Efrain aylluwanmi Jefte pilyan
12
Chaypi Efrain aylluca juntunacaycälilmi Jordan mayucta chimpälälin.
Chay Zafon malcaman ćhaycälilmi Jefteta nipäcun:
“Amon läducunäwan pilyä liyal ¿imapïtamá mana willapämälanquichu amcunawan lipäcunäpä?
¡Cananmi wasintinta cañaycälälishayqui!”
nil.
2 Nipäcuptinmi Jefte nin:
“Nunäcunawanmi chay Amon läducunäwan jatun iwinacuyćhu capäculá.
Chayćhu amcunacta ayachipämuptïpis yanapäní manam śhapämulanquichu.
3 Chaynu mana yanapapämaptiquim ‘wañulꞌa wañuśhäćha’ nil Amon läducunäwan pilyayta allacaycälilá.
Chayćhümi Tayta Dios maquïman ćhulaycämula.
Chayurá ¿imapïtamá yaꞌawan pilyanayquipä canan paćhcälälimunqui?”
nil.
4 Niptinmi Efrain ayllucunäñatac:
“Galaad läducunaca Efrainpïta laquiculcul pulïcunallam capäcunqui” nin.
Chaynu niptinmi Efrain ayllucunäwan Jefte lluy nunancunacta juntuycul pilyäpäcula.
Chayćhümi Galaad läducunaca Efrain ayllucunäta llallïlälila.
5 Chaymi Galaad läducunaca Jordan mayucta bäduywan chimpanancätapis chalacaycälila Efrain ayllucunaca manaña pasapäcunanpä.
Jinaptinmi Efrain ayllupi ayïcunaca “pasaycälichillämay” nipäcuptin Efrain ayllu caśhanta tapupäcula.
Chayćhu “manam” niptinꞌa:
6 “Má,
‘Shibolet’ niycuy” nipäcula.
Sumäta mana limayta atipal “Sibolet” nïluptinꞌa Jordan mayup bädunanćhümi muꞌulälila.
Chayćhümi tawa ćhunca ishcayniyu walanga (42,000) Efrain ayllucunaca wañuculcäla.
7 Cay Israel caśhtacunäta süta watam Jefte caminaycula.
Wañucuptinmi Galaad lädu quiquinpa malcanman pampälälila.
Ibzan nunam israelcunäta caminaycun
8 Jefte wañucuptinñatacmi Israel caśhtacunäpa caminaycünin Belen malcapïta Ibzan nuna cala.
9 Paypam quimsa ćhunca (30) wamla chulin,
quimsa ćhunca (30) walaśh chulin cala.
Lluy walaśh wamla chulincunactam juc caśhtacunawan casarächila.
Paymi Israel caśhtacunäpa caminaycünin anćhish wata cala.
10 Wañucuptinmi Belen malcanman pampälälila.
Elon nunam israelcunäta caminaycun
11 Paypa ipantam Zabulon ayllupi Elon nuna caminaycüca cala.
Paymi Israel caśhtacunäta ćhunca (10) wata caminaycula.
12 Elon wañucuptinmi Zabulon ayllup allpanćhu cä Ajalon malcaman pampälälila.
Abdon nunam israelcunäta caminaycun
13 Paypa ipantam Piraton lädupi cä Hilelpa chulin Abdon nuna caminaycula.
14 Paymi Israel caśhtacunäta pusä wata caminaycula.
Paypam tawa ćhunca (40) chulin,
quimsa ćhunca (30) willcancuna cala.
Paycunam anćhish ćhunca (70) aśhnucunaman sillaculcä cala.
15 Piraton lädupïta cä Hilelpa chulin Abdon wañüluptinmi Piraton läduman pampälälila.
Chay cala Efrainpa partićhu,
Amalec läducunaca yaćhaśhan ulꞌućhümi.