Jeftem caminaycun
11
Chaypi Galaad lädućhümi Jeftea nishan sumä tacyaycü,
mana manchalï pilyä nuna cacula.
Paymi watica walmip wawin cala;
taytanñatac Galaad nishan cala.
2 Galaadpañatacmi walminćhu juc chulincuna cala.
Paycunam wiñälälil wasinpïta Jefteta alapacälälin:
“Juc walmip wawin caśhayqui-laycum taytanchicpa cänincuna mana tücaśhunquichu” nil.
3 Chaymi Jefte wawꞌi-caśhancunapïta ayicul Tob lädućhu yaćhala.
Chayćhu illa nunacunawan jucllachanacuyculmi mana allincunacta lulapäcula.
4 Canan má,
chay unaypïta Amon läducunaca Israel caśhtacunäwan pilyayta pinsapäcuśhantam allacaycälin.
5 Chaymi Galaad malcap yaśhancuna Jefteta puśhachimü Tob läduman lipäcula.
6 Chayćhümi nipäcula:
“Amon läducunäwan pilyapäcunäćhu puydïnin canayquipä acuchun” nil.
7 Niptinmi Jefte:
“¿Manachun ćhïnicalcämal taytäpa wasinpi alapacälälimälanqui imamá?
¿Canan sasachacuyćhu cayalñatacchun paćhcälälimunqui?”
nin.
8 Niptinmi Galaadpa yaśhancuna:
“Sasachacuyćhu cayalcalmari śhayalcämullá Amon läducunäwan pilyayta yanapapämänayquipä.
Jinaman Galaadćhu lluy yaćhäcunäpa puydïnïcuna am canayquitam munapäcullá” nin.
9 Niptinmi Jefte:
“Sïchuśh Amon läducunäwan pilyanäpä cutichimäśhayquićhu,
Tayta Dios llallïchimaptinꞌa amcunap puydïniquim caśhä” nin.
10 Niptinmi paycunañatac:
“Tayta Diosmi licamäninchic;
am nimäśhayquitam lulaycälilläśhä” nin.
11 Chaynu Galaad lädu yaśhacunäwan Jefte lipäcuptinmi malcaca puydïninpä ćhulälälin.
Chaymi Mizpaćhu cayalña Tayta Diospa ñawquinćhu punta nishancäta Jefte yapa nila.
12 Chaypïtam Amon läducunäpa mandacüninman Jefte caćhälun juc willacüninta cay nil:
“¿Yaꞌa imanälactan nasyunnïpa cuntran śhalcunayquipä?”
nin.
13 Niptinmi Amon läducunäpa mandacünin nin:
“Am Israel caśhtacunämi Egiptopi unay yalapämul allpäcunacta duyñuchacaycälilanqui Arnonpïta aśhta Jaboccama,
Jordan mayucama.
Chayta jawcalla cutiycachipämay” nil.
14-15 Niptinmi Jefte yapa juc willacünintaña Amon läducunäpa mandacüninman caćhäluptin nin:
“Jeftemi caynu niyäśhunqui:
Yaꞌa Israel caśhtacunaca manamá Moab,
Amon läducunäpa allpantachu duyñuchaculcäla.
16 Awquillücuna Egiptopi yalapämul aśhwanpa chunyäninpam Puca Lamarcäcama śhapämula;
chaypïta Cadesmanmi ćhäpämula.
17 Chayćhümi juc willacüta caćhapäcula Edom malcap mandacüninman allpanpa pasaycälichinanpä.
Ñatac payꞌa manam awnipäculachu.b
Chaynütacmi Moab läducunäpa puydïnintapis mañaculcäla.
Paypis manatacmá pasachipäcunanpä awnipäculachu.
Chaymi Cadesllaćhu quïdaculcäla.
18 Chaypitañam chunyäninpa śhapämul Edom,c
Moab läducunäpa allpanpa muyupämula.
Moab läducunäpa inti ishpimunan lädu allpanman ćhälulmi Arnon mayup chimpanćhu jamapäcula.
Chay mayuca culindan captinmi Moab läducunäpa allpanman nï yaycapäculachu.
19 Chaypïtam Amhor läducunäpa,
Hesboncunäpa mandacünin Sehonmanpis willacüta caćhapäcula:
‘Allpayquipari pasaycälichillämay allpäman ćhäpäcunäpä’ nil.
20 Ñatac Sehon lisiralmi mana awnipäculachu.
Aśhwanpam lluy nunancunacta Jahazaman juntuycul awquillücunawan pilyapäcula.
