2 Quiriat-jearim malcaman Diospa babulninta ćhächishanpïta ishcay ćhunca watañam pasäla.

Filisteo läducunäpa maquinćhu cayalcalmari Israel caśhtacunaca Tayta Diosman wañuy-wañuy aśhuycapäcula.

3 Chaymi Israel caśhtacunäta Samuel nin:

“Sïchuśh Tayta Diosman llapan śhunꞌuyquiwan cuticalcämulꞌa amcunaćhu cä taytachacunacta,

jinaman taytachayqui Astarottapis wicapapäcuy.

Jinalcul Tayta Diosllactaña sirbipäcuy;

chayćha Filisteo läducunäpa maquinpïta pay libraycälishunqui” nil.

4 Niptinmi Israel caśhtacunaca taytachan Baaltapis,

Astarottapis wicapalcälil Tayta Diosllactaña sirbipäcula.

5 Chaypïtam Samuel nin:

“Jinantin Israel caśhtacunäta Mizpaman juntupämuy.

Chayćhümi amcunapïta Tayta Diosta mañacuśhä” nil.

6 Chaymi Israel caśhtacunaca Mizpaman juntunacälälila.

Chayćhümi yacucta juluycul “Tayta Diosmanmi ucuyanchic” nil puntanman jićhaycapäcula.

Chay muyunmi ayunapäcul:

“Tayta Diospa cuntranmi juchacta lulälunchic” nipäcula.

Chay Mizpa malcaćhümi Israel caśhtacunäta Samuel caminaycula.

7 Chaynu jinalcul Mizpachu Israel caśhtacunaca juntunacüśha capäcuśhantam Filisteo läducunaca uyalïlälin.

Chaymi Filisteo läducunap puydïnincuna israelcunäwan pilyä lipäcula.

Chayta israelcunaca yaćhälälilmi chucchucuyalcan.

8 Chaymi Samuelta nicuyalcan:

“Mana manalcullalꞌari Tayta Diosninchicta mañacuy Filisteo läducunap maquinpïta libraycamänanchicpä” nil.

9 Nipäcuptinmi Samuel malta uwishchacta Tayta Diosman cañaywan uycula.

Jinalcul israelcuna-laycu Tayta Diosta mañacuptinmi pay uyaliycula.

10 Chaynu Samuel cañaywan uycuyaptinmi Filisteo läducunäñatac pilyananpä jiꞌacaycayalcämulaña.

Chayćhümi Tayta Dios sumä räyucta Filisteo läducunäman caćhalpaycämun.

Chaymi manchacuypïta Filisteo läducunaca ayiculcäla.

11 Jinaptinmi israelcunaca Filisteo läducunäta Mizpa lädupïta wañuchishtin aticulcan aśhta Bet-carpap ulaynincama.

12 Chaypïtam Samuel juc lumicta śhaycächin Mizpawan Senpa culindanman.

Jinalculmi śhutichäla “Eben-ezer”^b nïta.

Chaynu śhutichäla:

“Canancama Tayta Diosmi yanapaycamanchic” nilmi.

13 Chaynüpa Filisteo läducunaca uyshulächisha capäculmi israelcunäpa allpancunaman manaña mastá yaycapämulachu.

Samuel cawsaśhancamá Filisteo läducunäpa cuntranmi Tayta Dios cala.

14 Chaymi Israel caśhtacunaca cutichiculcäla Filisteo läducunäpa maquinpïta Ecron partipïta aśhta Gat malcäcama.

Chaynütacmi Israel caśhtacunaca Amhor läducunäwanpis allin jawcallaña cawsapäcula.

15 Samuel cawsaśhancamá Israel caśhtacunäpa caminaycüninmi cala.

16 Samuel watan-watanmi Bet-el,

Gilgal,

Mizpa malcacunäman watucü lila.

Chayćhümi caminaycul yanapaycula.

17 Chaypïta Rama malcaćhu wasinman cutimulmi chayćhu Israel caśhtacunäta caminaycula.

Chayćhütacmi Tayta Diospäpis juc uycuna patacta lulaycapula.