Willacü Natanmi Davidta anyapan
12
Ñatac Tayta Diosmi willacünin Natantaa Davidman caćhala.
Jinaptinmi Davidman ćhaycul nin:
“Juc malcaćhümi ishcay nuna yaćhapäcuña.
Jucninmi rïcu caña,
juccäñatacmi waccha.
2 Chay rïcupam achca-achca uwishnincuna,
wäcancuna cacuña.
3 Chay waccha nunäpañatacmi ichá quiquin lanticuśhan jucllay uwishllan capuña.
Chay uwishninmi paywan,
chulincunawan cusca wiñaña.
Quiquinpa micunanpïtam micuña,
quiquinpa bäsunpïtam upyaña,
millayllanćhütacmi puñuchiñäpis.
Wamla chulintanümari ama-pacha niñäpis.
4 Juc muyunćhüñatacmi rïcupa wasinman pulicü nuna ćhäña.
Jinaptinmi cumbidaycunanpä uwishllantapis,
wäcallantapis mana ćhipiycapuñächu.
Aśhwanpam waccha nunäpa japallan uwishllanta quitalcul pulicü nunäpä yanüpuña” nil.
5 Niptinmi chay rïcu nunäpä David sumä-sumä piñacülun.
Chaymi Natanta nin:
“¡Tayta Diospa cawsaynin-laycu,
chayta luläca wañuchun!
6 Mana llaquipaycul lulaśhanpïtam tawa cutictalä uwishninpi cutiycachinan” nil.
7 Niptinmi Davidta Natan nin:
“¡Chay nunaca anmari canqui!
Israelpa Tayta Diosninmi caynu niyäśhunqui:
‘Israelpa mandacüninpä yaꞌami japächayculac;
ćhïnicüniqui Saulpïpis librayculacmi.
8 Saulpa palasyuntapis,
walmincunactapis maquiquimanmari ćhulaycamulac.
Jinaman Israeltawan Judatapis maquiquićhu cananpämi uyculac.
Manamá chayllachu cala,
sinuꞌa mastalämi uycunacpis cala.
9 Chayurá ¿imapïtamá yaꞌa Tayta Diospa shimïta jalutaculanqui millachicuśhäta lulayniquiwan?
Het lädu Uriasta wañulcachilmi walmintapis duyñuchacuyculanqui.
Awari Amon lädu nunacunäwanmá wañüchilanqui.
10 Chaynu Het lädu Uriaspa walminta wañuchishayquiwanmi jalutacämanqui.
Chaymi aylluyquićhu ispädawan wañuchinacuylla cacunꞌa’ nil.
11 Chaynütacmi Tayta Dios niyäśhunqui:
‘Yaꞌami quiquiquip ayllullayquipïta mana allincäta talcachimuśhä.
Ñawiquićhümi caśhtayquiman walmiquicunacta uycuśhä.
Chaymari paycunawan muyunpalä puñupäcunꞌapis.
12 Am pacallapmi juchacta lulalanqui;
yaꞌañatacmi ichá jinantin Israelpa ñawquin muyunpalä camalaycachishä’ ” nil.b
13 Niptinmi Natanta David nin:
“¡Tayta Diospa cuntranmi mana allinta lulällá!”
nil.
Niptinmi Natan:
“Tayta Dios juchayquita pampachälunñam;
manañam wañunquichu.
14 Ñatac chay lulayniquiwan Tayta Diosta sumä-sumä jalutacuśhayquipïmi näsishan chuliqui wañunꞌa” nin.
15 Nilculmi Natan wasinta cuticula.
Ñatac Uriaspa walminćhu David chulin caśhancätam Tayta Dios alli-allicta ishyächin.
16 Jinaptinmi Tayta Diosman mañacuyta David allacuycun;
jinaman ayunalam,
tutapapis pilatacuyculmi mañacula.
17 Yaśha awquishnincunañatacmi watucünin lipäcul śhalcunanpä ruygapäcula.
Jinapäcuptinpis payñatacmi ichá mana śhalculachu nïtac paycunawan micuytapis munalachu.
