Diospa babulninmi Filisteo läducunäpa maquinćhu
5
Filisteo läducunaca Diospa babulninta Eben-ezerpïtam Asdod malcaman apaculcäla.
2 Jinalmi taytacha Dagonpa alawana wasinman apaycul matäninmanlä ćhulaycälälila.
3 Chay walantin wälam Asdod malcapi nunacunaca talïlälin Tayta Diospa babulninpa puntan pampäćhu taytachan Dagon pilatayninpa cućhpalayäta.
Chaymi taytachanta caśhan ćhulaläśhancäman cutiycachipäcula.
4 Chay walantin wälapis cutipäcul Tayta Diospa babulninpa puntanćhu pilatayninpa cućhpalayätatacmi talïlälin.
Umanwan ishcaynin maquincunañatacmi yaycuna puncućhu paquïsha jitalayalcäña;
cuirpullanñam täcuyäña.
5 Chaymi canancamapis yaycuna puncucta mana jaluycapäcunchu taytacha Dagonpa sasirdütincunapis nïtac yaycücunäpis.
6 Chay nanä maquinwanñatacmi Tayta Dios Asdod malcacta muyülïninćhu lluy malcacunätawan chupu ishyaywan alli-allicta mućhuycächila.
7 Chaynu cacuyaptinmi Asdod nunacunaca nicuyalcan:
“Israelcunap Diosninpa babulninta amaña chalaläśhunñachu.
Chay Diosninmi yaꞌanchictapis taytacha Dagontapis mućhuchicayämanchic” nil.
8 Chaymi Filisteo läducunäpa puydïnincunacta juntuycachil tapun:
“¿Imactatan israelcunap Diosninpa babulninwan lulaśhun?”
nil.
Niptinmi puydïcunaca:
“Gat malcaman apäläliy” nin.
Chaymi israelcunap Diosninpa babulninta Gat malcaman apapäcula.
9 Chay malcaman apäläliptinmi Tayta Dios chayćhu yaćhäcunäman alli-alli manchacuyta ćhächila.
Chupu ishyaymi iñachanpïta aśhta yaśhancama camacaycüla.
10 Jinaptinmi Diospa babulninta Ecron malcamanña apälächila.
Ñatac Ecron malcaman ćhälächiptinmi paycuna nicuyalcan:
“Israelcunap Diosninpa babulninta apälälimunqui malcantinta camacaycälälimänayquipächun imatá” nil.
11 Chaymi Filisteo läducunäpa lluy puydïnincunacta juntuycul nicuyalcan:
“Israelcunap Diosninpa babulninta apaculcay.
Mayćhu caśhancäman cutichipäcuy malcantinta mana camacapämänanpä” nil.
Chaynu nipäcula nunacunäta Dios ñacachiptin sumä manchaculcalmi.
12 Jinaman wañuypïta ayïcunäpis chupu ishyaywan camacaycüśham ñacapäcula.
Chaynüpam malcäpa apalcaćhaynin janay pachäcama ćhäla.