Tolawan Jairmi Israel caśhtacunäta caminaycun
10
Abimelec wañucuptinmi Fuap chulin Tola wayapa śhalcamula Israel caśhtacunäta libraycunanpä.
Pay cala Isacar ayllupi Dodop willcanmi;
Efrainpa ulꞌuncunaćhu cä Samir malcaćhümi yaćhalapis.
2 Paymi ishcay ćhunca quimsayu (23) wata Israel caśhtacunäta caminaycula.
Wañüluptinñatacmi Samir malcaman pampälälila.
3 Tolap ipantañatacmi Galaad lädu Jair śhalcamula.
Paymi Israel caśhtacunäta ishcay ćhunca ishcayniyu (22) wata caminaycula.
4 Jairpa quimsa ćhunca (30) chulincunam cacula;
paycunam jucnincä-cama quimsa ćhunca (30) aśhnuman sillaculcäla.
Galaad lädućhu quimsa ćhunca malcancunap bärayüninmi jucnincä-cama capäculapis.
Chaytam canancamapis lisipäcun “Jairpa malcancuna” nil.
5 Jair wañucuptinmi Camon malcaćhu pampälälila.
Israel caśhtacunätam Amon läducunaca ñacachipäcun
6 Ñatac Israel caśhtacunaca Tayta Diospa ñawquin mana allincätam caśhan lulatityapäcula.
Chaymi alawapäcula taytacha Baalta,
Astarota,
jinaman Siriap,
Sidonpa,
Moabpa,
Amonpa,
Filisteop taytachancunactapis.
Tayta Diosñatacmi unꞌaycälil manaña sirbipäculachu.
7 Chaymi israelcunäwan piñacülul Filisteo,
Amon läducunäpa maquinmanña ćhulaycüla.
8 Paycunam ćhunca pusäniyu (18) wata alli-allicta ñacachipäcula Galaadćhu yaćhä israelcunäta,
Jordan mayup chimpan Amhor lädućhu Israel cäcunätapis.
9 Jinaman Amon läducunämi Jordan mayucta chimpälälin Juda,
Benjamin,
Efrain ayllucunäwan pilyapäcunanpä.
Chaymi israelcunaca sumä llaquićhu cacuyalcäla.
10 Chayćhümi Tayta Diosta mañaculcäla:
“Tayta Diosllay,
ipanchälälillacmi;
amta unꞌayculmari taytacha Baalta sirbipacullälá” nil.
11 Nipäcuptinmi Tayta Dios nin:
“¿Manachun Egipto,
Amhor,
Amon,
Filisteo,
12 Sidon,
Amalec,
Maon läducunaca ñacachipäcuśhulanqui imatá?
Chaynu ñacapäcuśhayquipi ayacalcämaptiqui ¿manachun libraycälilac,
imamá?
13 Amcunañatacmi ichá unꞌaycälimal chalaśhayqui taytachacunacta sirbipäculanqui.
Chaymi manaña mastá libraycälishayquiñachu.
14 Chay aclaculcäśhayqui taytachayquicunamanꞌari mañacü lipäcuy.
Paycunari llaquicuyniquipi libraycälishunqui” nil.
15 Niptinmi Israel caśhtacunaca:
“Mana allintam lulälälillá;
munaśhayquitari yaꞌacunawan lulaycullay.
Imacta lulamänayqui captinpis cananꞌa libraycälillämayꞌari” nin.
16 Nilcälilmi juc malcap taytacha uywaśhancunäta wicapalcälil Tayta Diosllactaña sirbipäcula.
Tayta Diosñatacmi israelcunaca ñacapäcuśhanta lical manaña awantayta atipal llaquipaculcula.
17 Chaypi Amon läducunämi pilyapäcunanpä juntunaculcul Galaadćhu jamapäcula.
Israel caśhtacunäñatacmi Mizpaćhu jamapäcula.
18 Chay Galaad lädućhu yaćhä Israel caśhtacunämi puydïnincunawan ninaculcäla:
“Mayanpis Amon läducunäpa cuntran pilyayta mayanninchicpis allaycücämi Galaad lädućhu lluy yaćhäcunäpa caminaycüninchic canꞌa” nil.