3 Nipäcuptinmi nin:

“Israelcunap Diosninpa babulninta cutichilꞌa amam jinallactá cutichinquichu.

Aśhwanpam allin cacüpi apapämuśhayquipïta Diosman uycunayquita uycälinqui.

Chaylämi allinyapäcunqui,

jinaman tantiapäcunquipis imapi Tayta Dios mućhuchiyta mana manalcuśhantapis” nil.

4 Niptinmi Filisteo läducunaca nipäcun:

“¿Allin cacüpi apapämuśhäpi imactatan uycälïman?”

nil.

Niptinmi paycunañatac nin:

“Amcunapis puydïniquicunapis chay mućhuchicuyllawanmi ñacapäculanqui.

Chaymi picha puydïniquimannu uycunqui chupu-yupayta picha üru aläjacunacta.

Chaynütac ürupïta luläśha picha ucuśhcunactapis uycunqui.

5 Chayurá lulanqui chupunu liträtucta,

chaynütac ćhaclayquita camacä ucuśhtanüpis.

Jinalcul Israel caśhtacunäpa Diosninta altuman juluycunqui.

Chaynu lulapäcuptiquiꞌa ichaläpis manalcunman amcunacta,

taytachayquita,

ćhaclayquitapis mućhuchiyta.

6 ¿Imapïtam Egipto nunacunäpanu,

Faraonpänu śhunꞌuyqui pasaypi lumiyälun?

Paycuna israelcunap Diosnin sumä mućhuycächiptinlämi liculcänanpä israelcunäta caćhaycula.

7 Cananꞌari amcuna juc muśhü carritacta lulapäcuy.

Jinaman wawiyu ishcay wäcacta aclapäcuy,

yügucta manalä lisï-camacta.

Chay wäcacta carritaman watapäcuy aysananpä;

wawincunactañatac canćhanman wićhäluy ipanta mana atinanpä.

8 Chaypïta Tayta Diospa babulninta carritaman ćhulcunqui.

Chay allin ćhulaläśhanpïta apamuśhayquiwan juchacuśhayquipïñatacmi lädunman cäjacta ćhulaycul ürupïta lulaśhayqui aläjacunäta ćhulaycunqui.

Jinalcul carritacta caćhaycüluy wäcacunälla aysacunanpä.

9 Maypa lishantapis licapanquimari.

Sïchuśh quiquin malcan Bet-semes caminunninpa licuptinꞌa rasunpam israelcunap Diosnin sumä mućhuchimälanchic.

Ñatac juc lädunpa licuptinꞌa yaćhaśhuntacmi chay mućhuchicuyca paypïta mana śhamuśhanta,

aśhwanpa yanꞌal ishyaylla caśhantapis” nil.

10 Chay nishantanüllamari lulälälin.

Wawiyu ishcay wäcactam carritaman wataycälälin.

Wawincunactañatacmi canćhanman wićhaycälälin.

11 Jinaman Tayta Diospa babulninta carritaman ćhulcälälin.

Chaynütac cajunman ürupïta ucuśh-niläcätawan chupu-niläcätapis ćhulcälälin.

12 Jinalcuptinmi jinantin caminup wäcacunaca büyaśhtin liculcan Bet-semes malcaman.

Ichümanpis allïmanpis mana muyulcullalmari dirichullacta liculcan.

Filisteo läducunäpä puydïnincunañatacmi ipanta lipäcula Bet-semespa lindancama.

13 Bet-semes nunacunäñatacmi pampaćhu trïgucta lutuyalcäla.

Chaymi licalcuśhanćhu Diospa babulninta licalälil sumä cushicälälin.

14 Chay carritam Bet-semes malcaćhu śhaycülun jatun lumićhu,

Josuepa ćhaclanćhu.

Chayćhümi Bet-semes malcayücunaca carritacta yamtälälin;

wäcacunätañatacmi Tayta Diosman cañaywan uycapäcula.

15 Levi ayllucunämi babultawan cäjaćhu ürupi aläjacunäta bäjapäcula.

Jinalculmi jatun lumip jananman ćhulälälin.

Chay muyunmari Bet-semes nunacunaca Tayta Diosman uycälila.

16 Chayta picha puydï Filisteo läducunaca licälälilmi chay muyunlla Ecron malcacta cuticulcäla.

17 Allin cacü babul apamuśhanpïta chupu-nilä ürupi picha aläjacunaca cay malcacunäpi Tayta Diosman uycuśham cala:

Asdod,

Gaza,

Ascalon,

Gat,

Ecronpïtapis.

18 Ürupïta luläśha ucuśh aläjacunäñatacmi uycuśhä cala,

picha malcap puydïnincunapi.

Chaynütac jatun malcacunäpi,

mana murällayu tacsha malcacunäpïpis.

Tayta Diospa babulninta ćhulaśhan jatun lumim Bet-semesćhu Josuepa ćhaclanćhu canancamapis jinalla cayan.

19 Chayurá Diospa babulninpa lulinta Bet-semes waquin nunacuna licapäcuśhanpïtam pay wañüchila.

Achca-achca^a nunacunactamari camacaycüla.

Chaynu achca-achcacta Tayta Dios camacaycüluptinmi malcaca waꞌaculcäla.

20 Chaymi Bet-semes nunacunaca nicuyalcan:

“¿Chuya Tayta Diospa puntanćhu mayanmá caycuchwan?

¿Mayanmanlä babulta apächichwan?”

nil.

21 Jinalmi Quiriat-jearim malcaman willacachimula cay nil:

“Filisteo läducunaca Tayta Diospa babulninta cutïlächimunmi.

Śhapämuyña cutichiculcänayquipä” nin.