Tayta Diospa babulnintam Jerusalenman David apachin
6
Chaypïtam David yapa juntülun jinantin Israelpi aclaśhan quimsa ćhunca walanga (30,000) pilyänincunacta.
2 Chaypïtam Tayta Diospa babulninta apapämunanpä lluy pilyänincunawan Juda lädućhu cä Baala malcaman David lipäcula.
Chay babulćhu cä querubin anjilcunap ćhawpinćhu cä sumä munayniyu Tayta Diostamari mañaculcä cala.a
3 Ulꞌućhu cäb Abinadabpa wasinpïtam Tayta Diospa babulninta muśhü carritaman ćhulculcul apaculcäla.
Chay muśhü carritacta Abinadabpa chulin Ahiowan Uzam puśhapäcula.
4 Chaynu Tayta Diospa chuya babulninta apapäcuśhanćhümi Ahio puntanta lila.
5 Davidwan lluy Israel nunacunäñatacmi sumä cushisha taquishtin,
paćhcaśhtin arpacunawan,
pandirïtancunawan,
shacshacuncunawan,
latillucunawan tucaśhtin Tayta Diospa ñawpäninta lipäcula.
6 Naconpa ïranman ćhäläliptinmi wäcacunaca mitcacacälälin.
Chayćhümi Uza nuna chacchaycul Tayta Diospa babulninta chalälun.
7 Chaynu mana lulananta luläluptinmari Tayta Dios sumä piñacülul chayćhu Uzacta wañüchin.c
Chaymi babulpa lädunman wañüśha cućhpälun.
8 Chaynu Uzacta Tayta Dios wañüchishanpïtam David piñacülun.
Chaymi chay paräjicta Perez-uzad nïta śhutichäla.
Canancamapis chay śhutillamari cayan.
9 Chay muyun Tayta Diosta manchapacülulmi David nin:
“Tayta Diospa babulninta manañam apachïmanñachu” nil.
10 Chaynu Tayta Diospa babulninta Jerusalen malcanman manaña apayta munalmi Gat lädu Obed-edompa wasinman apapäcunanpä nila.
11 Chaynüpam Tayta Diospa babulnin Obed-edompa wasinćhu quimsa quilla cala.
Paytam lluy aylluntinta Tayta Dios allinpä licaycula.e
Tayta Diospa babulnintam Jerusalenman David ćhächin
12 Chaypïtam mandacü Davidman willaycälila:
“Tayta Diospa babulnin Obed-edompa wasinćhu caśhanpïtam lluy aylluntinta,
imapis cänintinta allinpä licaycula” nil.
Chaymi Obed-edompa wasinman David lilcul sumä cushicuywan Jerusalen malcanman apachimula.
13 Chaynu süta ićhïllacta babulta apayalcällaptinlämi Tayta Diospa wäcactawan wira uwishta David cañaycapula.
14 Tayta Diospa puntanćhu lïnupi chulla sutänallanwan ćhulacüśhamari David sumä paćhcaycaćhacuyan.
15 Chaynu cushicuywan apalishtinmi Davidwan lluy Israel nunacunaca curnitillacunacta tucaśhtin Tayta Diospa babulninta apapäcula.
16 Chaynu Jerusalen malcanman Tayta Diospa limalicuśhan babulninta yaycayalcächiptinmi Saulpa wamla chulin Mical bintananpa anculpämun.
Jinalmi Tayta Diospa puntanćhu mandacü David paćhcaycaćhaśhanta licälul sumä jamuyäla.
17 Chay Tayta Diospa babulninta apalcachilmi David lulachishan carpap ćhawpinman ćhulaycachila.
Chay ćhulalänanman ćhulayculmi Tayta Diospa cañaywan uycula;
allin cawsaśhanpïpis uyculamari.
18 Chaynu uyculmi malcaca allin caycälinanpä sumä munayniyu Tayta Diospa śhutinćhu niycula.
19 Chayćhu cä lluy Israel nunacunätañatacmi wayapactapis walmictapis juc tantacta,
partin aychacta,
päsas culpachäśhactapis aypülun.
Chaypïta lluypis wasinta-camam cuticulcäla.
20 Davidpis wasinta cuticula ayllunta allinpä licaycunanpämari.f
Ñatac Saulpa wamla chulin Mical yalalcamulmi piñapäcuyan:
“Israelpa mandacünin,
¡altuman juluycuśhamá canan muyun caycunqui,
mana pinꞌacuyniyu nunanu aśhta uywayniquicunap puntanćhu pinꞌayniquita licachicuyal!”
nil.
21 Niptinmi David nin:
“Awari,
Tayta Diospa puntanćhümi paćhcaycaćhacú.
Paymi taytayquita ütac jucnin aylluyquita aclaśhannuꞌa yaꞌactalä aclaycamal Israel malcanta mandanäpä ćhulaycaman.
Chaymari Tayta Diospa puntanćhu paćhcaycaćhacú.
22 Cay lulaśhäta pinꞌaypa licaptiquipis mastalämi lulaśhä.
Ñatac nipämäśhayqui nunacunälämari altumanpis julaycälimanꞌa” nil.
23 Saulpa chulin Micalñatacmi mana wawiyu wañucula.