Tayta Diosmi Gedeonta ayan
6
Ñatac Israel caśhtacunämi Tayta Diospa ñawquin mana allinta caśhan lulapäcüla.
Chaymi Tayta Dios anćhish wata Madian läducunäpä maquinman ćhulaycüla.
2 Chaymi Madian läducunaca Israel caśhtacunäta masta-masta ñacachipäcula.
Jinaptinmi manchacuypïta ulꞌucunäćhu maćhaycunäćhu,
aꞌacunäćhu pacacuncunacta lulapäcula.
3 Israelcunaca talpucuptinpis Madian,
Amalec nunacunäwan,
inti yalamunan lädu nunacunaca maꞌaninmi śhapämula.
4 Chaymi chayćhu yaćhapacaycälil Gaza läduman ćhänancama lluy talpuyninta camacaycälälila.
Manamá uwishpis,
wäcapis,
aśhnupis nï imapis cawsayniyu caćhaycuśha calañachu.
5 Chaynu carpantin-cama canćha-canćha uywantin-camam sumä-sumä siñaśhnu śhapämula.
Camïlluncunapis quiquincunapis nisyu-nisyu calmi mana caśhanman lluy muyuchipäcula.
6 Chaynüpam Madian läducunaca Israel caśhtacunäta pasaypi wacchayächila.
Jinaptinmi israelcunaca Tayta Diosta ruygaculcäla yanapänanpä.
7 Chaynu Madian läducunaca anchap ñacachishanpi Israel caśhtacunaca Tayta Diosta mañaculcaptinmi,
8 willacüninwan willachimula:
“Israel caśhtacunap Tayta Diosnin caynütam nin:
‘Egiptoćhu uyway cayalcaptiquim amcunacta julapämulac.
9 Egiptopïmi librapämulac;
ñacachishüniqui nunacunapïtapis librapämulacmi.
Paycunacta ñawpäniquipi alapaculculmari cay allpacta uycälilac’ nil.
10 Chaynütacmi nipäculac:
‘Yaꞌam amcunap Tayta Diosniqui cayá.
Chaymi canan yaćhapäcuśhayqui Amhor läducunap taytachancunacta ama manchaculcanquichu’ nil.
Amcunañatacmi ichá mana cäsupämälanquichu” nilmi nila.
11 Chaypïtam Tayta Diospa caćha anjilnin śhalcamul Ofraćhu cä encina lantap siquinćhu täcuyäla.
Chay lantaca Abiezer caśhtan Joaspa tucäninćhümi cala.
Chayćhümi Madian läducunaca mana licananpä Joaspa chulin Gedeona üba apchinan ïranćhu trïgunta pacallap waywayächila.
12 Chayćhümi Tayta Diospa anjilnin Gedeonman licalilcul nin:
“Am sumä tacyaycü mana manchalï wayapäwanmi Tayta Dios cayan” nil.
13 Niptinmi Gedeon nin:
“¿¡Ima!?
Tayta Dios yaꞌacunawan cayaptinꞌa,
¿imapïtamá caycuna pasayalcämanman?
¿Mayćhümá awquillücuna äśhalayllaman camanacunacta willapämäśhancunaca cayan?
Paycunamari willacula ‘Tayta Diosmi Egiptopïta julamälanchic’ nil.
Chaynu Tayta Dios cayalchun unꞌaycul cananꞌa Madian läducunäpä maquinman ćhulaycälälimanman” nil.
14 Niptinmi Tayta Dios licapaycul nin:
“Callpayquimannuꞌari Israel caśhtacunäman lil Madian läducunäpa maquinpïta libramuy.
Yaꞌa quiquïmari caćhayac” nil.
15 Niptinmi Gedeon:
“Taytay,
¿¡ima!?
¿Yaꞌalächun Israel caśhtacunäta libraycamuśhä?
Manases ayllupïta mas wacchanninmi yaꞌacuna cayalcällá.
Jinaman wasïćhüpis mana cäpä licaśha śhullcanninlämi cayalläpis” nin.
16 Niptinmi Tayta Dios:
“Amwan yaꞌa cayaptïmi Madian läducunäta juc nunactanülla llallïlälinqui” nin.
17 Niptinmi Gedeon:
“Rasunpa yaꞌawan cayalꞌa limapämaśhayquita yaćhanäpä imawanpis tantiaycachillämay.
18 Ama chaynu callaychu,
alcaycallämay uycunacpä japächaśhäcäta apamunäcama” nil.
Niptinmi Tayta Dios:
“Cutimunayquicamam cayllaćhu alcaśhayqui” nin.
19 Niptinmi Gedeon wasinta cutilcul malta capishta yanüpamula.
Jinaman ćhunca quïlu arinapïta mana libadürayu tantactapis luläpamula.
Chay aychactawan,
tantätam canaśhtaćhu apala,
calduntañatacmi mancawan.
Jinalculmi chay encina lantap siquinćhu anjil täcuśhancäman uycula.
20 Chayćhu Tayta Diospa anjilninñatacmi nin:
“Chay aychätawan libadürannä tantäta wanca janäninman ćhulaycuy.
Calduntañatac janäninman talliycuy” nil.
Niptinmi chay nishantanülla Gedeon lulala.
