23
Chaynu Atalia anćhish wataña mandacuyaptinmi,
sasirdüti Joiada callpanchaculcul pilyäcunap puydïnincunacta ayachimula limalicunanpä.
Paycunam capäcula:
Jerohampa chulin Azarias,
Johananpa chulin Ismael,
Obedpa chulin Azarias,
Adaiap chulin Maasias,
Zicrip chulin Elisafatpis.
2 Paycunam jinantin Judaćhu malcacunäman lipäcul levitacunacta Israelćhu ayllup puydïnincunacta lluy juntuycul Jerusalenta lipäcula.
3 Chay Tayta Diospa alawana wasinćhu lluy juntunacuyculmari mandacü Joaswan limalinaculcäla.
Chayćhu Joiadami nin:
“Mandacücäpa chulin cayćhümari cayan.
Paymi Davidpa milaynin caśhan-laycu Tayta Dios limalicuśhanmannu mandacüca.a
4 Canan caynümi lulapäcunqui.
Jamana muyunćhu cä sasirdüticunäwan levitacunämi quimsaman laquiculculmi,
jucniqui parti puncucunacta täpapäcunqui.
5 Jucnin partiñatacmi mandacücäpa palasyunćhu capäcunqui.
Juc partiñatacmi Simintu nishan puncućhu täpapäcunqui.
Jinantin malcäñatacmi Tayta Diospa alawana wasinpa patyunćhu capäcunꞌa.
6 Tayta Diospa alawana wasinmanꞌa lulanancäta lulaycü sasirdüticunällawan levitacunällamá yaycapäcunꞌa.
Chaypa japächäśha capäcuśhanpamari paycunalla yaycapäcunꞌa.
Jinantin malcäñatacmi Tayta Dios camachishanmannu waśhallaćhu licat-licat capäcunꞌa.
7 Mandacücäpa muyülïninćhümi levitacunaca pilyananpä apticälälisha-cama cunćhalapäcunꞌa.
Mayanpis alawana wasiman yaycamuyta munäcätá wañüchinquim.
Mayta liptinpis mandacücäwan cuscam capäcunqui” nil.
8 Chaynu sasirdüti Joiada nishantanüllam levitacunaca,
jinaman Juda lädu lluy nunacunaca lulaycapäcula.
Chaymi puydïcunaca jamana muyunćhu lulayninman yaycücunätapis,
yalamücunätapis juntuycula.
Sasirdüti Joiadamari camachila tücaśhanpi camacälul yalücunäpis wasinta mana liculcänanpä.
9 Jinalculmi Tayta Diospa alawana wasinćhu cä jatun,
tacsha lansacunactawan atajachicucunacta Joiada uycula,
paćhacpa-cama cä puydïnincunaman.
Chaycuna unay mandacü Davidpamari cala.
10 Jinalculmi lansan apticälälisha-camacta mandacücäta täpapäcunanpä mayćhu tücanancäman ćhulaycula alawana wasip allï lädu tunäninpïta aśhta ichü lädu tunänincama.
11 Chaypïtam mandacücäpa chulinta julalcälimul curunacta ćhulälälin,
camachicuytapis mandacunanpä uycälälin.
Jinaman mandacü cananpä Joiadawan chulincunam asayticta umanman jillpuycul japächapäcula:
“¡Mandacüninchic cawsachun!”
nil.
12 Chaynu nunacunaca cushicuypi mandacücäman lüyaśhtin cürriyalcäta Atalia uyalïlulmi,
Tayta Diospa alawana wasinćhu juntaläśhancäman yaycula.
13 Chayćhümi mandacüca altućhub śhäcuyäta licälun.
Puydïcunäwan curnitilla tucäcunäñatacmi mandacücäta cunćhalayalcäña.
Lluy nunacunäñatacmi cushicuypi curnitillacta tucayalcäña.
Chaynüta Atalia licälulmi,
imanaytapis mana atipal müdananta laćhyaśhtin apalcaćhacuyan:
“¡Ipanchälälimanmi!
¡Ipanchälälimanmi!”
nil.
14 Chayćhümi tapäcunäpa puydïnincunacta sasirdüti Joiada nin:
“Alawana wasipi waśhaman Ataliacta julapäcuy.
Mayanpis śhalcücätá ispädawan wañuchiy” nil.
Sasirdütica chaynu camachila Tayta Diospa alawana wasinćhu mana wañuchinanpämari.
15 Chaymi Ataliacta chalalcälil mandacücäpa wasinćhu cä Cawallucuna Yaycunan puncuman puśhapäcula.
Chayćhümi wañülächila.
16 Chaypïtam Joiada limalicachila,
Tayta Dios munaśhannu mandacücäwan lluy malcaca cawsapäcunanpä.
17 Jinalculmi Baalpa alawana wasinman lluy-lluy lilcälil pampaman muyülächin.
Uycuna patactapis,
taytachancunactapis amshülälinmá.
Uycuna patacpa puntancunaćhümari Baalpa sasirdütin Matan nishantapis muꞌülälin.
18 Chaypïtam Joiada ćhuläla Tayta Diospa alawana wasinta täpapäcunanpä sasirdüticunacta,
levitacunacta.
Mandacü Davidlämi ćhulaycula Moises camachishanmannu Tayta Diospa alawana wasinćhu sasirdüticunaca,
levitacunaca cañaywan uycälinanpä,
jinaman cushicuywan taquishtin lulapäcunanpäpis.
19 Chaynütacmi Tayta Diospa alawana wasinman anla cayalcal mayanpis mana yaycapäcunanpä puncu täpäcunacta ćhulala.
20 Jinalculmi puydïcunäwan,
yaśhannincunawan,
malcap caminaycücunäwan,
jinantin malcäwan mandacücäta puśhapäcula,
Tayta Diospa alawana wasinpïta palasyucama.
Janay puncunpa yaycaycachilmi mandacücäta täcunanman taycaycachipäcula.
21 Chayćhümari jinantin malcaca cushiculcäla.
Ñatac Ataliactá ispädawan wañuchishanpïtam malcaca jawcaña caycälila.