Rut
Rutpi Isquirbishan
Elimelecmi Moab nasyunman liculcan
1
Israel caśhtacunacta caminaycücuna mandaśhan timpućhümi micuy wana cacula.
Chaymi Juda lädu Belena malcayu nuna walminta,
pulan walaśhninta puśhaculcul Moab nasyunman licula.
2 Cay wayapapmi śhutin Elimelec,
walminpañatac Noemi,
walaśhnincunapañatac Mahlonwan,
Quelion.
Paycuna “Efrata” nishan Belen malcapïmi capäcula.
Paycunam Moab nasyunman ćhaycälil chayćhüña yaćhapäcula.
3 Chayćhümi Noemipa wayapan Elimelec wañucula.
Jinaptinmi japanyäśha Noemi ishcay walaśhllantinña quïdacula.
4 Chaypïtañatacmi walaśhnincuna chay Moab lädu wamlacunawan cuscälälila.
Jucnin llumchuyninmi Orfa cala;
juccäñatacmi Rut.
Chay malcaćhu ćhunca watanu yaćhayalcaptinmi,
5 wawin Mahlonwan Quelionpis wañuculcäla.
Jinaptinmi Noemi japanyäśha mana wayapayu,
mana wawiyu,
mana pïniyu quïdacula.
Noemiwan Rutmi Belen malcacta cutipäcun
6 Chay Moab nasyunćhu cayalcalmi Belen malcacta Tayta Dios llaquipaycul micuyta ishpiycachishanta Noemi uyalïlun.
Chaymi llumchuynincunawan yalućhaculcäla.
7 Chay yaćhapäcuśhan malcapïmari Noemi pulan llumchuyninwan Juda läducta liculcäla.
8 Chaynu liyalcäśhanćhüñam llumchuynincunacta Noemi nin:
“Mamayquip wasinman-cama cuticulcay.
Maynümi wawïcunactawan yaꞌacta allinpä licaycälimälanqui,
chaynuꞌari Tayta Dios allinpä licaycälishunqui.
9 Tayta Diostacꞌari yapaculcänayquipä wayapacta upäcuśhunqui,
wasiquićhu allin jawca cawsapäcunayquipä” nil.
Nilculmi llumchuynincunacta jamallá nil muchaycula.
Llumchuynincunañatacmi apalcaćhaypa-cama:
10 “¡Manam,
manam!
Amwan cuscam malcayquita liculläśhun” nicuyalcan.
11 Niptinpis Noemi:
“Wamlalläcuna,
cuticulcayñari.
¿Imapäñamá yaꞌawan lishun?
¿Yapaculcänayquipäpis yaꞌa wawicta patalayächun imamá?
12 ¡Wamlalläcuna,
wasiquita-cama cuticulcayñari!
Licapämäśhayquinüpis yapacunäpá chacwaśhñamari cayá.
Masqui ‘wawiyülämi caśhä’ nil canan-pacha yapaculcul wawí licalïluptinpis,
13 ¿müsuyänancamachun alcapäcunquiman imamá?
¿Payta alcayniquiwan manañachun yapaculcanquiman imatá?
Wamlalläcuna,
chaynuꞌa manamá canmanchu.
Tayta Diosninchic ñacaycunactam uycäman;
amcuna ñacapäcuśhayquita licalꞌa nana-nanayñaćh llaquicuyní caycunman” nicuyan.
14 Niptinmi pulan llumchuyninpis yapa waꞌaculcan.
Chaypïtam Orfa “jamallá” nil suydranta muchaycul cuticula.
Rutñatacmi ichá suydranta manaña caćhayculachu.
15 Chayćhümi Noemi nin:
“Licayꞌari,
llumchuy-masiqui Orfapis malcanmanña,
taytachancunamanñam cuticun.
Ampis paywan cuscallañari cuticuy” nil.
16 Niptinmi Rut:
“¡Amañari jicutayämaychu caćhaycunacpäpis nï ampïta japächacunäpäpis!
Mayta liptiquipis lilläśhämi;
mayćhu yaćhaptiquipis yaćhalläśhämi.
Malcayquim malcá canꞌa;
Diosniquim Diosní canꞌa.
17 Mayćhüpis cuscam wañulläśhun;
pampacuśhayquićhümi pampacuśhäpis.
Wañuycällamari ampïta laquiycamanꞌa.
Caćhaycüluptiꞌa Tayta Diosꞌari sumä-sumäta mućhuycachimächun” nicuyan.
18 Chaynu llapan śhunꞌunwan Rut atiyta munaśhantam Noemi tantiala.
Chaymi manaña mastá jicutälachu.
19 Chaynüpam pulanña Belenta lipäcula.
Ñatac Belenman ćhäläliptinmi jinantin malcaca äśhalayllaman camäśha cacuyalcan.
Walmicunämi:
“¿Noemichućh jinam?”
nil ninacücuyalcan.
20 Noemiñatacmi nin:
“Amaña Noemib nipämayñachu sinuꞌa Marac nipämayña,
ćhacćhä cawsayniyüña cayaptiꞌa.
Sumä munayniyu Tayta Diosmari llaquicuycunallawan ñitiycachiman.
21 Caypïta allinmi lilá;
Tayta Diosñatacmi jinanllanta cutiycächiman.
Chayurá ¿imapäñätan ‘Noemi’ nipämanquipis,
caynu sumä munayniyu Tayta Dios cuntrá śhalculcul llaquillaćhüña uywayämaptinꞌa?”
nil.
22 Chaynüpamá Noemi Moab lädu Rut llumchuyninwan Belenta cutipäcula.
Cay Belen malcacta ćhäpäcula siwä cusicha allaycuyaptinmari.