Asuerup walmin cananpämi Esterta aclan
2
Unaypïtaña mandacü Asuerop piñacuynin pasäluptinmi yalpaćhacülun walmin Vasti mana cäsucuśhanpïta,
chaynütac cuntran papilta lulachishanpïtapis.
2 Chaynu cayaptinmi mandacücäpa puydï yanapänincunañatac nipäcula:
“Taytallay,
umricta manalä lisï tuquinnin wamlacunacta ampä ashïshun.
3 Chayurá jatun malcaćhu tacsha malcachantinćhu-cama allinnin wamlacunacta aclaycul,
Susa malcaćhu walmicuna canancäman puśhapämunanpä quiquiqui ćhulaycuy.
Chay wamlacunäñatacmi walmicunäta licaycü chalapacuśhayqui,
sirbïniqui capäśha Hegaipa maquinćhu capäcunꞌa.
Payñatacmari mas tuquish-tuquishllaman muyupäcunanpä yanapaycunꞌa.
4 Chayćha śhunꞌuyquipänu caśhan wamlaca,
walmiqui Vastip pudirnin caycunꞌa” nil.
Chaynu nishanca mandacücäpa allin captinmi chaynüta lulaycula.
5 Canan má,
Susa malcaćhümi Benjamin ayllupi Mardoqueo śhutiyu Juda lädu umri yaćhala.
Paymi Jairpa chulin cala,
Jairpañatac Simei,
Simeipañatac Cis.
6 Cay Cistamari achca nunacunactawan Jerusalenpïta mandacü Nabucodonosor Babiloniaman prïsu puśhala.
Paycunactawanmari Juda lädup mandacünin Coniastapis prïsu puśhala.a
7 Cay Mardoqueopamari Hadasa nishan priman Ester cala.
Paypa taytancuna wañucuptinñatacmi Esterta chulinpäña lical ishpichicula.
Paymari tuquishlla munapaśhlla cacula.
8 Mandacücäpa camachishanca lluyman willacuśha captinmari mandacüca yaćhaśhan Susa malcaman achca wamlacunacta puśhapäcula,
chayćhu Hegai licaycunanpä.
Esterpis mandacücäpa wasinman puśhaśha calmi walmicunäta licaycü Hegaipa maquinman ćhulaycuśha cala.
9 Chayćhu Esterñatacmi Hegaipa śhunꞌunpänu cal allinpä licachicula.
Chaymi juclla yanapaycula mas tuquishllaman muyuycunanpä,
jinaman micuytapis allinnintalä uycula.
Chaynütac Esterta yanapänanpäpis palasyućhu cä anćhish allinnin walmicunactalämi ćhulaycula.
Jinalculmi chay wamlacunaca capäcuśhanćhu allinnin cuartunmanlä ćhulayculapis.
10 Esterꞌa,
Mardoqueo yaćhachishanmannümi mana willaculachu may lädu nï ima caśhta caśhantapis.
11 Mardoqueoñatacmi chay wamlacunaca caśhan patyup chimpanpa muyun-muyun pasaycaćhala Ester imanuy caśhantapis,
imanuypa licaycuśha caśhantapis yaćhaycunan-laycu.
12 Chayćhu cä wamlacunaca mandacücäpa ñawpäninman yaycapäcunanpä,
wata intïrum yanapaycuśha capäcula.
Süta quillam mïrra nishan asaytiwan pasaculcäla,
juc süta quilläćhüñatacmi mishqui aśhnä pirfümicunawan ćhulaculcäla.
Chaynu lulacalcälilñam jucllap-jucllap mandacü Asueroman yaycapäcü cala.
13 Yaycunanpä tücäluptinꞌa wamlacunaca imapis tincüllanman cäcäta ćhulaculculmi mandacücäpa caśhanman lipäcü cala.
14 Tardinpamari palasyuman lipäcü cala.
Wäläluptinñatacmi wamlacunaca juc cuartumanña cutichimuśha capäcula.
Mandacücäman cutila mayanpis śhutinpa ayaśhancällañamari.
Chay wasićhu mandacücäpa uywanacuśhan walmincunacta licaycü capäśha Saasgazmi licaycüca cala.
15 Canan má,
Mardoqueom Esterta ishpichila.
(Estermi Mardoqueop tiyun Abihailpa wamla chulin cala.)
Cay Esterta mandacücäman linanpä tücäluptinñatacmi capäśha Hegai yaćhachishallanmannu yaycuśhanwan lluypa śhunꞌunta suwaycula.
16 Chayꞌa cala mandacü Asuero anćhish wata mandacuyninćhu,
Tebet nishan ćhunca quillaćhümari.
17 Chayćhu mandacücäñatacmi lluy wamlacunapïtapis mas-mas Esterćhu śhunꞌun cacuyan.
Esterpis juc wamlacunäpïta mastamari mandacücäpa śhunꞌunta suwaycula.
Chaymi walmin Vastip pudirnin cananpä Esterpa umanman curunacta ćhulaycula.
18 Jinalculmi Esterpä jatun fistacta lulaycapul palasyunćhu lluy puydïnincunactapis,
nunancunactapis ayachimula.
Jinaman jinantin malcaćhümi jamana muyun cananpä camachila.
Chaynütac cäniyu caśhanmannümi ima rigälucunactapis lluy-lluyman aypuyta ćhapaycula.
Mandacücäta wañuchinanpä limanaculcäśhantam Mardoqueo uyalin
19 Ñatac wamlacunaca palasyup jucnin cuartunman yapa juntüśha cayalcaptinmi palasyup puncunćhu Mardoqueo tacuyäla.
20 Má,
Mardoqueop maquinćhu cayalmi Esterꞌa Mardoqueo nishannülla imaypis cäsucü cala.
Chaymi cananpis,
pay nishannülla Ester mana willaculachu may lädu caśhantapis nï ima caśhta caśhantapis.
21 Chay palasyup puncunćhu Mardoqueo täcuyalmi uyalïlun mandacücäpa capäśha yanapänin Bigtanwan Teres sumä piñäśha:
“Mandacü Asuerocta wañüchishun” nil limanacuyalcäta.
22 Chayta Mardoqueo uyalïlulmi Esterman willaycula.
Esterñatacmi mandacücäman willaycachila:
“Mardoqueomari niycaman wañuchishunayquipä limanaculcäśhanta” nil.
23 Niptinmi tuquicta licaycälil rasunpa caśhanta yaćhälälil chay ishcaynin capäśha wayapacunäta walcächila.
Lluy cay pasaśhancunäta mandacücäpa lulaśhancuna caśhan librunmanmari isquirbiycula.