18 Chaypi anćhish muyuntam iñachaca wañucula.
Chaymi yanapänincuna Davidman willaycuyta manchaculcal ninaculcäla:
“Walaśhchaca cawsayaptinlä willaycuptinchic mana uyalïtucuyalꞌa,
canan walaśhca wañucuśhanta ¿imanuypatá niycuśhun?
Willaycüluptinchic imactapis lulälunmanćha” nil.
19 Chaynu yanapänincuna linlillanćhu-cama ninaculcäśhanta David licälulmi tantiälun ima pasaśhantapis.
Chaymi nin:
“¿Walaśhca wañucunchun?”
nil.
Niptinmi paycuna:
“Aw,
wañucunmari” nipäcun.
20 Niptinmi David pampäćhu caśhanpïta śhalcuculcul almacula;
asaytiwan llusiculculmari müdaculapis.
Jinalcul Tayta Diospa wasinmanmi alawä licula.
Chaypïta palasyunman cutilcamulmi micuyta mañaculcul micucuycula.
21 Jinaptinmi yanapänincunañatac nicuyalcan:
“¿Imactatá lulayanqui?
Walaśhca cawsayaptinꞌa waꞌaculanquim,
ayunalanquim.
Wañucuptinñatacmi ichá śhalcuculcul micućhacucuyanqui” nil.
22 Niptinmi David nin:
“Rasunpamari walaśhchaca cawsaptin waꞌaculá,
ayunalá:
‘Ichapis Tayta Dios llaquipaycamal chulïta cawsaycachinman’ nil.
23 Ñatac canan wañüśhaña cayaptinꞌa ¿imapäñam ayunaśhäpis?
Manañamá śhalcachiyta atipämanñachu.
Aśhwanpam pay caśhancämanña yaꞌa liśhä.
Payñatacmi ichá yaꞌaman manaña cutimunꞌañachu” nil.
24 Chaypïtam David walmin Betsabeta cunsuylä lila.
Chayćhu paywan puñupäcuptinmi patayu licalilcul Betsabé juc walaśhta ishyacula.
Paytam Salomon śhutiwan śhutichälälila.
Tayta Diosñatacmi iñachacta cuyal
25 willacünin Natanta willachila iñachap śhutin Jedidiasc cananpä.
Chaymi Tayta Dios willacachimuśhannu śhutichapäcula.
Raba malcactam David duyñuchacaycälin
26 Má,
chay timpućhu Joabñatacmi Amon läducunäwan pilyal Raba malcanta atacäläliña.
Jinalmi sumä puydï palasyunta duyñuchacaycäliña.
27 Chaymi willacücunacta Davidman Joab caćhälun:
“Raba malcacta lluy llallïlälilmi yacu püsuncunactapis duyñuchacaycälí.
28 Cananꞌa tayta David quïdä pilyäcunäta ampis juntuyculꞌari malcacta lluy cunćhaycul duyñuchacuycuy.
Yanꞌalätac yaꞌa duyñuchacuycul śhutïta ćhulälü imäman” nil.
29 Niptinmi David jinantin malcäta juntuycul Raba malcaman liculcäla.
Chayćhümi llallilcul paycunapis duyñuchacaycälila.
30 Jinalmi Amon läducunap mandacüninpa ürupi curunan ćhulacuśhancätapis quitäla.
Chaymi quimsa ćhunca quimsayu (33) quïlucta llasala;
sumä tuqui-cama ćhaniyu lumicunäwantacmi adurnäśhapis cacula.
Chaytamari Davidman ćhulälälila.
Chaynütacmi chay malcapïta imaymana ćhaniyünincunactapis David apacula.
31 Chayćhu puchü nunacunätapis jululculmari munäta mana munäta lulachila:
sirruchucunawan,
picucunawan,
ächacunawan,
ladrillu cusaycunaćhüpis.
Chaynütamari lluy llallishan Amon läducunäwan lulaycula.
Chaypïtam lluy pilyä nunancunawan Jerusalenta David cutipäcula.