Boozpa ćhaclanćhümi Rut pallapacun
2
Noemipa wayapan Elimelecpam juc ayllun cala,
Booz śhutiyu.
Paymi sumä cäniyu rïcu cacula.
2 Juc muyunćhümi suydranta Rut nin:
“Siwä pallapacamüa ćhaclacunaman lilläśhä,
icha pallapacunäpä jucnin lutü llaquipaycallämanman” nil.
Niptinmi suydran:
“Lïluyꞌari,
wamlallá” nin.
3 Chaymi Rut pallapacü lil,
siwä lutücunaca usuchipäcuśhancunacta pallapacuyta allaycula.
Chay ćhaclaca alma suydrun Elimelecpa ayllun Boozpam caña.
4 Chaynu Rut pallapacuyaptinmi Belenpïta Booz ćhaycamul lutünincunacta:
“Tayta Diosninchic amcunawan caycuchun” nin.
Lutünincunapis:
“Amtapis Tayta Diosninchic allinpä licaycuśhunqui” nipäcun.
5 Chaypïtam siwä lutünincunap puydïninta Booz tapuycun:
“¿Mayanpam wic wamlaca?”
nil.
6 Niptinmi lutücunäpä puydïninca nin:
“Payꞌa Moab lädupi Noemiwan śhamü wamlam.
7 Paymi nimäla:
‘Ama chaynu callaychu lutücunäpä usuchipäcuśhanta pallapaculläśhä’ nil.
Chaynu awniycuptïmi lutücunaca allaycuśhanpi pallapacuyan manaña jamaytapis talil” nil.
8 Chaymi Rutta Booz nin:
“Wamlallá,
uyalimay.
Cananpïta siwä pallapacü jucpa ćhaclancunamanꞌa amañam linquiñachu.
Cayćhüña uywayní walmicunäwan caculcay.
9 Chayćha lutünïcuna mayta lutü lipäcuptinpis pallapacamü linqui.
Lluy uywaynïcunacta nïlüñam mana imanipayalcä-śhunayquipäpis.
Yacunäśhuptiquipis wacuycunaman aśhuyculmi uywaynïcuna yacu julapämuśhanpïta upyacunqui” nil.
10 Niptinmi Rut unꞌulacuycul pampäcama uyshucuycul:
“Juc lädu malcayütapis ¿imapïmi allinpä licaycul llaquipaycallämanqui?”
nin.
11 Niptinmi Booz:
“Allintam yaćhayá wayapayqui wañucuśhan-pachapi suydrayquipä imanuy caycuśhayquitapis;
taytayquicunactapis,
malcayquitapis caćhayculmari cay mana lisishayqui malcamanlä śhamulanquipis.
12 Caycunapïta Tayta Diosꞌari tincüniquiman allincunäta uycuśhunqui.
Payman chalapacuśhayqui-laycu Israelpa Tayta Diosnin yanapaycuśhunqui” nin.
13 Niptinmi Rut:
“Taytallay,
masqui uywayllayqui mana cayaptïpis allinpam licaycamanqui;
llaquipaycamalmi śhunꞌulläta llampuchaycallämanqui” nin.
14 Mirinday ürañatacmi Rutta Booz nin:
“Mirindananchicpä cayman śhamuy.
Cay tantallactapis bïnumanb puśhpachillal micucuycuy” nil.
Niptin lutücunäwan cusca Rut taycuycuptinmi,
mirindanta Booz uycula.
Chaymi Rut maćhaycunancama micucuycuptin puchülunlä canpis.
15 Chaypïta siwä pallapacü yapa liptinmi,
lutünincunacta Booz nin:
“Lutuśhacunäpi tiquiculcuptinpis pinꞌayta amam pasachipäcunquichu.
16 Aśhwanpam pallapacunanpä pursïpala lutuśhayquićhu palpaycachipäcunqui.
Amam mayanniquipis mićhacuyalcanquichu” nil.
17 Chayćhu Rutñatacmi aspilpunancama usuśhan siwäcunäta pallapacula.
Chay juntucuśhanta tacäluptinmi ishcay ćhunca (20) quïlupi mascascalä caña.
18 Chayta apaculcul suydranman cutilmi licaycachila.
Jinaman alsachacuśhan mirindactapis ipinpi juluyculmi suydranman uycula.
19 Chaymi suydran Noemi nin:
“¿Mayćhütan canan pallapacämunqui?
¿Maypïtan caychica siwäta juntucämunqui?
¡Allin caycullächun llaquipaycuśhuśhayqui nunaca!”
nil.
Niptinmi mayanćhu pallapacamuśhantapis Rut willaycula:
“Canan muyun Booz nishan nunap ćhaclanćhümi pallapacamulá” nil.
20 Niptinmi Noemi nin:
“¡Tayta Dios allinpä licaycullächun!
Tayta Diosninchicꞌa wañücunäta cawsayalcaptin mana unꞌaycuśhannümi,
canan yaꞌanchictapis llaquipaycallämanchic.
Chay wayapa ayllunchiclämic yaꞌanchicta licaycamänanchicpä cayan” nil.
21 Niptinmi llumchuynin Rut nin:
“Cusichan camacanancama uyway nunancunawan chayćhu quïdacunäpämi nimanpis” nil.
22 Niptinmi suydran Noemi:
“Wamlallá,
jucpa ćhaclanćhu imapis pasäśhunayquipïtá,
chaynu uyway nunan walmicunäwan capäcunayquipä nishuśhayquicá allinmi” nin.
23 Chaymi Boozpa uywaynin walmicunäwan cusca chayllaćhüña Rut walan-walanpis pallapacula trïgu,
siwä cusicha camacänancama.
Chay timpu,
suydran Noemipa maquillanćhülätacmi Rut yaćhala.