3 Chaypïtam Moabćhu cä Mizpa malcäman David licula.

Chayćhümi Moabpa mandacüninta nin:

“Amcunaćhu papänïwan mamá yaćhaycullächun aśhta Tayta Dios imacta yaꞌawan lulananpä yaćhaycunäcama” nil.

4 Chaynüpam Moabpa mandacüninman papänintawan mamanta David puśhäla.

Chaymi David pacaläśhancama chayćhu yaćhapäcula.

5 Chaypïtam Davidta Diospa willacünin Gad nin:

“Chay pacaläśhayquićhu amaña cayaychu.

Aśhwanpa Juda lädumanña licuy” nil.

Niptinmi David licul Haret muntiman ćhäla.

6 Saulñatacmi Gabaa malcaćhu,

ulꞌunyalcücäćhu,

tamarisco jaćhap llantuyninćhu täcuyäla lansan apticüśha.

Muyülïninćhüpis yanapänincunam cayalcäla.

Chayćhümi uyalïlun Davidwan nunancuna mayćhu capäcuśhantapis.

7 Jinalmi paycunacta nin:

“Benjamin ayllucuna,

uyalipämay.

¿¡Isaipa chulin lluy amcunactachun ćhaclacunacta,

üba lantacunactapis uycälishunqui imamá!?

¿¡Lluy amcunactachun paćhac (100),

walanga (1,000) pilyäcunap puydïninpä ćhulaycälishunqui imatá!?

8 Amcuna lluymi cuntrá śhalcapäcuñanqui.

Manamá mayanllayquipis niycälimäñanquichu Isaipa chulinwan chulí Jonatan limalinaculcäśhanta.

Manamá imapis uculcäśhuñayquichu cuntrá sirbïnïta chulí jicutayaptinpis.

Cananꞌa wañuchimänanpämi ashiyäman” nil.

9 Niptinmi nunancunap puydïnin Edom lädu Doeg nin:

“Isaipa chulinta yaꞌa licalämi Nob malcaćhu.

Chayćhümi Ahitobpa chulin Ahimelecwan limayäla.

10 Jinalmi sasirdüti Ahimelec Tayta Diosta Davidpä tapula.

Jinalculmi micuycunactapis uycul,

Filisteo Goliatpa ispädantalä uycülunpis” nil.^b

11 Niptinmi mandacü Saul ayächin Ahitobpa chulin Ahimelectawan lluy sasirdüti aylluntinta;

paycuna Nob lädućhümi sasirdüti capäcula.

Lluy ćhälälimuptinñatacmi,

12 Saul nin:

“Ahitobpa chulin sumäta uyalimay” nil.

Niptinmi:

“Taytallay,

uyaliyällacmi” nin.

13 Niptinmi Saul:

“¿Imapïmi amwan Isaipa chulin cuntrá śhalcapäcunqui?

Tantactapis,

lansactapis uycul Tayta Diostapis paypä tapulanquilä canpis cuntrá śhalcunanpä.

Chaymari canan wañuchimänanpä ashiyäman” nin.

14 Niptinmi Ahimelec:

“Lluy nunayquicunaćhüpis Davidnuꞌa chalapacuna nuna manam canchu.

Jinaman pay maśhayquim,

nunayquicunap puydïninlämi canpis.

Wasiquićhüpis lluymari allinpä licapäcun.

15 ¿Cananllachun Davidpa Tayta Diosta tapuyäpú imamá?

Manamari.

Chayurá taytallay,

cay nunallayquita,

ayllücunactapis yanꞌal tumpayalcämaychu.

Chaycunapïta yaꞌa manamá uchuyllactapis yaćhächu” nin.

16 Niptinmi mandacü Saul:

“Am Ahimelec,

lluy aylluntinmi rasunpa wañupäcunqui” nin.

17 Nilculmi lädunćhu cä nunancunacta mandacü Saul nin:

“Cutilcälil Tayta Diospa sasirdütincunacta wañuchipämuy.

Paycunapis Davidmanmi śhalcuyalcan.

Ayishanta yaćhayalcalpis manamá willaycälimälachu” nil.

Niptin täpänincunam ichá Tayta Diospa sasirdütincunacta wañuchiyta mana munapäculachu.

18 Jinaptinmi Edom lädu Doegta Saul nin:

“Amña wanüchiy” nil.

Niptinmi Edom läducunäpa mandacünin Doeg lluy camacaycüla.

Chayćhümi pusä ćhunca pichayu (85) sasirdüticunacta lïnupi chalicuyü-camacta wañüchila.

19 Jinalculmi sasirdüticunäpa malcan Nobman lilcul ispädawan camacaycüla:

umricunacta,

walmicunacta,

chulincunacta,

iñachancunacta,

wäcancunacta,

aśhnuncunacta,

uwishnincunactapis.

20 Ñatac Ahimelecpa jucnin chulinmi lluptïla.

Ahitobpa chulinmá Ahimelec cala;

chay lluptï chulinpa śhutinmi Abiatar cala.

Payllam lluptïlul Davidman licula.

21 Chayćhümi willaycula Tayta Diospa lluy sasirdütincunacta Saul wañuchishanta.

22 Chaymi David nin:

“Chayćhu Edom lädu Doegta lical tantialäñam Saulman pay willaycunanta.

Yaꞌami juchayüca cayá lluy aylluyquicuna wañuchisha cananpä.

23 Ñatac ama manchacuychu;

cananꞌa yaꞌawanña cayćhu caśhun.

Cayćhuꞌa manam mayanpis wañuchishunquichu.

Mayanpis wañuchiyta munalꞌa yaꞌactalämi wañuchimanꞌa” nil.