Jerusalenmanmi babulta David apachin
15
Chay Davidpa Malcan nishanćhümi David lulachila wasicunacta,
jinaman Tayta Diospa babulninta ćhulachinanpä carpactapis.
2 Jinalculmi nin:
“Tayta Diospa babulninta levitacunällam apapäcunꞌa.
Paycuna wiñaypä chaynu lulapäcunanpä,
sirbipäcunanpä quiquin Tayta Diosmari aclaycula” nil.a
3 Chaypïtam David jinantin israelcunäta Jerusalenman juntüchila,
lulachishan sityuman Tayta Diospa babulninta apachimunanpä.
4 Levitacunäpa,
Aaronpa milaynincunactamari David juntüchila:
5 Coatpa milayninpïtam paćhac ishcay ćhuncacta (120).
Paycunap puydïninmi Uriel cala.
6 Merarip milaynincunapïñatacmi ishcay paćhac ishcay ćhuncacta (220).
Paycunap puydïninmi Asaias cala.
7 Gersonpa milaynincunapïñatacmi paćhac quimsa ćhuncacta (130).
Paycunap puydïninmi Joel cala.
8 Elizafanpa milaynincunapïñatacmi ishcay paćhacta (200).
Paycunap puydïninmi Semaias cala.
9 Hebronpa milaynincunapïñatacmi pusä ćhuncacta (80).
Paycunap puydïninmi Eliel cala.
10 Uzielpa milaynincunapïñatacmi paćhac ćhunca ishcayniyüta (112).
Paycunap puydïninmi Aminadab cala.
11 Chaynütacmi David juntüchila sasirdüti Sadocta,
Abiatarta,
jinaman levitacuna Urielta,
Asaiasta,
Joelta,
Semaiasta,
Elielta,
Aminadabtapis.
12 Juntulcachilmi nin:
“Am levita puydïcuna cayalcalmi,
quiquiquicunactapis aylluyquicunactapis chuyanchaculcanqui.
Chayćha lulachishá sityuman israelcunäpa Tayta Diosninpa babulninta apapäcunqui.
13 Ñatac Tayta Dios camachishanmannu puntacta mana apapämuptiquim,
jinaman yaꞌacunapis imanuy lulanapä caśhanta mana tapupäcuptïmi waquinninchicta wañüchimälanchic” nil.
14 Niptinmi Israelpa Tayta Diosninpa babulninta apapäcunanpä sasirdüticunäwan levitacunaca chuyanchaculcäla.
15 Jinalculmi Moisesta Tayta Dios nishanmannülla,
levitacunaca babulta umrupäcula bärancunapïta.b
16 Chaypïtam levitap puydïnincunacta David nin:
“Jatućhä-uchuchä arpacunawan,
quïnacunawan,
latillucunawan tucaśhtin cushisha lipäcunanpä taquïcunacta ćhulay” nil
17 Niptinmi levitacunapi aclapäcula:
Joelpa chulin Hemanta,
Berequiaspa chulin Asafta,
jinaman Merarip milayninpïta Cusaiaspa chulin Etantapis.
18 Yanapänanpäpis calu aylluncunactam aclapäcula:
Zacariasta,
Jaazielta,
Semiramotta,
Jehielta,
Unita,
Eliabta,
Benaiata,
Maasiasta,
Matatiasta,
Elifelehuta,
Micniastapis.
Puncu täpäcunäpäñatacmi aclala Obed-edomtawan Jeielta.
19 Brunsipïta latillucta tucaśhtin taquïcunäñatacmi cala:
Heman,
Asaf,
Etanpis.
20 Uchuchä arpacunacta tucäcunäñatacmi:
Zacarias,
Aziel,
Semiramot,
Jehiel,
Uni,
Eliab,
Maasias,
Benaiaspis.
21 Taquïcunäta caminaycunanpä pusä cuirdayu uchuchä arpacunäta tucäcunäñatacmi cala:
Matatias,
Elifelehu,
Micnias,
Obed-edom,
Jeiel,
Azaziaspis.
22 Levitacunäpa puydïnin Quenaniasñatacmi taquićhu ishpisha cayninwan taquïcunäta caminaycüca cala.
23 Babul caśhanta täpänincunañatacmi Berequiaswan Elcana cala.
24 Tayta Diospa babulninpa puncunćhu curnitillacta tucäcunäñatacmi cala:
Sasirdüti Sebanias,
Josafat,
Natanael,
Amasai,
Zacarias,
Benaia,
Eliezerpis.
Babul caśhanpa puncunta täpäcunäñatacmari Obed-edomwan Jehias cala.
25 Chaypïtam David,
Israelpa yaśhancunawan,
walanga (1,000) pilyäcunap puydïnincunawan Tayta Diospa limalicuśhan babulninta,
Obed-edom wasinpïta cushisha apapämula.
26 Chay Tayta Diospa limalicuśhan babulninta apaśhanćhu,
levitacunäta Tayta Dios yanapaptinmi,
anćhish wäcactawan anćhish ulu uwishta cañaywan uycapäcula.
27 Lluy levita apäcunaca,
taquïcunaca,
taquïcunäpa puydïnin Quenanias,
jinaman Davidpis allinnin lïnu müdanawan müdacüśham babulcäta apapäcula.
Jinaman lïnupi chalicunta ćhulacuśhalämi Davidpis apala.
28 Chaynu cushicuywan apalishtin wäla curnitacta,
curnitillacta,
latillucta,
pandirïtacta,
jatućhä-uchuchä arpacunacta tucaśhtinmi jinantin israelcunaca Tayta Diospa limalicuśhan babulninta apapäcula.
29 Ñatac Davidpa Malcanman Tayta Diospa limalicuśhan babulninta yaycayalcächiptinmi,
Saulpa wamla chulin Mical bintananpa anculpämun.
Jinalmi Tayta Diospa puntanćhu mandacü David cushicuypi paćhcaycaćhaśhanta,
tuśhuycaćhaśhanta licälul sumä jamuyäla.