Jinalmi David willacünincunactapis caćhälun papänin wañucuśhanpi llaquicuyninćhu Hanunta cunsuylaycunanpä.

Chay Davidpa willacünincuna Amon läduman ćhäluptinmi,

3 chay malcap puydï yanapänincuna Hanunta nicuyalcan:

“Mandacü taytallay,

¿papäniquita cuyaśhan-laycuchun,

jinaman altuman juluycuyninwanchun David cay willacünincunacta caćhayämunman imatá?

¿Aśhwanpa manachun malcanchicta camacaycünanpä licänin caćhayämun imatá?”

nil.

4 Chaynu nipäcuptinmi Davidpa willacünincunacta Hanun chalächin.

Jinalculmi śhaplanta ćhawpipi-cama cuchüchin;

müdanantapis uticuncamam laćhyächin.

Jinalculmi liculcänanpä caćhaycülun.

5 Jinaptinmi Davidpa nunancuna sumä pinꞌacüśha cuticalcämun.

Chayta mandacü David yaćhälulmi willacünincunacta caćhälun:

“Jerico malcällaćhülä quïdacalcämuy śhaplayquicuna wiñamunancama.

Chaypïlämi cutipämunqui” nil.

6 Chaynu Davidwan ćhïnichicälälishantam Hanunwan lluy Amon läducunaca yaćhälälin.

Jinalmi pilyananpä carritacunactawan cawallucunacta lïtananpä Mesopotamiaćhu,

Maacaćhu,

Soba lädućhu cä Sirio läducunäman quimsa ćhunca quimsayu walanga (33,000) quïlu illayta apachila.

7 Chaynüpam lïtala quimsa ćhunca ishcayniyu walanga (32,000) carritancunacta.

Jinaman mandacü Maacactapis lluy pilyänintintam mincacula.

Paycuna śhapämulmari Medeba malcap chimpanćhu pilyananpä alcapäcula.

Jinaman Amon läducunäpis malcancunapi śhapämulmi jucllachaculcäla pilyayta allaycapäcunanpä.

8 Chayta David yaćhälulmi Joabtawan alli-cama lluy pilyänincunacta caćhäla.

9 Amon läducunäñatacmi pilyapäcunanpä malcanpa yaycunanćhu lluy achälälin.^a

Yanapänanpä śhamü mandacücunäpis pampäćhümi listu alcayalcäla.

10 Chaynu ipanpapis puntanpapis lluy cunćhäśha caśhanta Joab licälulmi jinantin Israelpi allinnin-cama pilyäta aclälun,

Sirio läducunäwan pilyayta allacuycunanpä.

11 Parti pilyäcunätañatacmi wawꞌi-caśhan Abisaipa maquinman ćhuläla,

Amon läducunäwan pilyapäcunanpä.

12 Jinalculmi wawꞌi-caśhan Abisaita nin:

“Sirio läducunaca llallicayalcämaptinꞌa libraycamänïmi śhamunqui.

Chaynütac Amon läducunaca amtapis llallicuyalcäśhuptiquiꞌa libraycüniquim yaꞌa śhamuśhä.

13 Chayurá ¡callpanchacuy!

¡Tayta Dios umäśhanchic nasyunnin-laycu,

malcanchic-laycuꞌari sumäpa pilyaśhun!

Quiquin Tayta Diosꞌari munaśhanmannu lulaycuchun” nil.

14 Nilcul pilyananpä lluy pilyänincunawan Joab aśhucuycuyaptinmi Sirio läducunaca ayiculcan.

15 Chaynu Sirio läducunaca ayipäcuśhanta licalmi,

Amon läducunäpis Joabpa wawꞌi-caśhan Abisaita caćhaycul malcanman ayiculcan.

Chaymi Joab pilyucta caćhayculña Jerusalenta cuticalcämun.

16 Chaynu Israelwan llallichiculculmi Sirio läducunaca willacünincunawan ayachimula,

Eufrates mayup chimpanćhu cä Sirio lädu-masincunactapis.

Paycunam Hadad-ezerpa puydï yanapänin Sofacpa mandunćhu śhapämula.

17 Chayta David yaćhälulmi paypis jinantin Israelta juntüchimun.

Jinalculmi Jordan mayucta chimpapäcula Sirio läducunäwan pilyapäcunanpä.

Chayćhümi Sirio läducunaca pilyayta allacaycälin.

18 Chayćhu llallicuyalcaptinmi Sirio läducunaca ayiculcäña.

Jinaptinmi anćhish walanga (7,000) sillädacunacta,

tawa ćhunca walanga (40,000) ćhaquillawan cäcunacta David wañüchila.

Chay Sirio läducunäpa puydïnin Sofactapis wañüchilamari.

19 Chaynu israelcunaca lluy llallishanta licalmi.

Hadad-ezerta yanapä mandacücunaca Davidwan allin caycälil maquinmanña ćhulaculcäla.

Chay muyunpïtam Sirio läducunaca manaña mastá Amon läducunäta yanapayta pinsalcälilañachu.