21 Ñatac israelcunäpa Tayta Diosnïmi Sehontawan lluy nunantinta maquinman ćhulaycämuptin llallïlälila.
Chaynüpamari chay lädućhu cä Amhor läducunäpa allpacunacta duyñuchacaycälila:
22 Arnon mayupïta aśhta Jaboccama;
chaynütac chunyäcäpïta aśhta Jordan mayucama.d
23 Chaynu israelcunäpa Tayta Diosnin quitaycul uycuśhancätachun,
¿canan quitayta munayalcämanquiman imamá?
24 ¿Manachun taytachayqui Quemos uycuśhuśhayquica amcunapäña cayan?
Chaynümá yaꞌacunacta Tayta Diosní uycapämäśhancäpis yaꞌacunapäña cayan.
25 ¿¡Moab lädu Ziporpae chulin mandacü Balacpïpis mastucucuyanquilächun imatá!?
Payꞌa manam Israel caśhtacunäwan cuntran śhalculachu nï pilyalapischu.
26 Quimsa paćhac (300) watañamari Hesbonćhu,
Aroerćhu,
muyülïnincunaćhu,
jinaman Arnon mayup patan malcacunaćhu yaćhapäcuśhá.
¿Imapïtam chaychica wata cayalcaptí mana cutichiculcälanquichu?
27 Yaꞌa manamari ima mana allinllactapis lulayacchu.
Anmi ichá pilyanapä śhamuyniquiwan mana allinta lulayanqui.
Ñatac cäraycü Tayta Dios cäraycamäśhun yaꞌa Israel caśhtacunätawan am Amon läducunäta” nil.
28 Caynu Jefte willachiptinpis Amon läducunäpa mandacüninꞌa manamá uyalïtuculachu.
Upap limalicuynintam Jefte limalicun
29 Jinaptinmi Tayta Diospa Ispiritun Jeftecta callpanchaptin Galaadpa,
Manasespa pasal Galaadćhu cä Mizpaman pay ćhäla.
Chaypïtam Amon läducunäpa allpanta pudiracuycunanpä lila.
30 Chayćhümi Jefte limalicula Tayta Diosman:
“Cay Amon läducunäta maquïman ćhulaycämuptiquiꞌa,
31 llallishäpïta cutimulmi ćhasquimänanpä wasïpïta puntacta yalamücäta cañaywan uycuśhayqui” nil.
32 Chaypïta Amon läducunäpa allpanman yaycuptinmi Jeftepa maquinman Tayta Dios ćhulaycüla.
33 Chaymi ishcay ćhunca (20) malcacunacta llallilcul camacaycüla Aroerpïta aśhta Minitcama,
jinaman Abel-queramimcama.
Chaynüpam Amon läducunaca Israel caśhtacunäpa maquinćhüña cala.
34 Chay Mizpapi wasinta Jefte cutiptinmi japallan cä wamla chulin pandirïtanta tucaśhtin,
tuśhuśhtin ćhasquïnin yalämun.
Manamá juc chulincuna calachu.
35 Chaymi wamla chulinta Jefte licälul llaquicuypïta müdanancunacta laćhyacuyan:
“Ija,
sumä llaquimanmi ćhulämanqui.
Amlätac yalämunquipis jatun llaquiman ćhulaycamänayquipä.
Tayta Diosmanmari limaliculá,
manañam ipaman cutichïmanñachu” nishtin.f
36 Niptinmi chulin wamlaca:
“Papay,
Tayta Diosta limalicuśhayquimannu yaꞌawan lulaycuy.
Payꞌa ćhïnicüniqui Amon läducunätam llalliycayächishunqui.
37 Ñatac papay,
manalä umricta lisil wañuná cayaptinꞌa ishcay quillalla alcaycamay,
wamla-masïcunawan ulꞌucunäćhu waꞌaśhtin pulimunäpä” nil.
38 Niptinmi Jefte awniycula.
Chaymi manalä casaracul wañucunan captin wamla-masincunawan ishcay quilla ulꞌucunäta waꞌaculcä liculcäla.
39 Chay ishcay quilla ćhämuptinmi taytanman cutimula.
Chaymi taytan limalicuśhanmannu paywan lulaycula.
Chaynüpamá manalä casaracul wañucula.
40 Chaypunpïmi Israel caśhtacunäćhu wamlacunaca watan-watan Galaad lädu Jeftepa wamla chulinpïta tawa muyun ulꞌüta waꞌapäcü lipäcula.