2 Niptinmi Jonatan:

“Manamá wañunquichu.

Papäniꞌa imactapis manamá lulanmanchu yaꞌacta mana willaycamalꞌa.

Chayurá,

¿imapïtá papäní chaytalä pacayämanman?

Manamá chay canmanchu” nin.

3 Niptinpis David nicuyanmi:

“Papäniqui tuquictamá yaćhayan maynu apanacuśhanchictapis.

Chayćha niyan:

‘Cayta Jonatan ama yaćhachunchu mana llaquicunanpä’ nil.

Ñatac Tayta Diospis yaćhanmi wañuypa patanćhüña caśhäta” nil.

4 Niptinmi Jonatan:

“Niycallämay jinalla,

¿imaćhümi yanapaycucman?”

nin.

5 Niptinmi David:

“Wala muyunmi llullu quilla fista canꞌa.^a

Chayćhümi mandacücäwan cusca micuná cayan.

Ñatac wala tardicama ćhacla-ćhaclämanmi pacacämuśhä.

6 Papäniqui tantiälul tapuśhuptiquim:

‘Belen malcanta linanpämi David mañacamäla.

Chayćhüshi lluy aylluncunawan watan-watan Tayta Diosman uycälinan cayan’ nil niycunqui.

7 Chaynu niptiqui papäniqui ‘allinmi’ nishuptiquiꞌa jawcam caycuśhä.

Piñacüluptinmi ichá yaćhanquiña mana allinta yaꞌawan lulay munaśhanta.

8 Chaynu captinꞌa cay uywayllayqui mañacuśhämannu llaquipaycallämay.

Tayta Diospa ñawpäninćhümari maynu apanacuśhanchictapis limaliculanchic.

Ñatac yaꞌapa juchá captinꞌa am quiquiqui wañüchimay;

manam papäniquiman puśhamänayquilächu” nin.

9 Niptinmi Jonatan:

“Ama chaytá limaychu.

Sïchuśh papäní ampa cuntrayqui lulayta munayaptinꞌa ¿manachun willaycucman imatá?”

nin.

10 Niptinmi:

“¿Mayantá willaycamanꞌa papäniqui wañuchimayta munaśhantá?”

nin.

11 Niptinmi Jonatan:

“Acu ćhacla-ćhacläman lishun” nil ishcayllan lipäcula.

12 Chayćhümi Jonatan nin:

“Israelpa Tayta Diosninmi licäní cayan.

Chaymi wala ütac wala śhaluncäta yaćhaycuśhä papäní ima pinsaśhantapis.

Allin mana allin captinpis willaycuśhayquimari.

13 Má,

canan papäní mana allinta lulayta munayaptin ayinayquipä yaꞌa mana willaycuptiꞌa Tayta Dios mana llaquipaycul mućhuycachimächun.

Quiquin Tayta Diosꞌari papänïta yanapäśhannu amtapis mandacuyniquićhu yanapaycuśhunqui.

14 Sïchuśh chay muyuncamalä cawsayaptí Tayta Dios llaquipaycuśhuśhayquinu yaꞌactapis llaquipaycamay;

amatac wañuchimänanta munaychu.

15 Wañucuptïpis ayllücunactá llaquipaycuy.

Masqui ćhïnicünïcunacta cay pachäpïta Tayta Dios chincächiptinpis ayllücunactá allinpari licaycuy.

16 Lluy ćhïnicüniquicunacta lulaśhancunapïta Tayta Dios cäraycuchun” nil.

Chaynüpam Jonatanwan David limalinaculcäla.^b

17 Chaynu Jonatan Davidwan sumä-sumä cuyanaculmi yapa limalinaculcäla.

18 Chaypïtam Jonatan nin:

“Wala muyunmi llullu quilla fista.

Chayćha täcunayquićhu mana captiqui watucapäcuśhunqui.

19 Ñatac quimsa muyuncäta mana caśhayquita tantiälälinꞌam.

Chaymi śhalun pacacuśhayqui śhuntuläśhan lumip lädunman pacacamunqui.

20 Yaꞌañatacmi sumä-sumäta asirtayä-yupay quimsa cuti chay-läduman flïchacta ćhächimuśhä.

21 Jinalculmi uywayní nunäta nishä:

‘Chay ćhächishá flïchacta ashimuy’ nil.

Ñatac uywayní nunäta:

‘Cay läduyquićhümi cayan;

pallalcul apamuy’ nil niptiꞌa mana manchalillalmi śhamunqui.

Tayta Diosmari yaćhan imapis mana pasaśhunayquita.

