Madian läducunätam Gedeon llallin
7
Chaypïta Jerobaalpa lisipäcuśhan Gedeonmi wäla-wälalla lluy nunancunawan lipäcul Harod mayup patanćhu jamapäcula.
Madian läducunäñatacmi jamapäcula nurti lädu More ulꞌup siquin pampanćhu.
2 Chayćhümi Gedeonta Tayta Dios nin:
“Madian läducunäta maquiquiman ćhulaycamunäpä nisyu-nisyum nunayquicuna cacuyalcan.
Yanꞌalmi israelcunaca nunatuculcanman ‘quiquïpa callpäwanmi libraculcälá’ nil.
3 Chaymi nunayquicunacta ninqui:
‘Mayanpis pilyuman liyta manchacücá wasinta cuticuchun’ ” nil.a
Niptinmi ishcay ćhunca ishcayniyu walanga (22,000) Galaad ulꞌüpi cuticulcaptin ćhunca walangallaña (10,000) quïdapäcula.
4 Chaypïta Gedeonta Tayta Dios caśhanmi nin:
“Anchaplämi nunayqui cacuyan.
Mayuman lluyta jiꞌalpachiy.
Chayćhu quiquïmi laquishä mayannincuna amwan lipäcunanpäpis ütac mana lipäcunanpäpis” nil.
5 Niptinmi Gedeon lluy nunanta mayüman jiꞌalpachila.
Chayćhümi Tayta Dios nin:
“Mayanpis yacucta allꞌunu laplaywan upyäcätam juc läduman japächanqui.
Upyananpä unꞌuläcunätañatacmi juc läduman laquinqui” nil.
6 Chayćhümi maquinwan-cama yacucta allꞌunu lapläcunaca quimsa paćhaclla (300) capäcula.
Partiñatacmi unꞌulacuycul upyapäcula.
7 Jinaptinmi Gedeonta Tayta Dios nin:
“Cay quimsa paćhac (300) maquinwan yacucta lapläcunäta yaꞌami yanapäśhä.
Paycunap maquinmanmi Madian läducunäta ćhulaycuśhä;
juccunäñatac cuticulcächun” nil.
8 Niptinmi Gedeon chay juccunäta cutïchila;
manaläpis liculcaptinmi wacuynintawan curnitillancunacta juntuchila.
Chay quimsa paćhac quïdäcunällawanñam Gedeon jamapäcula.
Madian läducunäñatacmi Gedeon caśhan patacpa ulapaynin pampäćhu jamapäcula.
9 Chay tutam Gedeonta Tayta Dios nin:
“Śhalculꞌari jamapäcuśhanman jiꞌalpuy.
Cananmi Madian läducunäta maquiquiman ćhulaycamú.
10 Sïchuśh japallayqui liyta manchaculꞌa uywayniqui Furawanꞌari jiꞌalpapäcuy.
11 Chayćhu imanipäcuśhantapis uyalilmari callpanchacul yaycapäcunqui paycunacta camacaycünayquipä” nil.
Niptinmi Gedeon uywaynin Furawan jiꞌalpapäcula ćhïnicünincuna jamapäcuśhanpa waśhascaćhu pilyä tapäcunäman.
12 Chay pampaćhümi Madian läducunaca,
Amalec läducunaca,
inti yalamunan lädućhu yaćhä nunacunaca intirun pampaćhu siñaśhnu achca-achca cacuyalcäña;
camïllu uywancunapis nisyu-nisyu lamarcäćhu aꞌunu cayäña.
13 Chay Madian lädu ćhïnicünin jamapäcuśhanman Gedeon ćhälälilmi uyalïña täpä cachacucunaca suyñuyninta caynu willanacuyäta:
“Cay jamaśhanchiccämanmi siwäpi luläśha jatun tanta cućhpayämul carpanchicman ćhälul tunïchiña” nil.
14 Niptinmi cachacu-masin nin:
“Chay suyñuyniquiꞌa Israel caśhta Joaspa chulin Gedeon pilyućhu llallimänanchicpämá.
Tayta Diosninmi yaꞌanchic Madian läducunäta paycunap maquinman ćhulaycamäśhun” nil.
15 Chaynu suyñuynin imapä caśhantapis uyalïlulmi Tayta Diosta Gedeon alawäla.
Jinalmi israelcunaca jamapäcuśhanman cutilcul nin:
“Apuray śhalcapäcuy,
Tayta Diosmi maquinchicmanña Madian läducunäta ćhulaycämun” nil.
16 Chayćhümi Gedeon quimsa paćhac (300) nunancunacta quimsa partiman laquilcul curnitillactawan,
mana winayniyu wacuyta uycula;
wacuycunäpa lulïninman acchictam pacapäcula.
17 Jinalculmi nin:
“Madian läducunäpa jamapäcuśhanman ñaćhapaycuyaptinchicmib yaꞌa lulaśhäta amcunapis atichipämanqui.
18 Yaꞌawan cäcunaca curnitillacta tucapämuptiꞌa amcunapis chay jamapäcuśhanpa lluy muyülïninćhümi tucapäcunqui,
jinaman ayaycaćhapäcunqui:
‘¡Tayta Dios-laycu,
Gedeon-laycu!’ ”
nil.
19 Jamapäcuśhanpä täpänincuna ćhawpi tuta cambianacüśha cayällaptinmi Gedeon puśhaśhan paćhac (100) nunacunäwan ćhälälin.
Jinalmi curnitillancunacta tucal apapäcuśhan wacuycunäta paquïlälin.
20 Chaynu quimsa partiman laquishancunämi jucllaćhu curnitillanta tucapäcula,
jinaman wacuynintapis paquipäcula.
Ichü maquinćhümari nina acchïcäta apapäcula,
allï maquinćhüñatacmi curnitillancunacta.
Jinalmi ayaycaćhapäcula:
“¡Tayta Dios-laycu,
Gedeon-laycu pilyaśhunña!”
nil.
21 Chay muyülïninćhu Israel caśhtacunaca masïsu śhaycacaycäliptinmi Madian läducunaca apalcachaśhtin yalapämula ayipäcunanpä.
22 Chay quimsa paćhac Gedeonpa nunancuna tucayaptinmi Tayta Dios Madian läducunäta quiquin-pulacta pilyachicuyalcan.
Jinacuyalcalmi Zerera läduman lï Bet-sita malcäcama ayicuyalcan,
Tabatpa sircanćhu cä Abel-mehola malcap culindancama.
23 Chay Madian läducunäta atïshinanpämi Gedeon ayachila Neftali,
Aser,
Manases ayllucunäta.
24 Chaynütacmi Gedeon willacachimula Efrainpa ulꞌuncunaćhu cäcunäta cay nil:
“Śhapämuy Madian läducunäwan pilyä.
Paycuna Bet-baraćhu,
Jordan mayućhu pasanapä cä bäduman manaläpis ćhäpäcuśhancama ćhulanacälälimuy” nil.
Niptinmi Efrain ayllucunaca Bet-baraćhu,
Jordanćhu bäducunäman ćhulanacälälimula.
25 Madian läducunäpa puydïnin Orebtawan,
Zeebtam chalälälila.
Jinalmi Oreb ulꞌüćhu Orebta wañülächila;
Zeebtañatacmi üba jaluna Zeeb püsućhu wañülächila.
Chaynu Madian läducunäta aticaćhalculmi Orebpa,
Zeebpa umanta Gedeonman apapäcula.
Paymi Jordan mayup chimpanćhu cayäla.