4 Chaypi unaytam Tayta Diospa alawana wasinta allichachiyta Joas allaycuśha nila.

5 Chaymi sasirdüticunätawan levitacunäta juntuycul nin:

“Tayta Diospa alawana wasinta watan-watan allichachinapä,

jinantin Juda lädup malcancunaman wayra lipäcul lluy Israel nunacunäpïta canan-pacha illayta juntupämuy” nil.

Niptinpis levitacunacá manam jucllachu pasapäcula.

6 Chaymi puydï sasirdüti Joiadacta ayalcachimul mandacüca nin:

“¿Imapïmi Juda lädupi,

Jerusalenpi levitacunaca alcabälacunäta juntupämunanpä mana jicutalanquichu?

Tayta Diospa uyway nunan Moiseswan lluy israelcunämari limalicuśhan carpapä juntupäcunanpä nipäcula” nil.^a

7 Má,

chaynu cayäla mana allin juyu Atalia,

lluy wawincunawan Tayta Diospa alawana wasinta waycälälishanpïmi.

Jinaman Tayta Diosllapä japächaśha lluy cäcunätapis taytachancunaman uycälinanpä lluy apaculcaptinmari.

8 Chaymi illay juntuna cäjacta mandacüca lulalcachil,

Tayta Diospa alawana wasinpa puncunman ćhulachila.

9 Jinalculmi Tayta Diospa nunan Moises,

chunyäcäćhu cayalcaptin,

israelcunäman camachishancäta apapämunanpa jinantin Juda läduman Jerusalenman willacü caćhala.

10 Chaymi jinantin malcaca lluy puydïnincunawan cushicuywan apapämul cäjapis juntanancama uycapäcula.

11 Chay cäjactam levitacunaca muyun-muyun mandacücäpa yanapänincunaman apapäcula licaycälinanpä.

Achca illay captinñatacmi mandacücäpa isquirbïninwan puydï sasirdüti ćhulaśhan nunaca,

illaycäta tallipäcü capäcula.

Jinalculmi caśhan ćhulalänanman cäjacta cutichipäcula.

Chaynu muyun-muyun lulapäculmari achca illayta juntupäcula.

12 Chaypïtam mandacüca Joiadawan uycapäcula Tayta Diospa alawana wasinta allichäcunäman.

Paycunañatacmi lumi labräcunacta,

carpintïrucunacta,

jïrru tacäcunacta,

brunsiwan lulä yaćhäcunactapis alawana wasicta allichachinanpä mincala.

13 Chaynümi allichayta camacapäcunancama lluy lulapäcula.

Chaymi punta caśhantanülla Tayta Diospa alawana wasinta allichälälila.

14 Camacalculñatacmi illay puchücäta mandacücäman,

Joiadaman uycapäcula.

Paycunañatacmi alawana wasićhu lluy sirbichicunapä cäcunacta lulachila:

cañaywan uycunacta,

sirbichicunapä cäcunacta,

wishlacunacta,

ürupi illaypi bäsucunactapis.

Joiada cawsaśhancamá Tayta Diospa alawana wasinćhu muyun-muyunmari cañaywan uycapäcü capäcula.

15 Ñatac Joiada yaśhayälulmi paćhac quimsa ćhunca (130) watanta liyal wañucula.

16 Pay Israelćhu Tayta Diospa jinaman alawana wasintapis allinta lulaycuśhanpïmi mandacücuna pampaläśhan Davidpa Malcan nishanman pampaśha cala.

17 Joiada wañucuptinñam Juda lädup puydïnincuna śhapämul,

mandacücäta altuman julaycälila.

Chayćhümi mana allin umachäśhancunacta mandacüca uyaliycula.

18 Chaynüpam awquilluncunap Tayta Diosninta caćhaycälil,

mamacha Aseractawan juc taytachancunactaña alawapäcula.

Chaynu Juda lädu,

Jerusalen juchacta lulapäcuśhanpïtam Tayta Dios paycunapä piñacüla.

19 Chaynu cayalpis payman cuticalcämunanpämi Tayta Dios willacünincunawan willacachimula.

Ñatac paycuná manamari uyalïtuculcälachu.

20 Jinaptinmi sasirdüti Joiadapa chulin Zacarias,

Tayta Diospa Ispiritunpa munayninćhu licalïla.

Jinalmi altunninman ishpiculcul jinantin malcäta nin:

“Tayta Diosmi nin:

‘¿Imapïmá Tayta Diospa camachicuynincunacta jalutacälälinqui?

¿Imapïtá quiquillayquicuna mana allinniquita ashicälälinqui?

Caćhaycälälimäśhayquipïmari yaꞌapis caćhaycälälishayqui’ ” nil.^b

21 Niptin paycunañatacmi Zacariaspa cuntran śhalcalcälil,

mandacüca awniycuptin Tayta Diospa alawana wasip patyunćhu,

tamshaywan wañülächila.

22 Ñatac Zacariaspa taytan Joiada mandacü Joasta llaquipayculam.

Chaytapis Joas unꞌayculmi Zacariasta wañüchinanpä nila.

Chaynu wañuyächiptinmi Zacarias nila:

“Cayta quiquin Tayta Dios licayculmi tincüniquiman cäraycuśhunqui” nil.

23 Juc watapïtañatacmi Siria lädup pilyänincuna Joaspa cuntran lipäcul,

Juda läduman,

Jerusalenman lluy yaycälälila.

Chay malcacunap puydïnincunacta wañulcachilmi,

lluy waycapäcuśhanta Damasco malcap mandacüninman apachipäcula.

24 Masqui ashchaylla Sirio lädu pilyäcunaca cayalcaptinpis,

paycunap maquinmanmi achca-achca Juda läducunäta Tayta Dios ćhulaycula.

Caynu lulaycula awquilluncunap Tayta Diosninta caćhaycälälishanpïmari.

Chaynüpamari tincüninman Joasta mućhuycachila.

25 Chaynu Joasta sumä dañädüśhacta caćhaycul Sirio läducunaca liculcaptinmi,

yanapäcunaca paypa cuntran limanacälälin.

Sasirdüti Joiadapa chulintamari Joas wañüchila.

Chay lulaśhanpi cutichicuyninwanmi Joas cämanćhu cayäta wañülächila.

Jinaptin Davidpa Malcanman pampapäculpis manamá mandacücuna pampaläśhancämanchu pampaśha cala.

26 Joasta wañuchïcunämi capäcula:

Amon lädu Simeat walmip wawin Zabad,

Moab lädu Simrit walmip wawin Jozabadpis.

27 Ñatac Joaspa chulincunapïta,

achca-achca alcabälacunacta mañachishanpïta,

Tayta Diospa alawana wasinta allichachishanpïtapis mandacücunäpa isquirbishan librunćhümari cayan.

Paypa pudirninꞌa chulin Amasiasñamá mandacüca cala.