Juda lädućhu Ocoziasmi mandacun
22
Joram wañucuptinmi śhullca chulin Ocoziastaña,
mandacüpa Jerusalen nunacunaca ćhulälälila.
Mayur chulincunactañatacmari Arabia lädu nunacunaca yaycaycälil lluy wañülächila.
Chaymari śhullca chulin Ocoziastaña,
Juda lädup mandacüninpä ćhulaśha cala.
2 Ocoziasꞌa ishcay ćhunca ishcayniyua (22) watanta liyalmi mandacuyta allaycula.
Paymi juc watalla Jerusalenpïta mandacula.
Mamanñatacmi Israel lädup mandacünin Omrip wamla chulin Atalia cala.
3 Ocozias mana allinta lulananpä maman umachaptinmari,
Acab ayllup lulaynincunacta atichï cala.
4 Tayta Diospa ñawquin Acab ayllu mana allincunacta lulaśhannümi paypis lulala.
Papänin wañucuptinmari Acab ayllucunäña limapapäcula mana allinta lulananpä.
5 Chaymari Ocozias,
Israel lädup mandacünin Acabpa chulin Joramwan jucllachanacuycul lipäcula,
Galaad lädu Ramot malcaman.
Chayćhümi Sirio lädup mandacünin Hazaelwan pilyapämunan cala.
Ñatac chayćhu Sirio läducunämi Joramta dañädülälila.
6 Jinaptinmi Jezreel malcaman cutimula,
chay Ramotćhu supayapachishan dañäduncunacta jampichicü.
Chaynu Jezreelćhu,
Acabpa chulin Joram ishyayaptinmi,
Jorampa chulin Ocozias watucuycü lila.
Paymari Juda lädup mandacünin cala.
Ocoziastam Jehu wañuchin
7 Tayta Diospa munayninñatacmi cala,
Joramta watucü lil Ocozias wañunan.
Chayćhu Ocozias ćhaycullalmi,
Joramwan cusca Nimsip chulin Jehupa cuntran yalapäcula.
Jehutam Tayta Dios japächaycula Acabpa aylluncunacta camacaycünanpä.
8 Chaynu Acabpa lluy milaynincunacta Jehu wañuyächilmi,
Juda lädup puydïnincunawan,
mandacü Ocoziaspa sirbïnin caśhtancunawan tincülul,
paycunactapis wañülächila.
9 Jinaman Samariaćhu pacacüśha cä mandacü Ocoziastapis ashichimulam.
Chaymi chalalcälimul Jehuman puśhapäcuptin wañülälichila.
Ñatac pampapäcula:
“Llapan śhunꞌunwan Tayta Diosta ashiycü Josafatpa willcanmi” nilmi.
Chaypïta Ocoziaspa ayllunćhu manañam mayanpis callpayü calachu mandacü cananpä.
Juda lädup mandacünin Ataliactam wañuchin
10 Maman Atalia wawin Ocozias wañucuśhanta yaćhälulmi,
Juda lädu mandacücäpa lluy milaynincunacta camacaycächin.
11 Chaynu Atalia wañuchicuyaptinmi,
mandacü Jorampa wamla chulin Josabet pacälun,
Ocoziaspa chulin Joasta.
Wawi uywänin walmictawanmari puñunan cuartuman pacälun.
Chaynüpamari manaña wañuchishachu cala.
Josabetmari cala,
Ocoziaspa panin,
sasirdüti Joiadap walmin.
12 Chaynu pacäśha Tayta Diospa alawana wasinćhu süta watam cayäla.
Ataliañatacmi Juda lädućhu mandacuyäla.