Sansonmi näsin
13
Ñatac Israel caśhtacunaca mana allincällactaña Tayta Diospa ñawquinmi caśhan lulapäcula.
Chaymi Tayta Dios tawa ćhunca (40) wata Filisteo läducunäpa maquinman ćhulaycüla.
2 Má,
Zora malcaćhümi Dan ayllupi Manoa śhutiyu nuna cala.
Paypa walmin machüra calmi imaypis mana wawiyu cala.
3 Cay walmimanmi Tayta Diospa caćha anjilnin licalilcamul:
“Am,
mana waćhacü cayalpis,
cananmi ichá patayu licalilcul walaśhta ishyacunqui.
4 Chaymi bïnucta,
sidracta ama upyanquichu.
Amatacmi anlapä licaśhacunätapis micunquichu.
5 Patayu licalilculmari walaśhta ishyacunqui.
Nazareo nishanmi canꞌa.
Pay manaläpis näsimuśhanpi Tayta Diosllapä japächäśhaa calmi ächan uchucllapis mana lutuycuśhachub canꞌa.
Paymi Israel caśhtacunäta Filisteo läducunap maquinpïta libraycunꞌa” nil.
6 Chaymi wayapanman willacü pasacul:
“Tayta Diospa caćhanmi yaꞌa caśhäcäman ćhämun.
Paymi Tayta Diospa caćha anjilninnu sumä äśhalayllaman camana caculläña.
Manam mayan caśhantapis nï maypi śhamuśhantapis tapuyculächu,
nïtacmi paypis niycamanchu.
7 Paymi niman:
‘Cananmi patayu licalilcul walaśhta ishyacunqui.
Pay nazareo nisham canꞌa.
Chaymi bïnucta,
sidracta ama upyanquichu.
Amatacmi anlapä licaśhacunätapis micunquichu.
Paymi manaläpis näsimuśhanpi Tayta Diosllapä japächäśha wañucunancama canꞌa’ nil” nin.
8 Niptinmi Tayta Diospa Manoa sulpäta ucula:
“Taytallay,
ama chaynu caychu,
chay caćhamuśhayqui nunaca yaꞌacunaman cutimullächun,
chulí näsïmuptin imacta lulapäcunäpäpis niycälimänanpä” nil.
9 Chay Manoap mañacuynintam Tayta Dios uyaliycula.
Chaymi caćha anjilninta yapa caćhamula walmin ćhaclanćhu cayaptin.
Manoañatacmi chayćhu mana calachu.
10 Chaymi walmica wayapanman willacü wayra-wayra pasacun:
“Śhaluy śhamü nunam cananpis cutïmuña” niycü.
11 Niycuptinmi Manoa walminwan cusca chay nuna caśhancäman mana-mana pasaculcan.
Chayćhümi anjilcäta Manoa nin:
“¿Amchun walmïta willaycüca cayanqui?”
nil.
Niptinmi:
“Aw,
yaꞌami cayá” nin.
12 Niptinmi Manoa:
“Willamäśhayquinu lulacacüluptinꞌa,
¿imanuypatan iñachäta ishpichipacüśhä?
¿Imactam yaćhachipäcuśhä?”
nin.
13 Niptinmi Tayta Diospa caćha anjilnin nin:
“Lluy nishäcätanülla walmiqui lulachun.
14 Bïnucta,
sidracta amam upyanꞌachu.
Amatacmi anlapä licaśhacunätapis micunꞌachu.
Cay nishäcunallactari lluy lulaycuchun” nil.
15 Niptinmi Manoa:
“Ama chaynu caychu,
juc capischacta yanulcäpamunaccama alcaycallämay” nin.
16 Niptinmi caćha anjilca:
“Masqui alcachimaptiquipis micuyniquita manam micümanchu.
Uywacta uycuyta munalꞌa aśhwanpa Tayta Diospä cañaycapuy” nin.
Ñatac Manoa manam yaćhalachu Tayta Diospa caćha anjilnin caśhanta.
17 Chayćhümi Manoa:
“Chayurá śhutiquita willaycälimay nishayquinu lulacacäluptin altuman juluycälinacpä” nin.
18 Niptinmi anjilca:
“¿Imapätan śhutïta yaćhayta munanqui?
Äśhalayllaman camanapämi śhutí cayan” nin.
19 Chaypïtam malta capishchactawan ćhaclanpi micuyninta wancaman Manoa ćhulaycul Tayta Diosman uycula.
Chayćhu walmi-cari licapayalcaptinmi mana imaypis licaśhanta Tayta Dios licachila.
20 Chay cañaśhancäpi nina janay pachäman ishpiyaptinmi licälälin Tayta Diospa caćha anjilnin chay ninap ćhawpinćhu ishpiyäta.
Chaymi umanpis pampäman tupaycunancama unꞌulacaycälila.
21 Chayćhülämi Manoa tantiäla Tayta Diospa caćha anjilnin caśhanta.
Chaypïtam caćha anjilca mayanninmanpis manaña licalimulañachu.
22 Chayćhümi walminta Manoa nin:
“Tayta Diostam licälunchic.
Cananꞌa wañucuśhunćha” nil.
23 Niptinmi walminñatac nin:
“Sïchuśh Tayta Dios wañunanchicta munalꞌa,
manaćh cañaywan uycuśhanchiccätapis,
micuycätapis ćhasquiycamachwanchu cala.
Manatacćha caycunactapis licayächimachwanchu,
nï willaycachimachwanpischu cala” nil.