Chuya Babulta cutichinanpämi David nin
13
Chaypïtam David tapula walanga (1,000) pilyäcunap,
paćhac (100) pilyäcunap puydïnincunacta,
jinaman lluy puydïcunäta,
2 jinantin Israel läducunätapis:
“Sïchuśh amcunapä allin captinꞌa,
jinaman Tayta Diospä śhunꞌunpänu captinꞌa,
jinantin Israelćhu cä malca-masinchiccunacta,
sasirdüticunäta,
chaynütac malcancunaćhu ichadïruncunaćhu cä levitacunätapis,
willacachishun yaꞌanchicwan juntunaculcänanpä.
3 Jinalculćha Tayta Diospa chuya babulninta cayman cutichimuśhun.
Saul timpupïñamari unꞌäśha cayan” nil.
4 Chay nishanca allin captinmari jinantin israelcunaca chaynu lulaśha cananpä awnipäcula.
5 Jinaptinmi Quiriat-jearimpi Tayta Diospa babulninta apapämunanpä,
David jinantin israelcunäta juntuchimula,
Egiptop culindan Sihorpïta aśhta Hamatpa yaycunancama.a
6 Jinalculmi David lluy israelcunäwan cusca Juda lädućhu cä Baala nishan Quiriat-jearimman lipäcula,
Tayta Diospa babulninta apapämü.
Chay babulćhu querubin anjilcunap ćhawpinćhu cä mandä Tayta Diostam mañacuna cala.b
7 Chay Abinadabpa wasinpïtam Tayta Diospa babulninta muśhü carritawan apapämula.
Chay carritacta Uza nisha nunawan Ahiomari caminaycapäcula.
8 Davidwan lluy israelcunäñatacmi Tayta Diospa ñawpäninta lipäcula sumä cushisha,
llapan śhunꞌunwan alawaśhtin arpacunacta,
tinyacunacta,
latillucunacta,
pandirïtacunacta,
curnitillacunactapis tucaśhtin.
9 Ñatac Quidonpa ïranman ćhäläliptinmi wäcacunaca mitcacacälälin.
Chayćhümi Uza chacchaycul babulta chalälun.
10 Chaynu mana lulananta luläluptinmari Tayta Dios sumä piñacülul,
wañüchin babulpa puntanćhu.
Jinaptinmi babulpa lädunman wañüśha cućhpälun.
11 Chaynu Uzacta Tayta Dios wañüchishanpïtam David piñacülun.
Chaymi chay paräjicta Perez-uzac nïta śhutichäla.
Canancamapis chay śhutillamari cayan.
12 Ñatac chay muyun Tayta Diosta manchapacülulmi David nin:
“Tayta Diospa babulninta manañam apachïmanñachu” nil.
13 Chaymi babulta Jerusalen malcanman manaña apayta munal,
Gat lädu Obed-edompa wasinman apapäcunanpä David nila.
14 Jinaptinmi chay Obed-edompa wasinćhu babulca quimsa quilla cala.
Chaymi Oben-edompa ayllunta lluy ima cänintapis Tayta Dios allinpä licaycula.d