlluyquicunacta lluy aticulcan.
Michïcunätapis ispädawanmari camacaycülun.
Caycunapi willaycunacpä yaꞌallañamá ayïmú” nil.
18 Chaynu limayällaptinlämi jucpis licalilcamul:
“Mayur chuliquip wasinćhu walaśh wamla chuliquicuna micuyćhu,
upyayćhu cayalcaptinmi,
19 chunyä lädupi sumä-sumä waywa licalilcamul wasip tawan lädunta śhaśhächin.
Jinaptinmi chuliquicunacta wasica ñitïluptin wañuculcan.
Caycunacta willaycunacpä yaꞌallañamá ayïmú” nicuyan.
20 Chaycunacta uyalïlulmi Job śhalcuculcul müdanantapis laćhyacuyan,
ächantapis lluy lutucücuyan.
Jinalcul pampäcama unꞌulacuyculmi Tayta Diosta alawäcuyan:
21 “Mamäpa patanpi calallam yalamulá.
Liculpis calallatacmi licuśhä.f
Tayta Diosmi lluyta uycamäla;
Paytacmi cutichicunpis.
Tayta Dios altumanꞌari juluycuśha cachun” nil.
22 Masqui caycuna pasayaptinpis Job manam mana allinta lulalachu,
nï Tayta Diostapis juchachälachu.