Raba malcactam David llallin
20
Juc wata pasäluptinñatacmi mandacücunaca pilyuman yalunan timpućhu,
lluy pilyänincunawan Joab lipäcul,
Amon läducunäpa malcancunacta camacaycüla.
Raba malcactapis cunćhaycälilmi lluy camacaycüla.
Davidñatacmi ichá Jerusalenllaćhu cayäla.a
2 Chaypïtam Raba malcaman David lilcul,
Amon läducunap mandacüninpa ürupi curunan ćhulacuśhancätapis quitäla.
Chaymi quimsa ćhunca quimsayu (33) quïlucta llasaña;
sumä tuqui-cama ćhaniyu lumicunäwantacmi adurnäśhapis cacuña.
Chaytam Davidman ćhulälälila.
Chaynütacmi chay malcapïta imaymana ćhaniyünincunactapis David apacula.
3 Chayćhu puchü nunacunätapis jululculmari,
munäta mana munäta lulachila:
sirruchucunawan,
picucunawan,
ächacunawanpis.
Chaynütam lluy llallishan Amon läducunäwan lulaycula.
Chaypïtam lluy pilyä nunancunawan Jerusalenta David cutipäcula.
Callwan nunacunactam llallin
4 Chaypïtam Gezer lädućhu Filisteo läducunäwan yapa pilyapäcula.
Chayćhümi Husha lädu Sibecai wañüchila,
callwan caśhta Sipai nunacta.
Chaynüpamari Filisteo läducunäta maquinćhu cachipäcula.
5 Chaypïta yapa pilyapäculmi Jairpa chulin Elhanan wañüchila Gat lädu Goliatpa wawꞌi-caśhan Lahmicta.
Paypa lansanmi jatu-jatun caculläla.b
6 Chaypïta Gat malcaćhu yapam pilyapäcula.
Chayćhümi jatu-jatun callwan nuna cacula,
maquinćhüpis ćhaquinćhüpis süta dïduyü-cama;
lluy cala ishcay ćhunca tawayu (24) dïdum.
Paypis callwan caśhta nunamari cacula.
7 Paymi Israel pilyäcunäta jalutacucuyäla.
Jinayätam Davidpa wawꞌi-caśhan Simeap chulin Jonatan wañüchila.
8 Paycunamari Gat lädu callwanpa milaynincuna capäcula.
Paycunactamá David pilyänincunawan wañüchila.