Sunem lädu walmictam lluy cänincunacta cutiycachin
8
Má,
chay cawsachimuśhana walaśhpa mamantam Eliseo nin:
“Cay nasyunman Tayta Diosmi caćhamunꞌa anćhish wata micuy wana cananpä.
Chaymi aylluyquiwan yaćhamü maymanpis liculcänayqui” nil.
2 Chay willacü Eliseo nishanmannümi walmica liculcäla Filisteo läduman anćhish wata chayćhu yaćhamü.
3 Anćhish wata pasäluptinñatacmi chay walmica Filisteo lädupi malcanta cutimula.
Chayćhümi wasinta,
ćhaclanta cutiycachinanpä mandacücäman mañacü lila.
4 Mandacücäñatacmi willacü Eliseop uywaynin Giezicta niyäla:
“Eliseo lluy milagrucunacta lulaśhanta willaycamay” nil.
5 Chaymi juc walmip wawinta imanuypa cawsachimuśhantapis willaycuyäla.
Chayćhümi walmica wasinta,
ćhaclanta cutiycachinanpä mandacücäman mañacü ćhälun.
Chayćhümi Giezi nin:
“Mandacü taytallay,
cay walmip wawintam Eliseo śhalcachimula” nil.
6 Chayćhu mandacüca walmicta tapuptinmi lluyta willapaycula.
Chaymi yanapäninta mandacüca nin.
“Ima cänincunactapis lluy cutiycachipuy.
Licuśhanpïta canancama ćhaclancunapi ayca cusichaśhancunactapis cutiycachipuy” nil.
Ben-adadpa pudirninmi Hazael mandacun
7 Chaypïtam Damasco malcaman Eliseo licun.
Ñatac Siriap mandacünin Ben-adadmi ishyayäña.
Chaymi Tayta Diospa willacünin ćhämuśhanta willaycälila.
8 Jinaptinmi Hazaelta mandacüca nin:
“Mas allinnincunacta apaculcul Diospa willacüninman liy.
Ćhaycul cay ishyaypi allinyanäta ütac mana allinyanätapis Tayta Diostari tapuycuchun” nil.
9 Niptinmi Eliseoman tawa ćhunca (40) camïllucunaman Damasco malcaćhu allinnin cäcunacta apaculcul Hazael licula.
Eliseoman ćhayculmi puntanman śhaycuycul nin:
“Siriap mandacünin Ben-adad taytantanu amta licaśhüniquim tapucuśhunqui ishyayninpi allinyananta ütac mana allinyanantapis” nil.
10 Niptinmi Eliseo:
“Willaycamuy,
chay ishyayninpi allinyaytá allinyanꞌaćh.
Ñatac Tayta Diosmi:
‘Wañucunꞌañam’ niman” nin.
11 Nilcul Hazaelta pinꞌacünancama Tayta Diospa nunan licapäcuyäśhanpïmi waꞌayta allacuycun.
12 Chaymi Hazael nin:
“Taytay,
¿imapïmi waꞌayanqui?”
nil.
Niptinmi Eliseo:
“Tuquictam yaćhayá Israel läducunäta maynu-maynüta camacaycunayquitapis.
Murälläśha malcancunactamari cañaycülunqui,
müsuncunactam ispädawan camacaycülunqui,
urucunätapisb uchuy-uchuyllactam lulälunqui,
patayu walmicunätapis patancunactam lluy lliquïlunqui” nin.
13 Niptinmi Hazael:
“Allꞌunülla cä nunallayqui ¿imanuypatá chaynu-chaynütalä lulälläman?”
nin.
Niptinmi Eliseo nin:
“Siria nasyunpa mandacünin canayquipämi Tayta Dios licaycachiman” nil.c
14 Chaypïta Hazael cuticulmi mandacüninman lila.
Chayćhümi mandacüca nin:
“¿Imanishunquim Eliseo?”
nil.
Niptinmi Hazael:
“Allinyanꞌam,
nimanmi” nin.
15 Chay walantinñatacmi yacuman jirgacta chapuycul mandacünin Ben-adadpa cäranman chapälun awnanancama.
Chaynüpam Hazael pudirninña mandacü cala.
Juda lädućhu Jorammi mandacun
16 Canan má,
Acabpa chulin Joram Israel lädućhu picha wataña mandacuyaptinmi Josafatpa chulin Joram Juda lädućhu mandacuyta allaycula.
17 Quimsa ćhunca ishcayniyu (32) watanta liyalmi mandacuyta allaycula.
Pusä watamari Jerusalenpi Joram mandacula.
18 Ñatac payꞌa Israelpa mandacünincuna lulapäcuśhannu,
jinaman Acab ayllu mana allin lulapäcuśhannümari lulala.
Acabpa jucnin wamla chulinwan casaracülulmari Tayta Diospa ñawquin mana allincunallacta lulala.
19 Chaynu cayaptinpis nunan David-laycum Juda läducta nï camacaycülachu.
Paytamari limalicula:
“Lluy milayniquipis wiñaypämi acchipäcunꞌa” nil.d
20 Canan má,
Joram mandacuyaptinmi Edom läducunaca Judae lädup cuntran śhalcacalcälil quiquinpa mandacüninta ćhulacälälin.
21 Chaymi Joram pilyananpä cä lluy carritancunawan Zair läduman licun.
Chayćhümi pilyänincunap puydïnincunawan chay tuta śhalcacalcälil,
cunćhacaycälil Edom nunacunäta camacaycuyta allacaycälin.
Jorampa pilyänincunañatacmi chucllanman-cama lluy ayiculcan.
22 Chaypunpïmi Edom läducunaca Juda lädup cuntran canancama cayalcan.
Chay timputacmi Libna malcapis Juda lädup cuntran cala.
23 Ñatac Jorampa mandacuyninćhu lluy lulaśhancuna Juda lädu mandacünincunap isquirbishan librunćhümari cayan.
24 Pay wañucuptinmi awquilluncuna pampaläśhan Davidpa Malcan nishanman pampälälila.
Paypa pudirnin chulin Ocoziasmi mandacü cala.
Juda lädućhu Ocoziasmi mandacun
25 Canan má,
Acabpa chulin Joram ćhunca ishcayniyu (12) wataña Israel lädućhu mandacü cayaptinmi Jorampa chulin Ocozias Juda lädućhu mandacuyta allaycula.
26 Ishcay ćhunca ishcayniyu (22) watanta liyalmi mandacuyta allaycula.
Paymi juc watalla Jerusalenpïta mandacula.
Mamanñatacmi Israel lädup mandacünin Omrip wamla chulin Atalia cala.
27 Cay Ocoziasmi Acabpa maśhan cayninwan paycunap mana allin lulaynincunacta atichila.
Chaynüpam Tayta Diospa ñawpäninćhu mana allincunallacta lulala.
28 Acabpa chulin Joramwanmi Ocozias lipäcula Galaad lädu Ramot malcaman.
Chayćhümi Sirio läducunap mandacünin Hazaelwan pilyapämunan cala.
Ñatac chayćhu Sirio läducunämi Joramta supayapächila.
29 Chaymi mandacü Joram,
Jezreel malcaman cuticula Sirio läducuna Ramotćhu cä mandacünin Hazael supayapachishan dañäduncunacta jampichicü.
Chaynu Jezreelćhu Acabpa chulin Joram ishyayaptinmi Jorampa chulin Ocozias watucuycü lila.
Paymari Juda lädup mandacünin cala.