Nob malcamanmi David ayin
21
Chaypïta Nob malcaćhu cä sasirdüti Ahimelecmanmi David ćhälun.a
Ćhäluptinmi Ahimelec manchäśha nicuyan:
“¿Imapïmi japallayqui śhamulanqui?”
nil.
2 Niptinmi David:
“Mandacücäpa caćhaśham śhayämú.
Ñatac manam mayanpis yaćhanmanchu imapä imaman śhamuśhätapis.
Nunäcunactá mayćhu alcapämänanpäpis niycuśhañam cayan.
3 Chayurá ¿imallayqui cayantan?
Picha tantallayquita ütac imapis capuśhuśhallayquitari uycallämay” nin.
4 Niptinmi sasirdütica nin:
“Manam cumun tantá canchu.
Tayta Diosta uycunapä japächaśha tantallam cayan.
Ñatac nunayquicuna walmiwan mana puñuycuśha capäcuptinꞌa uycucmanmi” nil.
5 Niptinmi David:
“Caynu imamanpis yalunanchic captinꞌa walmïcunawan manañam puñupäcuná canchu.
Jinaman mana pinsaśhäćhu yalapäculpis nunäcuna chuyam cayalcan.
Chayurá chuyamari canan cayalcan” nin.
6 Niptinmi sasirdütica cumun tantan mana captin Tayta Diospäjapächaśha tantätañab Davidman uycula.
Chay muyunllam chay tantacunäta Diospä ćhulaśhanpïta julälälimula,
unü tantactaña ćhulapäcunanpä.
7 Chay muyunmi Saulpa nunan Doeg Tayta Diosta mañacuyäña.
Payꞌa Edom lädu,
jinaman Saulpa michïnincunap puydïninmari cala.
8 Chaypïtam Ahimelecta David nin:
“¿Manachun lansayqui ütac ima armallayquipis can?
Mandacüca unꞌaypi caćhämaptinmi manaña lansallactapis nï imallactapis apamuyta atipalächu” nil.
9 Niptinmi sasirdüti Ahimelec nin:
“Ela pampaćhu Filisteo lädu Goliatta wañuchishayquip ispädallantam uywayá.c
Chay chalicup ipanćhümi lataśhwan pitwïsha cayan.
Munalꞌa apacunquimanmi,
manam juc imäpis canchu” nil.
Niptinmi David:
“Chay ispädanuꞌa manamá juc canchu;
uycamayꞌari” nin.
Davidmi Gat malcaćhu lücutucun
10 Chay muyunllatacmi Saulpïta ayïninwan Gat malcap mandacünin Aquisman David ćhälun.
11 Chayćhümi yanapänincuna mandacünin Aquista nicuyalcan:
“¿Pay manachun cay pachäpa mandacünin David?
Paypïmari paćhcaśhtin caynu taquipäcula:
“ ‘Walanga (1,000) pilyätam Saul wañüchila;
Davidñatacmi ćhunca walangacta (10,000)’ ” nil.d
12 Chayta David uyalïlulmi Gat malcap mandacünin Aquista sumä manchacula.e
13 Chaymi David paycunap puntanćhu lücutucülulf puncucunätapis laćhpicuyan,
tuwaynintapis shapunpa bäbacuyan.
14 Chayćhümi yanapänincunacta Aquis nin:
“Licayꞌari cay nunaca pasaypi lücum.
¿Imapätá yaꞌaman puśhamulanqui?
15 Cayćhu lücucuna manamá faltanchu.
¿Chaychun yaꞌaman puśhayämunqui punta-puntäćhu lücutacunanpä?
Cay wasïpi julapäcuyꞌari” nil.