2 “Tayta Job,

yaꞌa limapaycuptí amam piñacunquichu.

Ñatac ¿mayanmá upälla quïdacunman?

3 Am,

achca nunacunactamari yaćhachilanqui;

jucmanyäśhacunätapis callpanchalanquimá.

4 Cućhpäśhacunätapis limapaycuyniquiwanmi śhalcachilanqui.

Cućhpalpuyäcunätapis tacyachilanquim.

5 Má,

chaychun canan,

¿mana allinca

anman ćhämuptin jucmanyayanquiman?

¿Ñacayta pasayal wällïsha cayanquiman?

6 Chayurá ¿manachun Tayta Diosman

chalapacuśhayquica jawcayaycachishunqui imatá?

¿Manachun tincüllanmannu cawsaycuśhayquica chalapacuyniqui imatá?

7 “Tantiaycuyꞌari,

¿mayan mana juchayücällá mana allincäman ćhälamá?

¿Allincämannu cawsaycü nuna mayanmá

camacaycüśha cala?

8 Yaćhaśhanchicnüpis ñacaycunallacta talpüca,

mana allincunallacta aćhmïca

chaycunallactamari cusichan.

9 Chayurá chaycunacta Tayta Diosmari

jämayllanwan wañüchin.

Piñacuyninpa jamalcuyllanwanmari camacaycülun.

10 Masqui liyunnu apalcaćhaptinpis,

malta liyunnu waꞌaptinpis

Tayta Diosmari quiluncunacta paquiy pawälunꞌa.

11 Awquish liyunca micuypi wañuśhannümi wañupäcunꞌa.

Liyunpa uñancuna wicta cayta liculcäśhannümi chiꞌipäcunꞌa.

12 “Chaynütac juc willacuyta pacallap linlilläman

willaycamäśhanta yanꞌa-yanꞌallactam uyalïlú.

13 Lluy nunacuna tutap wañuśha-wañuśha

puñuyalcaptinmi manchanaśhta muspayäñá.

14 Chaymi sumä-sumäta manchalicucuyäñá.

Tullücunapis chucchucuyäñämi.

15 Cäräpa waywanu pasäluptinñatacmi

manchacuypïta ächäpis śhalcülun.

16 Ñawpänïćhümi nuna śhäcuyäpa llantuynintanu licälú.

Ñatac mayan caśhantapis manamá licalächu.

Imapis mana cayäśhanpïtam linlilläćhünu caynüta nïmun:

17 ‘¿Tayta Diospïta mas chuya canmanchun

wañucücälla imatá?

¿Luläninpïta mas allin canmanchun nunaca imatá?’

nil.

18 Awari,

anjilnincunamanpis manamá chalapacunchu.

Mana allincunactamari willacünincunaćhüpis taliycun.

19 Chaylächun ¿mitullapi luläśha cäcäman chalapacülunman imatá?

Nunaca pulbullapi luläśhallamari.

Puyunu maquillawan ñitïnallapämari cayanpis.

20 Juc muyunllaćhu pampaman muyüchiptinmari

pasaypipä chincacun,

mayantapis mana imapis ucuśha.

21 Puchcacta cutichishanchicnümi cawsayninpis rätulla chincacun.

Yaćhayta manaläpis talilmari wañucun.