4
Samuelñatacmi jinantin Israel caśhtacunäta chay willacuycäta willaycü cala.
Tayta Diospa babulninta Filisteo läducunämi apaculcan
Chay timpum Israel caśhtacunaca Filisteo läducunäwan pilyä lipäcula.
Chaymi Eben-ezerpa sircanćhu jamapäcula.
Filisteo läducunäñatacmi Afec malcaćhu jamapäcula.
2 Chaypïtam Filisteo läducunaca lipäcula Israel caśhtacunäwan pilyä.
Jinalmi Israel caśhtacunäta llallilcul pilyućhu tawa walanga-yupayta (4,000) wañülächila.
3 Chaymi Israel caśhta pilyäcunaca jamapäcuśhanman cutiycapäcuptin yaśhacunaca nin:
“¿Imapïtam Tayta Diosninchic canan caćhaycämanchic Filisteo läducunaca llallimänanchicpä?
Tayta Diospa limalicuśhan chuya babulnintari Silo malcapïta apamuśhun.
Chaymi ćhawpinchicta lil ćhïnicüninchiccunapïta salbaycamäśhun” nil.
4 Chaymi Silo malcaman nunancunacta caćhäla querubin anjilcunap ćhawpinćhu täcu sumä munayniyu Tayta Diospa limalicuśhan chuya babulninta apapämunanpä.a
Elipa chulin Ofniwan Fineespis babulwan cuscamari śhapämula.
5 Tayta Diospa limalicuśhan babulca Israel caśhta jamapäcuśhanman jiꞌaycüluptinmi cushicuypïta lluypis apalïlälin allpapis śhaśhanancama.
6 Chaynu apalipäcuśhanta Filisteo läducunaca uyalïlälilmi nicuyalcan:
“¿Imactañam hebreo caśhtacunaca jamapäcuśhanćhu chaynüpaña apalïcuyalcan?”
nil.
Chaypïtam Tayta Diospa limalicuśhan babulnin jamapäcuśhanman ćhämuśhanta yaćhälälin.
7 Chaymi Filisteo läducunaca manchalicälälil nicuyalcan:
“Jamapäcuśhanman Tayta Diosmi ćhämun.
¡Imanuylä caśhun!
¡Caynuꞌa manamá imaypis calachu!
8 ¡Imanuylä caśhun!
¿Mayantá libraycamäśhun chay sumä munayniyu diosnincunap maquinpïta?
¡Paymari chunyä ulꞌüćhu Egipto nunacunäta imaymana mućhuchicuywan camacaycüla!
9 ¡Allicta callpanchaculcay Filisteo pilyäcuna!
¡Yanꞌalätac paycunacta sirbichiculcäśhayquinu hebreo caśhtacunäpa maquinćhu cayalcanquiman!
¡Chayurá umrinu pilyapämuy!”
nil.
10 Chayćhu Filisteo läducunaca pilyapäculmi israelcunäta aśhwanpa llallïläliña.
Jinaptinmi jamapäcuśhanman mana-mana ayiculcäña.
Chayćhümari Israel caśhtacunäta alli-allicta camacaycüña;
ćhaquiwan pulï pilyäcuna quimsa ćhunca walangam (30,000) camacaycüśha capäcula.
11 Jinaman Tayta Diospa babulnintapis Filisteo läducunaca apaculcälam.
Elipa ishcaynin chulintapis wañülächilam:
Ofnitawan Fineesta.
Sasirdüti Elimi wañucun
12 Chay pilyupïmi Benjamin ayllupi jucnin pilyä nuna ayicun.
Paymi chay muyunlla Silo malcaman ćhälun llaquicuypi müdanan lluy laćhyäśha,
umapis allpap taycüśha.
13 Ćhänanpämi sasirdüti Eli licat-licat llaquisha täcunanćhu täcuyäña:
“Tayta Diospa limalicuśhan babulninta imapis pasälunmanćha” nil.
Chay lï nunäñatacmi malcaman ćhaycul willacula ima pasaśhantapis.
Jinaptinmi malcantin nunacunaca apalcaćhaypa waꞌaculcäla.
14 Chay apalcaćhayta Eli uyalïlulmi nin:
“¿Imapïtam chaynüpaña nunacunaca apalcaćhayalcan?”
nil.
Pilyupi ayimü nunäñatacmi Eliman willaycamü wayra-wayra pasacun.
15 Eli isun ćhunca pusäniyu (98) watantañamari liyäla;
ñawinpis pasaypi aspäluptinmi manaña licalachu.
16 Chayćhümi Elita nin:
“Pilyapämuśhäpïmi ayiyämú” nil.
Niptinmi:
“Iju,
¿imatan pasälun?”
nin.
17 Niptinmi willacüca:
“Israel caśhtacunämi Filisteo läducunäpi ayiculcan.
Lluy-lluytam camacaycäläliman.
Chuliqui Ofniwan Fineespis wañuculcanmi.
Tayta Diospa babulnintapis apaculcanmi” nin.
18 Chaynu Tayta Diospa babulninpïta willaycuptinmi puncup lädunćhu täcuśhancäpïta ipaman Eli cućhpälun.
Chayćhu wira cayninwan yaśhaña cayninwanmari ipa cuncanta paquïlul wañucun.
Pay tawa ćhunca (40) watam Israel caśhtacunäta caminaycüca cala.
19 Ñatac Elipa llumchuynin,
Fineespa walmin patayu cayalmi ishyacunan quillaćhüña cayäla.
Chaymi Tayta Diospa babulninta apacuśhanta,
jinaman wayapan Fineeswan suydrun wañuculcäśhantapis yaćhälul ishyacuynin unꞌaypi chalälun.
Jinaptinmi sumä-sumä nanaywan ishyacüla.
20 Ishyacuyninwan wañuypa pantanćhüña cayaptinmi yanapäcunaca nicuyalcan:
“Ama manchacuychu,
juc walaśhtam ishyacülunqui” nil.
Niptinpis payꞌa manam imactapis limalculañachu,
nï tantialañapischu.
21-22 Wawinpa śhutillantañam Icabodb nïta śhutichäla:
“Tayta Diosninchicpä sumä caynin chincacunmi” nil.
Chaynüta nila Tayta Diospa sumä caynin Israelpi apacuśha captinmi.
Jinaman babulnintapis apacuśhanpïtam;
chaynütacmi wayapanwan suydrun wañucuśhanpïtapis.