3 Quimsa wataña mandacuyninćhu cayalmi jatun fistacta lulachila chay malcancunap lluy puydïnincunapäwan sirbïnincunapä.

Ayachilatacmi Media nasyunpa,

Persia nasyunpa pilyänincunap puydïnincunacta,

jinaman jatun malcacunäpa puydïnincunacta,

caminaycünincunactapis.

4 Chay fistaćhümari cänincunacta,

sumä mandacuynin caśhanta,

jinaman sumä munayniyu caśhantapis süta quilla camalachila.

5 Chay camacäluptinpis mandacü Asuero juc cumbiductam lulachila Susa malcaćhu lluy cäcunäpä puydïpä mana puydïpäpis.

Chay cumbidu anćhish muyunmi palasyup luli wirtanćhu cala.

6 Chay patyunmi yuläwan asulpi cä sumä fïnu curtïnacunawan adurnäśha cacula.

Watacunpis muräduwan yulä lïnupi,

chalalänincunapis illaypïta luläśham linlinpa pasala,

marmulpi cä paradïruncunaman watäśha cananpä.

Täcunancunapis ürupi illaypi luläśha-camam cacula.

Pampanpis chipyayä porfido,

marmul,

jinaman alabastro jacinto nishan aläja lumicunapïmi cala.

7 Upyapäcunanpäpis ürupi imaymana juc licchä-cama luläśha bäsum lluypäpis cacula.

Chayćhu mandacüca munaśhanmannümari upyacuyllanpä bïnupis cacula.

8 Mandacücämari sirbïnincunacta nin:

“Upyayta mana munäcunäta amam mayantapis jicutapäcunquichu,

aśhwanpa munaśhanmannümi upyaculcanꞌa” nil.

9 Chaynütacmi mandacü Asuerop walmin Vastipis walmicunällapä palasyućhu juc cumbiducta lulachila.

10 Má,

chay mandacücäpa anćhish capäśha nunancunamari sirbïnin capäcula:

Mehuman,

Bizta,

Harbona,

Bigta,

Abagta,

Zetar,

Carcaspis.

Paycunactam anćhish muyuncäćhu mandacü Asuero bïnu upyaśhanpi sumä cushisha cayal ayachimula.

11 Jinalculmi walmin Vasticta curunanwan ćhulapacüśhacta mandacücäpa ñawpäninman puśhamunanpä caćhala.

Lluy puydïcunäwan jinantin malcaca,

walmin Vasti maynu-maynu tuquish caśhanta licapäcunanpämari puśhachimunanpä nila.

Vastiꞌa rasunpa sumä tuquish-tuquish walmimari cacula.

12 Ñatac caćhaśhan nunancuna mandacüca nishanta willaycuptin walmin Vasti manam liyta munalachu.

Chaymi mandacücäpa śhunꞌunpis sumä-sumäta timpucuyäla.

13 Chaynu sasachacuycuna pasaśhanpi allinnin yaćhänincunactam ayächin imanuy cananpäpis licaycälinanpä.

Paycunap custumrincuna cala mandacüca allichaycunanpä camachicuycunacta yaćhäcunäta tapucuymi.

14 Mandacücäta masta yanapäcunaca capäcula:

Carsena,

Setar,

Admata,

Tarsis,

Meres,

Marsena,

Memucanpis.

Cay anćhish nunacunämari Media nasyunćhu,

Persia nasyunćhu puydïnin capäcula.

Paycunamari mandacücäpa puydï yanapänincunapä ćhulaśha capäcula.

15 Paycunactamá mandacüca nin:

“Capäśha nunäcunawan willacachishäta walmí Vasti mana cäsucamäśhanpïta,

¿imacta lulanapämi camachicuyninchicćhu niyan?”

nil.

16 Niptinmi Memucan,

chay puydïcunäpa mandacücäpa ñawquin nin:

“Walmiqui Vasti,

manam am mandacü Asuerollactachu jalutacüśhunqui,

sinuꞌa lluy puydïcunätapis,

mandacuśhayquićhu jatun lluy malcacunätapis jalutacülunmari.

17 Chay lulaśhanta lluy walmicunaca yaćhälälilꞌa,

wayapanta manañaćh cäsupäcunꞌañachu:

‘Walmin Vasti linanpä mandacü Asuero ayachiptin,

pay manamari lilachu’ nil.

18 Chaynütacćha Persiaćhu,

Mediaćhu puydïcunäpa walmincuna yaćhälälil wayapancunacta paycunapis chaynu nićhaculcanꞌa.

Chayćha pinꞌaycunactawan piñacuycunallacta apamunꞌa.

19 “Chayurá tayta mandacü,

ampä allin captinꞌa juc camachicuyta lluypä julaycamuy.

Chay camachicuy imaypis pampaman muyuchisha mana cananpäri Media nasyunpa,

Persia nasyunpa camachicuynincuna caśhanman isquirbiycuśha cachun.^b

Chay camachicuyćhu walmiqui Vasti ñawpäniquiman imaypis manaña śhamunanpäri nichun.

Aśhwanpa pudirninpä mas allinnin juc walmiña ćhulaycuśha cachun.

20 Cay camachicuy jinantin mandacuśhayquiman ćhäluptinmi lluy walmicuna wacchapis,

rïcupis wayapanta manchacuywan licaycälinꞌa” nil.

21 Chay nishancämi mandacücäpäpis puydïcunäpäpis allin caycula.

Chaymi Memucan niśhantanu lulaycul,

22 jinantin mandaśhan malcacunäman cartacunacta apachila.

Chay apachishanćhümi malcan-malcan imanuy isquirbipäcuśhanmannu,

limayninćhu-cama isquirbisha cala:

“Walmicunaca lluy wasintin wayapacunäpa munayninćhu capäcuchun” nil.