22 Ñatac uywayní nunäta:

‘Flïchaca wic-läduyquićhülämi cayan’ niptiꞌa licunquim.

Tayta Diosmari licunayquita munan.

23 Limalinacuśhanchictá Tayta Diosmi wiña-wiñaypä licamäninchic cayan” nil.

24 Chaynüpam David ćhacläman pacacämula.

Ñatac llullu quilla fista ćhämuptinmi mandacüca micunanpä täcula.

25 Chaymi mandacüca imaypis täcuśhan pilä läduman Saul taycucuycula.

Jonatanñatacmi chimpanman,

Abnerñatacmi Saulpa lädunman.

Davidpa täcunanñatacmi ichá jäcuyäla.

26 Jinaptinmi chay muyun Saul imactapis mana nilachu:

“Ima mana allintaćh lulälun.

Chayćha mana chuyanchacul nï śhamulachu” nil.

27 Chay llullu quilla fistap ishcay muyunninćhüpis Davidpa täcunan jäcuyälam.

Chaymi chulin Jonatanta Saul nin:

“¿Imapïtam Isaipa chulin David anyanpis nï cananpis micü śhamunchu?”

nil.

28 Niptinmi Jonatan nin:

“Belen malcanman linanpämi David ruygacamäla:

29 ‘Ama chaynu callaychu,

ayllücunam malcäćhu Tayta Diosman uycälinan cayan.

Chayman linäpämi wawꞌi-caśhäcuna ayayächiman.

Chaymi mañacullac wawꞌi-caśhäcunacta watucaycamü linäpä’ nil.

Chaymi mandacücäwan micunanpä David mana śhamulachu” nil.

30 Niptinmi Saul piñacülul nin:

“Amꞌa pasaypi mana allin cawsayniyu walmip wawinmá canqui.

¡Manachun yaćhá imatá Isaipa chulinwan apanaculcäśhayquita!

Maynu pinꞌaymi mamayquipäpis ampäpis canqui.

31 Isaipa chulin David cawsaśhancama manam cawsanayquipis nïtac mandacü canayquipäpis yaćhacunchu.

Chaymi ashilcachimul puśhamunayqui;

payꞌa wañunanmi” nil.

32 Niptinmi Jonatan:

“¿Imapïtam wañuchisha canman?

¿Ima mana allintamari lulälun?”

nin.

33 Jinaptinmi Jonatanta wañuchiyta munayninwan Saul lansanwan chapïlun.

Chayćhümi Jonatan tantiälun Davidta rasunpa wañuchiyta papänin munaśhanta.

34 Chaymi fistap ishcay muyunninćhu Jonatan täcuśhanpi sumä-sumä piñäśha śhalcuculcul micuytapis manaña miculachu.

Papänin mana allincunacta Davidpi limaśhanpïmari Jonatan sumä llaquisha cayäla.

35 Chay walantintam Jonatan lila Davidwan tincunanpä,

jucnin mas müsunnin uywayninta puśhacuśha.

36 Chayćhümi chay uywaynin müsucta Jonatan nin:

“Chay ćhächishá flïchacta ashimuy” nil.

Chaynu uywaynin pasacuptinmi Jonatanñatac juc flïchacunäta mas puntanninmanlä ćhächin.

37 Chay flïcha caśhanman uywaynin ćhäluptinmi Jonatan ayaycaćhacuyan:

“Flïchaca ampïtapis wic läduyquićhulämi cayan” nil.

38 Mastalämi Jonatan ayaycaćhacuyan:

“Mana śhaycuycullal wayra-wayra liy” nil.

Uywayninñatacmi flïchäta pallalcamul Jonatanman cutimula.

39 Ñatac uywaynin walaśhcá manam imactapis tantialachu;

Jonatanwan Davidllam chayta tantiapäcula.

40 Chaypïtam flïchancunacta uywayninman uycul Jonatan nin:

“Cayta apaculcul malcäman cutiy” nil.

41 Chay uywayca licuptillanmi pacaläśhanpïta David yalamula.

Jinalculmi Jonatanpa puntanćhu quimsa cuti uyshuycula cäranpis pampäman ćhänancama.

Jinamanñatacmi macallanacuycul cuscan waꞌaculcan.

Davidñatacmi pishipänancama waꞌacula.

42 Chayćhümi Davidta Jonatan nin:

“Jawcalla licuy.

Cuscanchicmi Tayta Diospa puntanćhu limalinaculanchic:

‘Maynu apanacuśhanchictapis jinaman milayninchiccuna wiñaypä allin caycälinanpäpis Tayta Diosmi licäninchic cayan’ ” nil.

Chaypïtam David licula;

Jonatanpis malcanman cutimula.