2 Chayćhümi mandacücäpa yanapänin nin:

“Ampá Tayta Dios janay pachäpa bintananta quićhaycuptinpis chay nishayquinuꞌa lulacacunmanchun imatá” nil.

Niptinmi Eliseo:

“Quiquiquim ñawiquiwan licanqui.

Ñatac manamá micunquichu” nin.

3 Chay muyunmi malcap yaycunanćhu lipra ishyaywan cä tawa nunacuna cayalcäña.

Paycunam ninacücuyalcan:

“¿Imapïmi cayćhu wañuycällactaña alcayanchic?

4 Malca luliman yayculꞌa micuy wanalla cayaptinmari wañucuśhun.

Cayllaćhu quïdaculpis wañucuśhuntacmari.

Aśhwanpa Sirio läducuna caśhancäman licuśhun.

Paycuna llaquipaycamaptinchicꞌa cawsaśhunćha;

wañüchimaptinchicꞌa wañucuśhuntacćha” nil.

5 Chaynu ninaculculmi tutalpüluptin Sirio läducuna caśhancäman liculcan.

Chaypa puncunman ćhäpäcunanpäñatacmi mayanpis mana cañächu.

6 Quiquin Tayta Diosmari Sirio läducunäta uyalïchiña achca-achca sillädacuna,

pilyupä carritacuna suynaśhtin śhamuśhanta.

Chaymi quiquin-pula ninacücuyalcan:

“Israel lädup mandacüninćha mincapacämun Het,

Egipto läducunap mandacünincunacta camacaycämänanchicpä” nil.

7 Chaymi tutalpüluptinꞌa jamaculcäśhanta,

cawalluncunacta,

aśhnuncunacta,

lluy imantapis jinallacta caćhaycul cawsayllantaña ayichipäcula.

8 Ñatac lipra ishyaywan cä nunacunämi chay Sirio läducuna jamapäcuśhanpa manyanman ćhälul jucnin chucllaman yaycälälin.

Chayćhümi upyacaycälin,

micacaycälin,

jinaman illaycunactapis,

ürucunactapis,

müdanacunactapis apacalcälil pacälälimun.

Chaypïta cutilcamul jucnin chucllaman yaycuycul chaypïtapis lluyta apaculculmi pacälälimun.

9 Jinalculmi ninaculcan:

“Mana allintam lulayanchic.

Canan muyun allin willacuyta willaycunanchic cayaptinpis yaꞌanchicñatac upälla cayanchic.

Wälacama alcaptinchicꞌa juchayümi caśhun.

Aśhwanpa canan-pacha mandacü caśhanman lilcul willaycamuśhun” nil.

10 Ninaculculmi malcaman lilcälil täpäcäta ayalcälimul nipäcun:

“Sirio läducunap jamapäcuśhanman lipäcuptïmi chayćhu manaña mayanpis cañächu,

nï ima jamalcuśhallantapis uyalipäcüchu.

Cawallucunawan aśhnucunallañam watalayalcäña.

Jinaman chucllancunapis jina caćhaycuśhannüllam cayalcäña” nil.

11 Niptinmi täpäca apalcaćhaypa willacuptin palasyu lulićhu cäcunäman ćhälun.

12 Chaymi mandacüca tutapalayaptinpis śhalcuculcul puydï yanapänincunacta nin:

“Sirio läducunaca ima lulayta munamäśhanchictapis canan niycälishayqui.

Micuy wanayta pasaśhanchicta yaćhalmari jamapäcuśhanpi pacacamü liculcan.

Chaymi yalüluptinchic cawsayniyüta lluy chalalcul malcanchicman yaycacaycamuyta pinsayalcan” nil.

13 Niptinmi jucnin yanapänin nin:

“Cayćhu picha cawallucunällaña cäcäwan waquinnin nunacunacta caćhaśhun,

imanuy caśhantapis yaćhanapä.

Cayćhu lluy Israel läducunänüllaćh wañulpis wañunꞌa” nil.

14 Chaymi Sirio läducuna jamapäcuśhanman ishcay carritacta cawalluntin-camacta mandacüca caćhälun ima pasaśhantapis yaćhamunanpä.

15 Chaynu lipäculmi Jordan mayucama ćhäpäcula.

Chay Sirio läducunaca mana-mana ayipäcuśhanćhümi intiru caminućhu müdanancunactawan imancunactapis jitalayäta talïlälin.

Chaymi cutilcälimul mandacücäta willaycapäcula.

16 Jinaptinmi malcaca yalalcälil Sirio läducunaca jamapäcuśhanpïta lluy imantapis waycälälimula.

Chaynümi Tayta Diospa nishanmannu quimsa quïlu allinnin fïnu arinapis ütac süta quïlu siwäpis juc illayllawan lantinapä cala.

17 Chay umrunman iscataycuśhan yanapänin nunätañatacmi mandacüca niycula malcap puncunta täpananpä.

Ñatac nunacunämi alli-alli capäcul chay yaycunaćhu jalülälin wañunancama.

Chaynüpamari mandacücäwan tincuśhan Eliseo nishannu wañüla.

18 Awari,

caycuna lluy pasala mandacücäman Tayta Diospa willacünin Eliseo:

“Wala cay üranümi Samariap yaycunanćhu juc illayllawan lantipäcunquiman quimsa quïlu allinnin fïnu arinacta ütac süta quïlu siwäta” nil nishannümari.

19 Rasunpa chayćhümari mandacücäpa yanapänin caynu nin:

“Ampá Tayta Dios janay pachäpa bintananta quićhaycuptinpis chay nishayquinuꞌa lulacacunmanchu imatá” nil.

Chaynu niptinpis Eliseo chayćhu nilamari:

“Quiquiquim ñawiquiwan licanqui.

Ñatac manamá micunquichu” nil.

20 Chay nishannüllamari rasunpa lluy lulacacüla.

Malcap yaycunanćhu nunacunämari jalülälila wañunancama.