Rut yapacunanpämi suydran limapan
3
Juc muyunćhümi llumchuyninta Noemi nin:
“Wamlallá,
¿manachun wayapayquita ashipunac timpuña allin caycunayquipä?
2 ¿Manachun walmi uywaynincunawan caycuśhayqui Booz ayllunchic imamá?
Chayurá payshi canan tuta ïranman siwä waywachïa linꞌa.
3 Chaymanmi canan tuta am linqui:
tuqui bäñapacüśha,
pirfümipacüśha,
allinninwan müdapacüśhalä.
Ñatac pay micuyta,
upyayta camacänancama amalämi licachicunquichu.
4 Maycäman puñü lishantapis sumätalämi licapaycunqui.
Puñüluptinñam lancacunta alilcul saytanman puñucuycunqui.
Chayćhümi imacta lulanayquipäpis pay nishunqui” nil.
5 Niptinmi Rut:
“Nimäśhayquitanüllam lluyta lulaycuśhä” nin.
6 Nilculmi chay ïraman lil suydran yaćhachishantanülla lluy lulaycula.
7 Chayćhu Boozñatacmi cushisha micula,
upyala.
Jinalculmi siwä juntuläśhancäpa manyanman puñucuycula.
Chay tutascañam Rut yaćhayllapa yaycuycul,
lancacunta alilcul Boozpa saytanman puñucuycula.
8 Ñatac ćhawpi tuta licaćhaculcul ichalcuśhanćhümi Booz tantiälun saytanćhu walmi puñuyäta.
9 Chaymi:
“¿Pim canqui?”
nin.
Niptinmi Rut:
“Uywayniqui Rutmi cayällá.
Wayapá partipi lijitimu ayllú caśhayqui-laycu lancacuyquiwan lancaycallämay licaycüní canayquipä” nin.
10 Niptinmi Booz:
“Wamlallá,
Tayta Diosninchic allinpä licaycuśhunqui.
Cananꞌa tantiämi alma wayapayquita rispitaśhayquita.
Waquinnu calꞌa ashïlunquimanñaćh mas müsuctapis,
rïcuctapis,
ütac wacchactapis cala.
11 Wamlallá,
canan ama manchacuychu.
Nimäśhayquitam imactapis yaꞌa lulaycuśhä.
Allin walmi am caśhayquita malcantinmari yaćhapäcun.
12 Masqui yaꞌa rasunpa aylluyqui cayaptïpis,b
juclämi alma-wayapayquipa mas lijitimu ayllun cayan.
13 Canan tuta caylläćhüña wälacuy.
Wälaman chay wayapa amwan cuscayta munaptinꞌa allinćha canꞌa.
Mana munaśhuptiquiꞌa Tayta Diosta śhaycaycachilmi cuscananchicpä limalicú.
Chayurá cayllaćhu wälanancama puñucuy” nin.
14 Niptinmi chay tuta Boozpa saytallanćhüña puñucuycula.
Ñatac mana lisicuy üra wäla-wälallam śhalcula.
Boozmi nin:
“Cay ïraman walmi śhamuśhanta ama mayanpis yaćhachunchu” nil.
15 Chayćhümi Booz nin:
“Chay cataläśhayquita jululcul masïsucta camaycuy” nil.
Chaynu Rut camaycuptinmi süta tupuc siwäta Booz winapaycula.
Chaynu ipilcachiptinmi wasinta cuticula.
16 Wasinman Rut ćhäluptinmi suydran tapula:
“Wamlallá,
¿imanuymi cälun?”
nil.
Niptinmi imacunacta Booz nishantapis Rut willapäla.
17 Jinaman nin:
“Caychica siwätapis uycallämanmi ¿imanuypatan suydrayquiman jinalla cutiyanquiman?”
nil.
18 Niptinmi Noemi:
“Wamlallá,
imanuy canantapis alcaycuśhunꞌari.
Chay wayapa lluy lulacäśha canancama,
manamá jamaytapis taliycunꞌachu” nin.