2 (Má,

paycuna manamá Israel caśhtachu capäcula,

sinuꞌa Amhor läducunap puchüninmi.

Paycunawan jawcalla cawsapäcunanpämi israelcunaca limalinaculcäla.^a

Ñatac Juda läductawan Israel läducunäta ama-pacha nilmi Gabaon läducunäta Saul camacaycuyta ćhapala.)

Chayćhümi Gabaon läducunäta mandacü David ayächimul nin:

3 “¿Imactam śhuꞌuyquita llampuchaycunäpä lulaycüman?

¿Mana allin lulaśhuśhayquipïta imanuypam allichaycuchwan Tayta Diospa malcanta allinpä licaycälinayquipä?”

nil.

4 Niptinmi Gabaon läducunaca:

“Saulpa ayllunpa illaynincunapis manam imapis ucalcämanchu.

Manatacmi israelćhu jucllapis wañunantá munapäcüchu” nin.

Niptinmi:

“Chayurá amcuna nipämäśhayquitam lulaycuśhä” nin.

5 Niptinmi Gabaon läducunaca:

“Saulmi chincachiyta munapämäla.

Camacayta munayninwanmari jinantin Israelpi alapacuyta ćhapamäla.

6 Chayurá Saulpa milayninpïta anćhish wayapacunacta upämay.

Chayćha paycunacta Saulpa Gabaa nishan ulꞌup puntanćhu,

Tayta Diospa ñawpäninćhu siꞌilälishä” nil.

Niptinmi mandacü David:

“Uycapäcuśhayquim” nin.

7 Ñatac Saulpa willcan,

Jonatanpa chulin Mefi-bosetta manam Gabaon läducunäpa maquinman uyculachu.

Chaynu pampachaycula Tayta Diospa ñawpäninćhu Jonatanwan David limalinaculcäśhanpam.^b

8 Ñatac Ajapa chulin Rizpap ishcay wawintam ichá Armonictawan Mefi-bosetta uycula.

Chaynütacmi Micalpa picha wawincunactapis uycula.

Paycuna Saulpa willcancunam capäcula.

Micalmi^c Adrielpa walmin cala;

Adrielꞌa Mehola lädu Barzilaipa chulinmi cala.

9 Paycunacta Gabaon läducunäpa maquinman David uycüluptinmi Tayta Diospa ñawquin ulꞌućhu siꞌilälin.

Chay anćhishnintinmi siwä lutuy allaycuycäćhu wañuchisha capäcula.

10 Chaymi Ajapa chulin Rizpa llaquicuypïta shicacü müdanawan müdaculcul aꞌaman iscatacuycula.

Cayćhu cayäla siwä cusicha allaycuśhanpïta aśhta tamya timpu ćhämunancamam.

Muyunpa ima pälïcunapis mana micunanpä,

tutanpapis aycha micü uywacuna mana micunanpämari täpayäla.

11 Chaynu Saulpa uywanacuśhan walmin,

Ajapa chulin Rizpa lulaycuśhantam Davidman willaycapäcula.

12 Má,

Filisteo läducunaca Gilboaćhu Saulta wañulcachil Bet-san malcap läsanmanmi walcälälila.

Chaynu walcalayaptinmi Galaadćhu cä Jabes malcayu nunacunaca pacallap suwalcul apaculcäla.

Chaymanmi David lila Saulpa,

Jonatanpa tulluncunacta apamü.^d

13 Chayćhümi David apachila Saulpa,

Jonatanpa tulluncunacta,

anćhish nuna siꞌisha cäcunäwan cuscacta.

14 Chaymi Benjamin ayllućhu cä,

Zela malcaćhu cä papänin Cispa sipultüranman Saultawan chulin Jonatanpa tulluncunacta pampälälila.

Chaynu mandacüca nishanmannümi lluy lulaycuśha cala.

Chaypïtam malcap mañacuyninta Tayta Dios uyaliycula.

15 Chaypïta Filisteo läducunaca israelcunäwan pilyapäcunanpämi yapa allacaycälin.

Chaymi Filisteo läducunäwan pilyä David lluy nunancunawan lipäcula.

Chayćhu David illacäśha cayaptinmi,

16 callwan caśhta Isbi-benob nuna wañuchiyta munala.

Paypa lansanpa brunsipi cä puntanmi quimsa ćhunca (30) quïlu masninlä llasala;

wiyawninćhüpis muśhü ispädantam apala.

17 Ñatac Sarviap chulin Abisaimi yanapä licalilcamul Filisteo läducta wañüchin.

Chaypïtam Davidpa pilyänincuna limaliculcäla:

“Cananpi puntaman yaꞌacunawan pilyuman manañam imaypis yalunquiñachu.

Yanꞌalmi jucnin wañüchishuptiqui mana acchiyu Israel quïdacunman” nil.

18 Chay unaypïtañam Gob lädućhu Filisteo läducunäwan yapa pilyapäcula.

Chayćhümi Husha lädu Sibecai wañüchila callwan Filisteo Saf nunacta.

19 Chaypïta Gob lädućhu yapa pilyapäculmi Belen malcayu Jaare-oregimpa chulin Elhanan wañüchila Gat lädu Goliatta.^e

Paypa lansanmi jatu-jatun tita caculläla awacup pitwicunnu.

20 Chaypïta Gat malcaćhu yapam pilyapäcula.

Chayćhümi jatu-jatun callwan nuna cacula,

maquinćhüpis ćhaquinćhüpis süta dïduyü-cama;

lluy cala ishcay ćhunca tawayu (24) dïdum.

Paypis callwan caśhta nunamari cacula.

21 Paymi Israel pilyäcunäta jalutacucuyäla.

Jinayätam Davidpa wawꞌi-caśhan Simeap chulin Jonatan wañüchila.

22 Chay tawa callwan nunacunaca Gat lädu Rafapa milaynincunam capäcula.

Paycunactamá David pilyänincunawan wañüchila.