21 Jinaptin anjilca aptiläśhan garutinwan aychätawan mana libadürayu tantäta tupaycüluptin-pacham wancäpi juclla nina walämula.
Chaymi aychätapis,
tantätapis lluy lupäla.
Chayürallam Tayta Diospa caćha anjilnin chincacula.
22 Gedeonñatacmi Tayta Diospa caćha anjilnin rasunpa caśhanta tantiälul nin:
“Taytallay-taytay,
caćha anjilniquiwanmari cära-cära tincüllá” nil.
23 Niptinmi Tayta Dios:
“Ama manchacuychu.
Jawcalla caycuy.
Manam wañunquichu” nin.
24 Chayćhu Tayta Diospä uycuna patacta Gedeon lulaycapulmi “Tayta Diosmi jawca cawsachicü” nil śhutichäla.
Chay uycuna patacca canancamapis Abiezer caśhtacunap caśhan Ofra malcaćhümari cayan.
25 Chay tutallatacmi Gedeonta Tayta Dios nin:
“Papäniquip wäcanpïta anćhish watayu allinnin cä wäcantam apanqui.
Jinaman taytacha Baalpa uycuna patacninta papäniqui lulachishantapis pampamanmi muyüchinqui.
Chaynütac lädunćhu cä Asera mamachacta alawananpä śhalcachisha iluctapis cuchülunquim.
26 Jinalculmi chay ulꞌup puntanćhu Tayta Diosniquipä muśhü uycuna patacta śhalcachinqui.
Chayćhu anćhish watayu wäcactam cañaywan uycunqui Aseracta alawana ilu cuchuśhayquiwan” nil.
27 Niptinmi Gedeon ćhunca yanapänin wayapacunäta puśhaculcul Tayta Dios nishantanu lulapämula.
Ñatac aylluncunactawan malcanćhu nunacunäta manchacuypïmi muyunpa lulanantá tutallap lulapäcula.
28 Chay walantin wälalla lluy malcantin śhalcapäculmi licälälin taytachan Baalpa uycuna patacnin pampaman muyüchishacta;
jinaman lädunćhu cä mamacha Aseracta alawananpä iluctapis cuchüśhacta licälälin.
Chaynütac muśhü uycuna patacta ishpilcachil allinnin wäcacta cañaycapäcuśhantapis licälälin.
29 Chaynüta licälälilmari tapunacucuyalcan:
“¿Pitan cayta lulälun?”
nil.
Chaynu tapunacuyalcäśhanćhümi yaćhälälin Joaspa chulin Gedeon lulaśhanta.
30 Chaymi Gedeonpa papänin Joasta nicuyalcan:
“Chuliqui Gedeonta wañuchipacunäpä wicapamuy.
Ima nilmi taytachanchic Baalpa uycuna patacnintapis,
lädunćhu cä mamacha Aseracta alawana iluctapis pampaman muyüchila” nil.
31 Niptinmi Joas nin:
“¿Baalpa faburninchun śhalcapäcuñanqui?
¿Cananꞌa salbaytachun munapäcuñanquipis?
¡Mayanpis paypa janan śhalcücunacá manaläpis ayllimuptin wañupäcuchun!
Baal rasunpa Tayta Dios cayalꞌa uycuna patacninpi quiquillanꞌari difindicuchun” nil.
32 Chay muyunpïmi Gedeonta śhutichapäcula “Jerobaal” nil.
Chay śhutica “Baal quiquillanꞌari difindicuchun” ninanmi cala.
33 Chaymi Madian,
Amalec läducunaca,
inti ishpimunan lädu nunacunaca juntunacaycälil Jordan mayucta chimpapäcula.
Jinalmi Jezreel pampaćhüña jamapäcula.
34 Chayćhu Gedeonman Tayta Diospa Ispiritun pudiracuycuptinmi wäla curnitacta tucäluptin Abiezer ayllucunaca juntunacälälimula.
35 Chaynütacmi Manases ayllucunämanpis caćhala;
jinaman Aser,
Zabulon,
Neftali ayllucunäman caćhaptin paycunapis paćhcatityälälimulatacmi.
36 Chayćhümi Tayta Diosta Gedeon nin:
“Nimäśhayquinu Israel malcayquita rasunpa yaꞌawan libraycunayqui captinꞌa,
37 má cay ïraman uwishpa millwanta ćhuläśhä.
Chayta wälapä śhullipayca puśhtächiptinpis,
millwa caśhan pampaca chaquilla cayaptinꞌa yaćhaśhämi nimäśhayquica rasunpa caśhanta” nil.
38 Rasunpa chay nishannüllamari pasälun.
Chay wäla tutä-tutälla Gedeon śhalcuculcul chay ćhulaśhan millwäta apchiptinmib täsa junta yacu cacuña.
39 Chay nishannu lulacacuyaptinpis yapañatacmi Gedeon nin:
“Tayta Diosllay,
yapa niptí ama piñacullaychu.
Tuquicta yaćhalpunäpäri,
canan tuta millwäta chaquillacta ayllichiy,
pampätañatac puśhtäśhacta” nil.
40 Chay nishantanüllatacmi chay tutapis Tayta Dios lulaycapula.
Chaymi millwaca tuqui chaquilla ayllïña,
pampäñatac puśhtäśha.