Niptinmi aśhuycul taycuycula.

2 Chayman taycapäcunanpätacmi Booz ayala malcap ćhunca yaśhancunactapis.

Chaymi paycunapis chayćhu taycaycapäcula.

3 Chayćhümi chay ayllunta Booz nin:

“Moab nasyunpïta cutimü Noemimi ayllunchic Elimelecpa tücänin ćhaclancunacta lanticuyan.

4 Chaymi malcap yaśhancunap ñawpäninćhu willaycuyac juluyta munalꞌa julucunayquipä.

Mana munalꞌa willaycamaytac.

Manamá juccuna julucunmanchu.

Anmi mas lijitimu ayllun cayanqui julunayquipä;

chaypïtalämi yaꞌa atiyämú” nil.

Niptinmi chay ayllun:

“Yaꞌami julucuśhä” nin.

5 Niptinmi Booz tantialpachin:

“Noemipa ćhaclancunacta jululꞌa,

Moab lädu japanyäśha Rutwanmi casaracunayqui.

Chaynüpam wañucücäpa śhutinpis manaña chincanꞌañachu” nil.

6 Niptinmi chay lijitimu ayllun nin:

“Chaynu captinꞌa manam julucuśhächu.

Yanꞌalmi milaynïcunap tücänintapis pishipacülüman.

Yaꞌacta tücayämaptinpis manam atipämanñachu;

julucunayquipä amtaña dirichüta pasäśhayqui” nil.

7 Chay timpucuna israelcunäćhu ayllunpa ćhaclancunacta mana juluyta atipalꞌa juc julücämanmi “amña julucuy” nil śhucuyninta jululcul uycapäcula.

Chaynüpam israelcunäćhu ima limanacuytapis tacyalpachipäcü cala.

8 Chaymari chay lijitimu aylluca śhucuyninta jululcul Boozta uycula:

“Amñari julucuy” nil.^a

9 Niptinmi chayćhu cä yaśhacunätawan jinantin malcantinta Booz nin:

“Taytacuna,

cananꞌa llapayquim licäca cayalcanqui Elimelecpa,

Quelionpa,

Mahlonpa tücänincunactapis Noemipïta julüca yaꞌa caśhäta.

10 Chaynütac Moab lädu japanyäśha Rutta walmïpäña julucuśhätapis yaćhayalcanquiñamá.

Chaynüpam ćhaclancunapis alma wayapan Mahlonpa śhutillanćhu caycunꞌa.^b

Chaymi aylluncunaćhüpis malcaćhüpis manaña chincaycunꞌañachu” nil.

11 Niptinmi yaśhacunäwan chay puncućhu cä nunacunaca nipäcun:

“Aw,

caycunapi llapämi licäca capäcú.

Maynümi Raquelwan,

Leawan Israel caśhtacunaca^c śhalcachisha calanchic,

chaynuꞌari cay walmiquiwan aylluyqui śhalcachisha cananpä Tayta Diosninchic yanapaycuśhunqui.

Efrataćhu rispitäśha wayapa má caycuy;

Belenćhu allinpä licaśha caycuy.

12 Tayta Diospa yanapayninwan chay walmiquićhu achca chuliquicuna cachun.

Chaynüpaćh Tamarpa wawin Judapa chulin Fares milaśhannüpis caycunqui” nil.^d

13 Chaynüpamari Rutwan Booz casaracüla.

Chaynu cuscäluptinmi Tayta Dios munaśhanmannu Rut patayu licalilcul walaśhta ishyacüla.

14 Walmicunäñatacmi Noemita nipäcun:

“Tayta Dios alawäśha cachun.

Pay willcayqui canantam munala licaycuśhunayquipä.

Jinantin Israelćhu allin lisisha pay caycuchun.

15 Cay willcayquiꞌa callpanchaycuśhüniquim;

chacwaśhyaptiquipis licaycüniquimá caycunꞌa.

Sumä cuyaśhüniqui llumchuyniquip wawinlämá canpis.

Llumchuyniquiꞌa anćhish wawicunapïtapis mas ćhaniyüninlämá” nil.

16 Noemimi iñachäta malaculcul maquillanćhu ishpichila.

17 Chayta licalmi bisinancuna nipäcun:

“¡Noemi walaśh wawiyümi caña!”

nil.

Nilmi iñachäta “Obed” śhutiwan śhutichapäcula.

Cay Obedmi Isaipa papänin,

Davidpa awquillun cala.

18 Caycunam Farespa milaynincuna:

Farespa chulinmi Hezron.

19 Hezronpa chulinñatacmi Ram;

Rampa chulinñatacmi Aminadab.

20 Aminadabpa chulinñatacmi Naason;

Naasonpa chulinñatacmi Salmon.

21 Salmonpa chulinñatacmi Booz;

Boozpa chulinñatacmi Obed.

22 Obedpa chulinñatacmi Isai;

Isaipa chulinñatacmi David cala.^e